ދިވެހި ލީގު: ނިއު ބަލިކޮށް ސައްތައިންސައްތަ ރެކޯޑަކާއެކު މާޒިޔާއިން ފުރަތަމަ ބުރު ނިންމާލައިފި

ދިރާގު ދިވެހި ޕްރިމިއަރ ލީގުގައި ނިއު ރޭޑިއަންޓް ބަލިކޮށް ސައްތައިންސައްތަ ރެކޯޑަކާއެކު މާޒިޔާ ސްޕޯޓްސް އެންޑް ރެކްރިއޭޝަނުން ފުރަތަމަ ބުރު ނިންމާލައިފިއެވެ.

މާޒިޔާއިން ނިއު ބަލިކުރީ 2-1އިންނެވެ. މިއާއެކު އެ ޓީމުން މިވަނީ ފުރަތަމަ ބުރުގައި ކުޅުނު 9 މެޗުވެސް ކާމިޔާބުކޮށް 27 ޕޮއިންޓު ހޯދާފައެވެ. އަދި 17 ޕޮއިންޓާއެކު ތިންވަނަގައި ފުރަތަމަ ބުރު ނިންމާލަން ޖެހުނު ނިއު އާއި އެއްވަނައިގައި އޮތް މާޒިޔާއާ ދެމެދު 10 ޕޮއިންޓުގެ ފަރަގެއް އެބައޮތެވެ. 

ޤައުމީ ފުޓުބޯޅަ ދަނޑުގައި ހުކުރު ދުވަހު ހަވީރު މާޒިޔާ އާއި ނިއު ބައްދަލު ކުރި މެޗުގެ ފުރަތަމަ ހާފުގައި ދެ ޓީމުން ވެސް ވަނީ ރަނގަޅު ހަމަލާތަކެއް އުފައްދާފައެވެ. މެޗުގައި ފުރަތަމަ ލީޑު ނެގީ އެ ހާފުގައި މޮޅަށް ކުޅުނު ނިއުއިންނެވެ. އެގޮތުން 9ވަނަ މިނެޓުގައި އެ ޓީމަށް ލީޑު ނަގައިދިނީ ބިދޭސީ މިޑްފީލްޑަރު، ގޮމޭޒް ޑަ ސިލްވާއެވެ.

އޭގެ ފަހުން މާޒިޔާއިން ވަނީ ނުރައްކާތެރި ހަމަލާތަކެއް ނިއުގެ ގޯލަށް ފޮނުވާލާފައެވެ. އޭގެތެރެއިން ސްޕެއިންގެ ސާޖިއޯ މެންޑީ ބޮލުން ފޮނުވާލި ބޯޅަ ގޯލާ ސީދާ ނުވިއިރު، ގާނާގެ މިޑްފީލްޑަރ ރޭގަން އޮބޭންގް ފޮނުވާލި ބާރު ހަމަލާ ނިއުގެ ކިޕަރު ވަނީ ދިފާއުކޮއްފައެވެ.

މާޒިޔާއިން މެޗުގެ ނަތީޖާ ހަމަހަމަކުރީ އަޙުމަދު އައިހަމްގެ ގޯލަކުންނެވެ. އެއީ ފުރަތަމަ ހާފުގެ އިތުރު ވަގުތުގެ ތެރޭގައި އޭރިޔާ އަރިމަތިން ނަގައިދިން ހުރަހެއް ސާޖިއޯ މެންޑީ ފޮނުވާލުމުން ނިއުގެ ކުޅުންތެރިން ދިފާއުކުރަން ޖެހި ބޯޅައެއް ހޯދައިގެންނެވެ.

މާޒިޔާއިން މެޗުގައި ލީޑު ނެގީ 68ވަނަ މިނެޓުގައި ހަމްޒާ މުޙައްމަދުގެ ގޯލަކުންނެވެ. 

މި ނަތީޖާއާއެކު، ދެވަނައިގައި އޮތް އޮޑި ސްޕޯޓްސް ކްލަބާއި މާޒިޔާއާ ދެމެދު 8 ޕޮއިންޓުގެ ފަރަގެއް އެބައޮތެވެ. ނަމަވެސް މާޒިޔާއިން ވަނީ އޮޑި ސްޕޯޓްސްއަށްވުރެ އިތުރަށް އެއް މެޗު ކުޅެފައެވެ. އަދި މާޒިޔާ އަތުން ނިއު ބަލިވުމާ ގުޅިގެން، އޮޑިން މި ބުރު ނިންމާލާނީ ދެވަނައިގައިކަން ވަނީ ކަށަވަރުވެފައެވެ.