ސްރީލަންކާގެ މޫސުން ވަރަށް ގޯސް ، 31 މީހުން މަރުވެ، ބްރިޖެއްގެ ބައެއް ވެއްޓިއްޖެ!

ސްރީލަންކާއަށް ކުރިމަތިވަމުންދާ ނުރައްކާތެރި މޫސުމީ ހާލަތުގެ ސަބަބުން، ނޮވެމްބަރު 17 އިން ފެށިގެން މިހާތަނަށް 31 މީހުން މަރުވެފައިވާ ކަމަށް ޑިޒާސްޓަރ މެނޭޖްމަންޓް ސެންޓަރުން ހާމަކޮށްފިއެވެ. މި ހާދިސާތަކުގައި 10 މީހުންނަށް އަނިޔާވެފައިވާ އިރު، 14 މީހުން ގެއްލިގެން ރިޕޯޓްކޮށްފައިވެއެވެ. މީގެ އިތުރުން ގައުމުގެ އެކި ހިސާބުތަކުން 4,000 އަށްވުރެ ގިނަ މީހުންނަށް ބޯކޮށް ވެހުނު ވާރެއާއި، ފެންބޮޑުވުމާއި، ގަދަވަޔާ ގުޅިގެން އަސަރުކޮށްފައިވާ ކަމަށްވެސް އެ ސެންޓަރުން ބުނެއެވެ.

މި ކާރިސާތަކުގެ ތެރެއިން، ސްރީލަންކާގެ ހުޅަނގު އަދި ދެކުނު ސަރަހައްދު ގުޅުވައިދޭ މުހިންމު ބްރިޖެއް ކަމަށްވާ، ބެންޓޯޓާގެ ގިނަ ދުވަސްވީ ބްރިޖްގެ ކަނާތްފަރާތު ބައި  ރޭ ވަނީ ވެއްޓިފައެވެ. ގާތްގަނޑަކަށް 1902 ވަނަ އަހަރު ބިނާކޮށްފައިވާ މި ބްރިޖް އާންމުންނަށް ބޭނުންކުރުން ހުއްޓާލާފައި ހުރީ، ބްރިޖްގެ ހާލަތު ވަރަށް ބޮޑަށް ގޯސްވެފައި ވާތީއެވެ. މި ބްރިޖަކީ ފަތުރުވެރިންނާއި ފޮޓޯގްރާފަރުންގެ މެދުގައި މަގުބޫލު ތަނެއްވެސް މެއެވެ. މީގެ އިތުރުން، ކެންޑީގައި ހުންނަ ވިދިޔާތާ ކޮލެޖްގެ ސްޓޭޑިއަމްގެ ފާރުގެ ބައެއްވެސް މިވެއްޓިފައިވާ ކަމަށް ރިޕޯޓްކޮށްފައިވެއެވެ. ކެންޑީގެ އުޑަޑުންބަރާ އަދި ޕަތާހެވަހެތާ ސަރަހައްދުގައި ހިނގި ބިންގަނޑު ކަނޑައިގެން ދިއުމުގެ ހާދިސާތަކާ ގުޅިގެން 4 މީހުން ގެއްލިގެން ވަނީ ރިޕޯޓްކޮށްފައެވެ.

މި ކާރިސާގެ ސަބަބުން ސްރީލަންކާގެ ސަރުކާރުންވަނީ މުހިންމު ނިންމުންތަކެއް ނިންމާފައެވެ. އެގޮތުން، މިހާރު ހިނގަމުންދާ 2025 ވަނަ އަހަރުގެ ޖީ.ސީ.އީ އެޑްވާންސްޑް ލެވެލް އިމްތިހާނުތައް، ކޮމިޝަނަރ ޖެނެރަލް އޮފް އެގްޒެމިނޭޝަންސް، އޭ.ކޭ.އެސް އިންޑިކާ ކުމާރީ ލިޔާނަގޭގެ ނިންމެވުމާއެކު ފަސްކޮށްފައިވާކަން އިއުލާނުކޮށްފައިވެއެވެ. 

ހެނދުނު 10:26 ހާއިރު އިންޑޮނޭޝިއާގެ ސުމަތުރާ ކައިރީގައި، 6.6 މެގްނިޓިއުޑްގެ ބާރުގަދަ ބިންހެލުމެއް އައިސްފައިވާ ކަމަށް ޔޫ.އެސް. ޖިއޮލޮޖިކަލް ސަރވޭ  އިން ބުނެއެވެ. މި ބިންހެލުން އައިސްފައިވަނީ 16 މޭލުގެ އަޑިންނެވެ. މި ބިންހެލުމާ ގުޅިގެން، ސްރީލަންކާގެ މޫސުމާ ބެހޭ އިދާރާ (ޑިޕާޓްމަންޓް އޮފް މީޓިއޮރޮލޮޖީ) އިން ވަނީ އައްސޭރިފަށުގެ ސަރަހައްދުތަކުގައި ދިރިއުޅޭ މީހުން ސަމާލުވެ ތިބުމަށް އިލްތިމާސްކޮށްފައެވެ. ނަމަވެސް، މި ބިންހެލުމާ ގުޅިގެން ސްރީލަންކާއަށް ސުނާމީގެ ނުރައްކަލެއް ނެތް ކަމަށް މިހާރު އެ އިދާރާއިން ވަނީ ކަށަވަރުކޮށްދީފައެވެ.