މާލެއިން ހުޅުމާލެއަށް ދާ ހައިވޭގައި އެކްސިޑެންޓެއް، ދެމީހަކަށް ހޮސްޕިޓަލުގައި ފަރުވާދެނީ

މާލެއިން ހުޅުމާލެއަށް ދާ ހައިވޭގައި އެކްސިޑެންޓެއް ހިނގައި، ދެމީހަކަށް ހޮސްޕިޓަލުގައި ފަރުވާދެމުންދާކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

 ދިވެހި ފުލުހުންގެ ޚިދުމަތުން ވިދާޅުވީ، މާލެއިން ހުޅުމާލެއަށް ދާ ލޭންގެ 4 ލޭން ހިމެނޭ ހިސާބުގައި ސައިކަލަކާއި ޕިކަޕެއްޖެހި އެކްސިޑެންޓުވެފައިވާކަމުގެ މަޢުލޫމާތު މިއަދު ހެނދުނު 09:00 ހާއިރު ލިބިފައިވާ ކަމަށެވެ.

ފުލުހުން އިތުރަށް ވިދާޅުވީ، މި އެކްސިޑެންޓު ހިނގި ވަގުތު ސައިކަލް ދުއްވަން އިނީ 28 އަހަރުގެ ދިވެހި ފިރިހެނެއް ކަމަށާއި، ސައިކަލުގެ ފަހަތުގައި އިނީ 22 އަހަރުގެ އިންޑިއާ އަންހެނެއް ކަމަށެވެ. އެގޮތުން،  ސައިކަލް ދުއްވަން އިން 28 އަހަރުގެ ދިވެހި ފިރިހެން މީހާގެ ކަނާއަތު ކޮނޑު ހުޅު ނެއްޓި އެކިވަރުގެ އަނިޔާވެފައިވާއިރު، ފަހަތުގައި އިން އަންހެން މީހާގެ ގައިގެ އެކި ތަންތަން މަށައިގެން ގޮސް އެކިވަރުގެ އަނިޔާވެފައިވާކަމަށް ފުލުހުން ވިދާޅުވިއެވެ.

އަދި މި ދެ މީހުނަށް ވެސް މިހާރު އައިޖީއެމްއެޗް ހޮސްޕިޓަލުގައި ފަރުވާދެމުންދާއިރު، މި މައްސަލަ އިތުރަށް ތަހުޤީގުކުރަމުންދާ ކަމަށް ފުލުހުން ވަނީ ވިދާޅުވެފައެވެ.