ޢިމާރާތްކުރުމާ ބެހޭ ވުޒާރާއިން ކުރިއަށްގެންދާ މަޝްރޫޢުތަކުގެ އޮޑިޓް ހަރުދަނާ ކުރުމަށް މަޝްވަރާކޮށްފި!

ޢިމާރާތްކުރުމާ ބިމާ ބެހޭ ވުޒާރާއިން ކުރިއަށްގެންދާ މަޝްރޫޢުތަކުގެ އޮޑިޓް ހަރުދަނާ ކުރުމަށް މަޝްވަރާކޮށްފިއެވެ.

 އިމާރާތްކުރުމާ ބެހޭ ވުޒާރާއިން ބުނެފައިވަނީ ވަޒީރު ޑރ. އަބްދުﷲ މުއްޠަލިބާއި އޮޑިޓާ ޖެނެރަލް ހުސައިން ނިޔާޒީ މިއަދު ބައްދަލުކުރައްވާފައިވާ ކަމަށެވެ. އެ ބައްދަލުވުން ބޭއްވީ ޢިމާރާތްކުރުމާ ބެހޭ ވުޒާރާގައި ކަމަށެވެ. 

އެ ބައްދަލުކުރެއްވުމުގައި އެވުޒާރަގެ ސްޓޭޓް މިނިސްޓަރު އިބްރާހިމް ޠާޢާމް މުޙައްމަދުގެ އިތުރުން އޮޑިޓާ ޖެނެރަލް އޮފީހުގެ އިސް ބޭފުޅުން ވެސް ބައިވެރިވަޑައިގެންނެވި ކަމަށެވެ.

އެ ވުޒާރާއިން ބުނެފައިވަނީ އެ ބައްދަލުވުމުގައި މައިގަނޑު ގޮތެއްގައި މަޝްވަރާކުރެވުނީ އެވުޒާރާއިން  ހިންގާ މަޝްރޫޢުތައް އޮޑިޓް ކުރުމުގެ މަސައްކަތް ހަރުދަނާކަމާއެކު ވިލަރެސްކޮށް، ކުރިއަށް ގެންދާނެގޮތްތަކާ ބެހޭގޮތުން ކަމަށެވެ.

އެކަމުގެ މުހިންމުކަން ފާހަގަކުރައްވަމުން ވަޒީރު މުއްޠަލިބް ވިދާޅުވީ ސަރުކާރުގެ މަޝްރޫޢުތައް ހިންގުމުގައި ދައުލަތުގެ މާލިއްޔަތު ޤަވާއިދާ އެއްގޮތަށް ޢަމަލުކުރުމަކީ ވަރަށް މުހިންމު ކަމެއް ކަމުގައި ދެކެވަޑައިގަންނަވާ ކަމަށެވެ.

އޮޑިޓަރ ޖެނެރަލް ހުސައިން ނިޔާޒީ ބައްދަލުވުމުގައި ވިދާޅުވީ، އެވުޒާރާގެ މަޝްރޫޢުތައް އޮޑިޓްކުރުމުގައި އޮޑިޓާ ޖެނެރަލްގެ އޮފީހުން ފުރިހަމަ އެއްބާރުލުން ދޭނެ ކަމަށާއި އެކަމުގައި ދެފަރާތުން ގުޅިގެން މަސައްކަތްކުރުމުގެ މުހިންމުކަން ވެސް ފާހަގަކުރެއްވި ކަމަށް އެވުޒާރާއިން ހާމަކޮށްފައިވެއެވެ. 

އެ ބައްދަލުވުމަކީ ދެފަރާތުގެ މެދުގައި އޮންނަ ގުޅުން އިތުރަށް ބަދަހިކޮށް، މަސައްކަތްތައް ހަރުދަނާކުރުމަށް މަގުފަހިވާނެ ބައްދަލުވުމެއް ކަމުގައި އެވުޒާރާއިން ބުނެފައިވެއެވެ.