32 އަހަރުގެ އުމުރުފުރާގައި ސިކުނޑީގެ ހަރަކާތަށް ބޮޑު ބަދަލެއް އަންނަކަން ފާހަގަވޭ : ކެމްބްރިޖް

 އައު ސައިންޓިފިކް ދިރާސާއަކުން މީހާގެ ސިކުނޑި ތުއްތުއިރުން ފެށިގެން އުމުރުން ދުވަސްވުމާ ހަމައަށް ކުރިއަރާ ގޮތް ވަނީ މެޕްކޮށްފައެވެ. މި ދިރާސާއިން ހާމަވެފައިވާ ގޮތުގައި ސިކުނޑީގެ ސްޓްރަކްޗަރގައި މައިގަނޑު ފަސް މަރުހަލާއެއް ހުންނައިރު، ކޮންމެ މަރުހަލާއެއްގައިވެސް ކުރިއެރުމަށް ބޮޑެތި ބަދަލުތަކެއް އާދެއެވެ. އެންމެ ހައިރާންކުރުވަނިވި ހޯދުމަކީ، ކުރިން ގަބޫލުކުރެވުނު ވަރަށްވުރެ މާ ފަހުން، ސިކުނޑި ފުރިހަމަ ބޮޑުމީހެއްގެ ސިކުނޑިއަކަށް ބަދަލުވަނީ 30ގެ އަހަރުތަކުގެ ކުރީކޮޅުގައި ކަމެވެ.

މި ދިރާސާއަށްޓަކައި، އެއް އަހަރުން ދަށުގެ ތުއްތު ކުދިންނާއި 90 އަހަރުގެ މީހުންނާ ހަމައަށް ގާތްގަނޑަކަށް 4000 މީހުންގެ ސިކުނޑީގެ ސްކޭންތައް ވަނީ ބޭނުންކޮށްފައެވެ. ދިރާސާވެރިން ވަނީ ސިކުނޑީގެ ނިއުރަލް ޕެތުވޭތައް އުފެދި، ވަރުގަދަވެ، އަދި ބަލިކަށިވާ ގޮތް ވަކި ވަގުތެއް ތެރޭގައި މޮނިޓަރ ކޮށްފައެވެ.

ސިކުނޑީގެ ކުރިއެރުމުގައި މައިގަނޑު ހަތަރު މުހިންމު ނުކުތާއެއް ފާހަގަ ކުރެވިފައިވެއެވެ. އެއީ ގާތްގަނޑަކަށް 9 އަހަރު، 32 އަހަރު، 66 އަހަރު އަދި 83 އަހަރެވެ. ކޮންމެ ނުކުތާއަކީވެސް ސިކުނޑީގެ ކުރިއެރުމުގެ އައު "ދައުރެއް" ފެށޭ ނުކުތާއެކެވެ. މި ބަދަލުތަކުން ސިކުނޑީގެ ކުރިއެރުމާއި އިންތިޒާމުވެފައިވާ ގޮތާއި މުއާމަލާތްކުރާ ގޮތަށް ބޮޑެތި ބަދަލުތަކެއް އާދެއެވެ.

ކޭމްބްރިޖް ޔުނިވަރސިޓީގެ ދިރާސާވެރިއެއް ބުނި ގޮތުގައި ސިކުނޑީގެ ކުރިއެރުމަކީ އެއްގޮތަށް ބަދަލެއްނައިސް ހިނގާ ކަމެއް ނޫނެވެ. އޭގެ ބަދަލުގައި އެއީ ކުއްލި ބަދަލުތަކެއް އަންނަ ކަމެކެވެ. މި ބަދަލުތައް ދެނެގަތުމަކީ ސިކުނޑިއަށް ބައްޔެއް ނުވަތަ މައްސަލައެއް ދިމާވާން ފަސޭހަވާ އުމުރުފުރާތައް ދެނެގަތުމަށް އެހީތެރިވާ ކަމެކެވެ.

