މަތީ ތަޢުލީމާއި ބެހޭ ވުޒާރާއާއި ޕެންޝަން އޮފީހާއި ދެމެދު އެއްބަސްވުމެއްގައި ސޮއިކޮށްފި!

ޕެންޝަން އޮފީހާއި މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއާ ދެމެދު މުހިންމު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގެ މައިގަނޑު މަޤްޞަދަކީ ވަޒީފާގެ ފުރުޞަތުތައް އިތުރުކޮށް، ދިވެހިންގެ ހުނަރުވެރިކަން އިތުރުކުރުމަށް ދެ މުއައްސަސާ ގުޅިގެން މަސައްކަތްކުރުމެވެ.

މި އެއްބަސްވުމުގައި ޕެންޝަން އޮފީހުގެ ފަރާތުން ސޮއިކުރެއްވީ އެ އޮފީހުގެ ޗީފް އެގްޒެކެޓިވް އޮފިސަރ، ސުޖާތާ ޙަލީމްއެވެ. އަދި މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާގެ ފަރާތުން ސޮއިކުރެއްވީ އެ ވުޒާރާގެ ސްޓޭޓް މިނިސްޓަރ ޑރ އަޙްމަދު ޝަފީޢުއެވެ.

 https://twitter.com/PensionOffice/status/1854113493252968670

ޕެންޝަން އޮފީހުން ބުނެފައިވަނީ މި އެއްބަސްވުމުގެ ދަށުން، މަތީ ތަޢުލީމާބެހޭ ވުޒާރާއިން ހިންގާ ސްކިލްސް ޑިވެލޮޕްމަންޓް ޕްރޮގްރާމުތަކުގެ ތެރެއިން ވަޒީފާގެ ފުރުޞަތުތައް އިތުރުކުރުމަށް ދެފަރާތުން ގުޅިގެން މަސައްކަތްކުރާނެކަމަށެވެ. 

މީގެ ތެރޭގައި އެވުޒާރާއިން ހިންގާ އަޕްސްކިލިންގ، ރީސްކިލިންގ އަދި ކެރިއަރ ގައިޑެންސް ފަދަ ޕްރޮގްރާމުތަކުގައި ބައިވެރިވާ ފަރާތްތަކަށާއި ނޭޝަނަލް ކެރިއަރސް ސަރވިސް (އެން.ސީ.އެސް) ޕޯޓަލްގައި ރަޖިސްޓްރީކޮށްފައިވާ ފަރާތްތަކަށް ވަޒީފާ ލިބޭ މިންވަރު ވަޒަންކޮށް، ވަޒީފާގެ ފުރުޞަތުތައް އިތުރުކުރުމަށް މަސައްކަތްކުރުން ހިމެނެއެވެ.