ރާއްޖެއިން ލަންކާއަށް 50،000 ޑޮލަރާއި 25،000 މަސް ދަޅު ކޭސް ހަދިޔާކުރަނީ

ސްރީލަންކާއަށް މިހާރު ކުރަމުންދާ ވިއްސާރައާ ގުޅިގެން، އެ ޤައުމަށް ފައިސާގެ އެހީގެ ގޮތުގައި 50،000 ޑޮލަރާއި 25،000 މަސް ދަޅު ކޭސް ހަދިޔާކުރުމަށް ދިވެހި ސަރުކާރުން ނިންމަވައިފި އެވެ.

ސަރުކާރުގެ މިގޮތަށް ނިންމަވާފައި ވަނީ، "ޑިޓްވާ" ތޫފާންގެ ސަބަބުން ސްރީލަންކާ ގެ އެކި ހިސާބުތަކަށް ބޯކޮށް ވާރޭވެހި އެ ޤައުމުގެ ރައްޔިތުންނަށް ލިބިފައިވާ ގެއްލުންތަކާއި ދަތިތަކުން އަރައިގަތުމަށް އެ ޤައުމަށް އެހީތެރިވުމުގެ ގޮތުންނެވެ.

ދިވެހިރާއްޖޭގެ ޚާރިޖީ ވުޒާރާއިން ވިދާޅުވީ،  މި އެހީތެރިކަމުން ރަމްޒުކޮށްދެނީ ދެ ޤައުމުގެ ދެމެދުގައި އޮތް ގާތް އެކުވެރި ގުޅުމާއި މިފަދަ އުނދަގޫ ދަނޑިވަޅެއްގައި އެ ޤައުމުގެ ރައްޔިތުންނާއެކު ދިވެހި ރައްޔިތުން ތިބިކަން ކަމަށެވެ. އަދި ރާއްޖެއިން މި އެހީގެ ސަބަބުން ޙާލުގައި ޖެހިފައިވާ ސްރީލަންކާ ރައްޔިތުންނަށް ކޮންމެވެސް ވަރެއްގެ ތަސައްލީއެއް ލިބި، ސްރީލަންކާ ސަރުކާރުން ކުރަމުންދާ މަސައްކަތައް ކޮންމެވެސް ވަރެއްގެ ލުއިކަމެއް ލިބޭނެކަމަށް އުންމީދުކުރައްވާ ކަމަށް  އެ ވުޒާރާއިން ވިދާޅުވިއެވެ.

މީގެ އިތުރުން، މިފަދަ ކަންކަމުން ދައްކުވައިދެނީ ދެ ޤައުމުގެ ދެމެދުގަ އާއި ރައްޔިތުންގެ މެދުގައި ހިއްސާކުރާ ގާތް އެކުވެރި ގުޅުންކަމަށް އެ ވުޒާރާއިން ވިދާޅުވިއެވެ.

މި ތޫފާންގެ ސަބަބުން ލަންކާގައި ގަދަ ވަޔާއެކު ކަނޑު ގަދަވެ ނުރައްކާ ވަނީ ވަރަށް ބޮޑުވެފައެވެ. އަދި މުޅި ލަންކާ އަށް ރަތް ސަމާލު ނެރެ ބޯކޮށް ވާރޭވެހޭނެ ކަމުގެ އިންޒާރު ނެރިފައިވާއިރު، މި ވިއްސާރައިގައި ލަންކާ އިން މަރުވި މީހުންގެ އަދަދު 100 އަށް ވުރެ މައްޗަށް ވަނީ އަރައިފައެވެ.