ދޮގު ޚަބަރުތަކަކީ މުޅި ޑިމޮކްރެޓިކް ނިޒާމު ގަޑުބަޑުކޮށްލައި ހަލަބޮލިކޮށްލާ ވަސީލަތެއް: މަޖިލިސް ނައިބުރައީސް

ދޮގު ޚަބަރުތަކަކީ މުޅި ޑިމޮކްރެޓިކް ނިޒާމު ގަޑުބަޑުކޮށްލައި ހަލަބޮލިކޮށްލާ ވަސީލަތެއް ކަމަށް ރައްޔިތުންގެ މަޖިލީހުގެ ނައިބުރައީސް އަޙުމަދު ނާޒިމް ވިދާޅުވެއްޖެއެވެ. 

ނާޒިމް މިހެން ވިދާޅުވީ މިހާރު އޮސްޓްރޭލިއާގެ ސިޑްނީގައި ކުރިއަށްދާ ކޮމަންވެލްތު ޕާލަމެންޓަރީ އެސޯސިއޭޝަންގެ ކޮންފަރެންސްގައި ކުރެއްވި ތަޤްރީރުގައެވެ. 

މީޑިއާގެ މިނިވަންކަން ދެމެހެއްޓުމަށް މަސައްކަތް ކުރަމުން، މިއަދުގެ ޑިޖިޓަލް ވެށީގައި ކުރިމަތިވަމުންދާ ދޮގު ޙަބަރުތަކާއި މަޞްނޫޢީ މީޑިއާއަށް މުޖުތަމަޢު އަހުލުވެރިކޮށް، ކޮމަންވެލްތުގެ ޤައުމުތަކުން ޢާންމުންގެ ހޭލުންތެރިކަމަށް މަސައްކަތް ކުރުމަށް ރައްޔިތުންގެ މަޖިލީހުގެ ނައިބު ރައީސް، ނާޒިމް ގެ ތަޤްރީރުގައި ގޮވާލެއްވިއެވެ.

 ކޮމަންވެލްތު ޕާލަމެންޓްރީ އެސޯސިއޭޝަންގެ ކޮންފަރެންސްގައި މިއަދު ތަޤްރީރު ކުރައްވަމުން، ރައްޔިތުންގެ މަޖިލީހުގެ ނައިބު ރައީސް އަޙުމަދު ނާޒިމްވަނީ، ދޮގު ޚަބަރާއި ސިންތެޓިކް މީޑިއާގެ ސަބަބުން، ޚިޔާލު ފާޅުކުރުމުގެ މިނިވަންކަމަށާއި ޑިމޮކްރަސީއަށް ކުރިމަތިވާ ނުރައްކާތަކަށް އަލިއަޅުއްވާލައްވާފައެވެ.މި ކޮންފަރެންސްގައި ބަހުސްކޮށްފައިވާ މައުޟޫޢަކީ، ފޭކް މިޑިއާއާއި މަސްނޫޢީ މީޑިއާގެ އުފެއްދުމުގެ ޒަމާނުގައި، މީސްމީޑިއާގެ ޕޯސްޓްތަކަށް ލައިކު ޖެހުމާއި، ވޯޓު ދޭއިރު، ޑިމޮކްރެސީގެ މިނިވަން ވެށި ޙިމާޔަތްކޮށް ހަރުދަނާ ކުރުމުގައި ކޮމަންވެލްތުގެ ޕާލަމެންޓުތަކަށް އަދާކުރެވިދާނެ ދައުރާ ބެހޭ ގޮތުންނެވެ.

ފޭކް ނިއުސް އާއި މަޞްނޫޢީ މީޑިއާއިން ހަމައެކަނި މުޖުތަމަޢާއި ފަރުދުންނަށް އޮޅުވާލަނީކީއެއް ނޫން. އެއީ، މުޅި ޑިމޮކްރެޓިކް ނިޒާމު ގަޑުބަޑުކޮށްލައި ހަލަބޮލިކޮށްލާ ވަސީލަތެއް ސީޕީއޭ ކޮންފަރެންސްގައި ތަޤްރީރުކުރައްވަމުން  

ނާޒިމް ވިދާޅުވިއެވެ.

ނާޒިމްގެ ވާހަކަފުޅު ކުރިއަށް ގެންދަވަމުން، ކޮމަންވެލްތުގެ ޤައުމުތަކުން، ތަޢުލީމީ ނިޒާމުގައި ބޭނުންކުރުމަށް މީޑިއާ ލިޓެރެސީ ކަރިކިއުލަމެއް އެކުލަވާލުމަށް ގޮވައިލެއްވިއެވެ. އަދި އެ ކަރިކިއުލަމަކީ، ހުރިހައި ޢުމުރު ފުރައަކަށް އެކަށޭނެ އަދި މެންބަރު ޤައުމުތަކުގެ އަމިއްލަ ސަޤާފަތަށް ބައްޓަން ކުރެވޭ މަންހަޖެއް ކަމުގައި ހެދުމަށްވެސް އެދިވަޑައިގަތެވެ.

މިޒަމާނުގައި މިޑިއާއަށް މުޖުތަމަޢު އަހުލުވެރި ކުރުމަކީ އިޚުތިޔާރީ ހުނަރެއް ނޫން. އެއީ ޑިމޮކްރެޓިކް ވެށްޓެއްގައި ފަރުދުންނާއި ޖަމާޢަތް ބައިވެރިވެ ބިނާކުރަނިވި މަސައްކަތެއް ކުރުމަށްޓަކައި ހޭލުންތެރި ރައްޔިތެއް ބިނާ ކުރުމަށް ކޮންމެހެން ބޭނުންވާ އަސާސީ ހުނަރެއް

ނާޒިމް ވިދާޅުވިއެވެ.

ނާޒިމް ވިދާޅުވީ ދޮގު ޚަބަރުތަކާއި މަޞްނޫޢީ މީޑިއާއިން އަޅުގަނޑުމެންގެ ޑިމޮކްރެޓިކް މުއައްސަސާތައް ޙިމާޔަތްކުރެވޭނީ ޖަމާޢަތުގެ ދިފާއުގެ ފުރަތަމަ އައްޑަނަ ކަމަށްވާ، ތަޢުލީމީ ނިޒާމު ހަރުދަނާކޮށްގެންކަމަށް ނާޒިމް ވިދާޅުވިއެވެ. 

ޤައުމީ މުހިންމު މައްސަލަތަކަށް ސްކޫލު ނިޒާމުގެ ތެރެއިން، ދަރިވަރުން މެދުވެރިކޮށް ބެލެނިވެރިންނާއި ޖަމާޢަތް ހޭލުންތެރިކުރުމުގައި ކާމިޔާބު މަސައްކަތެއް ކުރެވިދާނެ ކަމަށް ވިދާޅުވެ، ރާއްޖެއިން ހިންގާފައިވާ ސްކޫލު ހެލްތުގެ ކާމިޔާބު ޕްރޮގްރާމަށް އަލިއަޅުއްވާލެއްވިއެވެ. އެރޮނގުން ރާއްޖޭން ގައިންގަޔަށް އަރާބަލިތައް ކޮންޓްރޯލުކޮށް ޕަބްލިކް ހެލްތުގެ ދާއިރާއިން ހޯދި ކާމިޔާބީ ނާޒިމް ފާހަގަކުރައްވައިފައިވެއެވެ.