މާލޭގައި ފެންބޮޑުވުމުގެ ސަބަބުން ސިފައިން ފެށި އޮޕަރޭޝަނުގައި މިހާތަނަށް 6،700 ޓަނުގެ ފެން ހިއްކައިފި

ރާއްޖެއަށް މިހާރު ކުރަމުންދާ ވިއްސާރައާ ގުޅިގެން މާލޭގައި ފެންބޮޑުވުމުގެ ސަބަބުން، މިއަދު މެންދުރުފަހުން ފެށިގެން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)އިން ފެން ހިންދުމަށް ކުރިޔަށްގެންދާ އޮޕަރޭޝަނުގައި މިހާތަނަށް 6،736 ޓަނުގެ ފެން ހިއްކާފައިވާކަމަށް ހާމަކޮށްފިއެވެ. 

މާލޭގައި ފެންބޮޑުވެ، އާންމުން ދިރިއުޅޭ އިމާރާތްތަކަށް ފެން ވަންނަން ފެށުމާ ގުޅިގެން ސިފައިން ހަރަކާތްތެރިވާން ފެށީ މެންދުރުފަހު 13:30 ހާއިރުން ފެށިގެންނެވެ. 

މި މަސައްކަތް ސިފައިން ކުރިޔަށް ގެންދަނީ ހަތް ސަރަހައްދެއްގައި ހަތް ޕަންޕު ބޭނުންކޮށްގެންނެވެ.

މި އޮޕަރޭޝަންގައި ހަރަކާތްތެރި ވަނީ، އެމްއެންޑީއެފް ފަޔަރ އެންޑް ރެސްކިޔު ސަރވިސް އާއި އެމްއެންޑީއެފް މާލެ އޭރިއާ ކޮމާންޑުންނެވެ.

އަދި ބައެއް އިމާރާތްތަކަށް ފެން ވަންނަމުންދާތީ، ވެލި ބަސްތާ ޖެހުމުގެ މަސައްކަތް ވެސް ސިފައިން ދަނީ ކުރަމުންނެވެ. 

ބޯކޮށް ވާރޭވެހި މަގުތަކުގައި ފެންބޮޑުވުމުގެ ސަބަބުން ސިފައިން އެހީތެރިކަން ފޯރުކޮށްދޭން ފަށައިފިhttps://t.co/zLZrUmVCGz pic.twitter.com/PQIAd3lHNE

— Maldives National Defence Force (@MNDF_Official) November 26, 2025

މޫސުމާ ބެހޭ ޤައުމީ އިދާރާއިން ވަނީ، މޫސުން ގޯސްވާނެކަމަށް ލަފާކޮށް ރާއްޖޭގެ ބޮޑު ސަރަޙައްދަކަށް ހުދު އަދި ރީނދޫ ސަމާލު ވެސް ނެރިފައެވެ. އަދި ކުރިއަށް އޮތް ދެ ދުވަހު ވެސް މޫސުން ގޯސްވާނެކަމަށް ލަފާކުރެވޭތީ، އެންމެހާ ފަރާތްތަކުންވެސް މޫސުމަށް ސަމާލުވުމަށް މޫސުމާބެހޭ ޤައުމީ އިދާރާއިން ވަނީ އިލްތިމާސްކުރައްވާފައެވެ.