ސީޕީއޭގެ ސަރަޙައްދީ މަންދޫބުގެ މަޤާމަށް ރައްޔިތުންގެ މަޖިލީހުގެ ނައިބު ރައީސް އިންތިޚާބުވެވަޑައިގެންފި!

މިހާރު ކުރިއަށްދާ 67 ވަނަ ކޮމަންވެލްތް ޕާލިމެންޓަރީ ކޮންފަރަންސް ގައި ސީޕީއޭގެ އޭޝިއާ ސަރަޙައްދުގެ، ސަރަޙައްދީ މަންދޫބުގެ މަޤާމަށް ރައްޔިތުންގެ މަޖިލީހުގެ ނައިބު ރައީސް، އަޙްމަދު ނާޡިމް އިންތިޚާބުވެވަޑައިގެންފިއެވެ.

ސީޕީއޭގެ އެގްޒެކެޓިވް ކޮމިޓީގައި ހިމެނޭ ސަރަޙައްދީ މަންދޫބުންނަކީ އެސޯސިއޭޝަންގެ ހަރަކާތްތައް ހިންގުމާއި، ސަރަޙައްދުތަކުގެ މަސްލަހަތު ފައިދާހުރި ގޮތެއްގައި ތަމްސީލުކުރޭތޯ ބެލުމުގައި މުހިންމު ދައުރެއް އަދާކުރާބައެކެވެ.

ސަރަހައްދީ މަންދޫބުންގެ ދައުރު ދެމިގެންދަނީ 3 އަހަރަށެވެ. އަދި، ނިންމުންތައް ނިންމުމުގެ މަރުހަލާތަކުގައި ބައިވެރިވުމާއި، އެގްޒެކެޓިވް ކޮމިޓީގެ ބައްދަލުވުންތަކުގައި ބައިވެރިވުން، ސަރަޙައްދީ މަންދޫބުންގެ މަސްއޫލިއްޔަތުތަކުގެ ތެރޭގައި ހިމެނެއެވެ.

ސީޕީސީގެ 67 ވަނަ ބައްދަލުވުން ކުރިއަށްދަނީ އޮސްޓްރޭލިއާގެ ސިޑްނީގައެވެ.