މި ދިރާސާއިން ދައްކާ ގޮތުގައި 30ގެ އަހަރުތަކުގެ ކުރީކޮޅަކީ ސިކުނޑީގެ ސްޓްރަކްޗަރ ފުރިހަމަ ބޮޑުމީހެއްގެ ސިކުނޑިއަކަށް ބަދަލުވާ ފަހު މަރުހަލާއެވެ. މި މަރުހަލާގެ ފަހުން ސިކުނޑި ގިނަ އަހަރުތަކެއް ވަންދެން ހަމަހިމޭން ހާލަތެއްގައި ހުރެއެވެ. ގާތްގަނޑަކަށް 66 އަހަރުގައި ސިކުނޑި އަވަހަށް ދުވަސްވާ މަރުހަލާއަކަށް ވަދެއެވެ. މީގެ ފަހުން 83 އަހަރުގައި އަނެއްކާވެސް ބޮޑު ބަދަލެއް އަންނައިރު، މި އުމުރުގައި އުމުރާ ގުޅޭގޮތުން ސިކުނޑީގެ ހަރަކާތަށް އަންނަ ދަށްވުންތައް އިތުރަށް ފާޅުވެގެންދެއެވެ.

ދިރާސާވެރިން ވަނީ ސިކުނޑީގެ އިންތިޒާމު ދެނެގަތުމަށް އެއްގޮތް 12  ނިޒާމެއް ބޭނުންކޮށްފައެވެ. މިގޮތުން މައުލޫމާތު ދައުރުވާ ހަލުވިކަމާއި، ސިކުނޑީގެ އެކި ސަރަހައްދުތަކާ ގުޅުން ހުރި ވަރު، އަދި މުއާމަލާތް ކުރުން ހާއްސަ ހަބްތަކަށް ހަނިވެފައިވޭތޯ ނުވަތަ މުޅި ސިކުނޑިއަށް ފެތުރިފައިވޭތޯ ވަނީ ބަލާފައެވެ.

ދެވަނަ ކުރިއެރުމުގެ މަރުހަލާގައި "ވައިޓް މެޓަރ" އިތުރުވަމުންދެއެވެ. މީގެ ސަބަބުން ސިކުނޑީގެ ހުރިހާ ހިސާބަކަށް މައުލޫމާތު ފޯރުކޮށްދިނުމުގެ ހަލުވިކަމާއި އެކިސީއެންސީ އިތުރުވެ، ސިކުނޑީގެ ނެޓްވޯކް އިތުރަށް ވަރުގަދަވެއެވެ.

މި ދިރާސާއިން 32 އަހަރުގެ އުމުރުފުރާގައި ސިކުނޑީގެ ހަރަކާތަށް އަންނަ ބޮޑު ބަދަލެއްވެސް ފާހަގަ ކޮށްފައިވެއެވެ. ދިރާސާވެރިން ވަކިވަކީން ދިރިއުޅުމުގެ ހާދިސާތަކަށް ސަމާލުކަން ނުދިނަސް، މައިންބަފައިންނަށް ވުން ފަދަ ކަންކަމުގެ ސަބަބުން މި ބަދަލު އަންނަން އެހީތެރިވެދާނެ ކަމަށް ވަނީ ފާހަގަ ކޮށްފައެވެ. ކުރިން ކުރެވިފައިވާ ދިރާސާތަކުން ދައްކާ ގޮތުގައި ބަލިވެއިނުމާއި ވިހެއުމުގެ ސަބަބުން އަންހެނުންގެ ސިކުނޑީގެ ސްޓްރަކްޗަރަށް ފާޅުކޮށް ފެންނަ ބަދަލުތަކެއް އާދެއެވެ.

މި މަރުހަލާގެ ފަހުން ސިކުނޑީގެ އިންތިޒާމު އިތުރަށް ހަމަހިމޭންވެއެވެ. އަދި ދިރިއުޅުމުގެ ކުރީކޮޅާ އަޅާ ބަލާއިރު ސިކުނޑީގެ ހުނަރުތަކާއި ޝަހުސިއްޔަތުގެ ސިފަތަކަށް އަންނަ ބަދަލުތައް މަދުވެއެވެ. ފަހު ދެ މަރުހަލާގައި ސިކުނޑީގެ ގުޅުންތައް މަޑުމަޑުން ދެރަވަމުންދެއެވެ. މި ދަށްވުމަކީ އާންމުކޮށް އުމުރުން ދުވަސްވުމާ ގުޅިފައިވާ ކަމެއް ކަމަށް ދިރާސާއިން ދައްކައެވެ.