ބިދޭސީންގެ ޤަވާޢިދާ ޚިލާފު ވިޔަފާރިތައް: 41 ގަޑިއިރު ތެރޭގައި 29 މައްސަލަ ރިޕޯޓުކޮށްފި

ރާއްޖޭގައި ބިދޭސީން ޤަވާޢިދާ ޚިލާފަށް ހިންގާ ވިޔަފާރިތައް ރިޕޯޓުކުރުމަށް ސަރުކާރުން ހުޅުވާލިތާ 41 ގަޑިއިރު ތެރޭގައި، އެ ފަދަ 29 ވިޔަފާރިއެއްގެ ޝަކުވާ ޢާންމު ފަރާތްތަކުން ހުށަހަޅާފައިވާ ކަމަށް، އިޤުތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ވަޒީރު މި ކަން ހާމަކުރައްވާފައިވަނީ، މީސްމީޑިއާގައި ކުރެއްވި ޕޯސްޓެއްގެ ޒަރީޢާއިންނެވެ.

ރިޕޯޓުކުރާ މައްސަލަތައް ބަލައި، ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއާއި، އިޤުތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއާއި، މޯލްޑިވްސް ޕޮލިސް ސަރވިސްއާއި، އަދި މޯލްޑިވްސް އިމިގްރޭޝަންގެ އިތުރުން، ސަރުކާރުގެ ތަންފީޒީ އިދާރާތައް ހިމެނޭ ގޮތަށް ޤާއިމުކޮށްފައިވާ "ނެޝަނަލް ޓާސްކްފޯސް އޮން ކޮމްބެޓިންގ އިލީގަލް އެކްސްޕެޓްރިއޭޓް އޮޕަރޭޝަންސް އެންޑް ބިޒްނަސަޒް" މެދުވެރިކޮށް، އަވަސް ފިޔަވަޅު އަޅާނެކަމުގެ ޔަޤީންކަން އިޤުތިޞާދީ ވުޒާރާއިން މީގެ ކުރީން ވެސް ވަނީ ދީފައެވެ. 

ވަޒީރު މިއަދު ކުރެއްވި ޕޯސްޓުގައި ވިދާޅުވީ، ޓާސްކްފޯސްގެ އޮޕަރޭޝަންތައް މިއަދު މެންދުރުފަހުން ފެށިގެން ކުރިއަށް ގެންދާނެ ކަމަށެވެ. 

މިއަދު މެންދުރުފަހުން ފެށިގެން، މި ކަމާ ގުޅިގެން ރައީސުލްޖުމްހޫރިއްޔާ އުފައްދަވާފައިވާ ނޭޝަނަލް ޓާސްކް ފޯސްގެ އޮޕަރޭޝަންތައް ފަށާނެ. އަދި ރިޕޯޓު ކުރެއްވި ވަރަކަށް އެ ފަދަ ތަންތަން ބަލައި ފާސްކޮށް، ޤާނޫނުގައިވާ ގޮތުގެ މަތީން ފިޔަވަޅު އަޅަމުންދާނެ ކަމުގެ ޔަޤީންކަން އަރުވަން.

އިޤުތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު

މި ކަމުގައި ރައްޔިތުން ދެއްވާ އެއްބާރުލެއްްވުމަށް ވެސް ވަޒީރު ވަނީ ޝުކުރުއަދާކުރައްވާފައެވެ. 

އިޤުތިޞާދީ ވުޒާރާއިން ބުނީ، ޤަވާޢިދާ ޚިލާފަށް ބިދޭސީން ޙަރަކާތްތެރިވަނީ، ނިވާފަތްގަނޑަކަށް ދިވެހީން ހަދައިގެން ބިދޭސީން ހިންގާ ވިޔަފާރިތަކާއި، ފޮރިން އިންވެސްޓްމަންޓް ޤާނޫނުގެ ދަށުން ބިދޭސީންނަށް ހުއްދަ ނުކުރާ ދާއިރާތަކުގައި މަސައްކަތްކޮށްގެން ކަމަށެވެ.

ބިދޭސީން ޤަވާއިދާ ޚިލާފަށް ވިޔަފާރިކުރާ ނަމަ ރިޕޯޓުކުރާނެ ގޮތްްތައް:

• ވުޒާރާގެ ވެބްސައިޓް (https://trade.gov.mv/report-business-dv) މެދުވެރިކޮށް ރިޕޯޓުކުރުން
• ވުޒާރާގެ ހޮޓްލައިން 3333199އަށް ރިޕޯޓުކުރުން (ހެނދުނު 8:00 – ރޭގަނޑު 8:00އަށް)
• އިމިގްރޭޝަން ވޮޗް (https://imuga.immigration.gov.mv/report-offence)އަށް ރިޕޯޓުކުރުން

ބިދޭސީން ޤަވާޢިދާ ޚިލާފަށް ވިޔަފާރިކުރާކަމުގެ މަޢުލޫމާތު ހުށަހެޅުމުގައި، ހުށަހަޅާ ފަރާތް ނޭނގޭ ގޮތަށް މަޢުލޫމާތު ފޯރުކޮށްދެވޭނެ އިންތިޒާމު ވެބްސައިޓް މެދުވެރިކޮށް ހަމަޖެހިފައިވާކަމަށް އެ ވުޒާރާއިން ވަނީ ހާމަކޮށްފައެވެ.