ބ. އަތޮޅު ހޮސްޕިޓަލަށް އަލަށް އިތުރުކުރާ އިމާރާތުގެ ޢަމަލީ މަސައްކަތް ފަށައިފި

ބ. އަތޮޅު ހޮސްޕިޓަލަށް އަލަށް އިތުރުކުރާ އިމާރާތުގެ ޢަމަލީ މަސައްކަތް ފަށައިފިއެވެ.

ބ. އޭދަފުށީގައި އޮތް ޚާއްޞަ ރަސްމިއްޔާތެއްގައި މި މަޝްރޫޢުގެ ޢަމަލީ މަސައްކަތް ފައްޓަވާ ދެއްވީ ޞިއްޙީ ވަޒީރު އަބްދުﷲ ނާޠިމް އިބްރާހީމްއެވެ. 

މި ރަސްމިއްޔާތުގައި އޭދަފުށީ ކައުންސިލްގެ ރައީސް އާއި ކައުންސިލް އިދާރާގެ މެމްބަރުންނާއި، ބ. އަތޮޅު ހޮސްޕިޓަލްގެ އިސްވެރިންގެ އިތުރުން، ޞިއްޙީ ވުޒާރާގެ އިސްވެރިން ބައިވެރިވެ ވަޑައިގެންނެވިއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ޞިއްޙީ ވަޒީރު އަބްދުﷲ ނާޠިމް އިބްރާހީމް ވިދާޅުވީ، ބ. އަތޮޅު ހޮސްޕިޓަލުގެ ޚިދުމަތްތައް ފުޅާކުރުމަކީ އެ ރަށު ރައްޔިތުންގެ ދުވަސްވީ އިންތިޒާރަކަށް ނިމުމެއް އައުން ކަމުގައެވެ. އަދި އައު އިމާރާތާއެކު އެ ހޮސްޕިޓަލް ތަރައްޤީ ވެގެން ދިއުމަކީ، އެ ރަށު ރައްޔިތުންގެ އިތުރުން، އެ ސަރަޙައްދުގެ ރައްޔިތުންނަށް ވެސް ގިނަ ފައިދާތަކެއް ލިއްބައިދޭނެ ކަމެއްކަމަށް ވަޒީރު ވިދާޅުވިއެވެ.

މި އިމާރާތް މިރަށުގައި އެޅިގެން ދިއުމަކީ، އަސްލު ހަޤީޤަތުގައި މުޅި މި ސަރަހައްދަށް ލިބިގެން ދިޔަ ވަރަށް ބޮޑު ފަޚުރެއް. އެކި ރަށްތަކުގެ މީހުން އެކި ދުވަސްކޮޅު މި ރަށުން ޚިދުމަތް ހޯދަމުން ދަނީ. ވުމާއެކު މި ހޮސްޕިޓަލް ތަރައްޤީ ވެގެންދާނީ، ވަރަށް ގިނަ ޚިދުމަތްތަކާއެކު. ރައްޔިތުން އެކަމަކަށް އެދިވަޑައިގެން ތިއްބެވި ޚިދުމަތްތަކާއެކު. މި ހޮސްޕިޓަލުން ރައްޔިތުންނަށް ވަރަށް ގިނަ ޚިދުމަތްތަކެއް ލިބިގެންދާނެ.

ޞިއްޙީ ވަޒީރު ޢަބްދުﷲ ނާޠިމް އިބްރާޙީމް ވިދާޅުވިއެވެ.

ބ. އަތޮޅު ހޮސްޕިޓަލަށް އަލަށް އިތުރުކުރާ އިމާރާތުގައި 50 އެނދު ތަރައްޤީ ކުރުމަށް ސަރުކާރުން ވަނީ ނިންމާފައެވެ. މި މަޝްރޫޢު ހަވާލުކޮށްފައި ވަނީ ރޯޑު ޑިވެލޮޕްމަންޓް ކޯޕަރޭޝަން (އާރުޑީސީ)އާއެވެ. 181.7 މިލިޔަން ރުފިޔާގެ މިމަޝްރޫޢު އާރްޑީސީއާ ހަވާލުކޮށްފައިވަނީ، 540 ދުވަހުގެ ތެރޭގައި ނިންމާ ގޮތަށެވެ.

ވަޒީރު ނާޠިމް ބުރާސްފަތި ދުވަހު ފެއްޓެވި މި ދަތުރުފުޅުގައި ނ އަތޮޅަށް ޒިޔާރަތް ކުރައްވައި އެ އަތޮޅުގައި ވެސް ގިނަ ޚިދުމަތްތަކެއް ވަނީ ފައްޓަވާ ދެއްވާފައެވެ. އަދި ބައެއް މަޝްރޫޢުތަކުގެ ޢަމަލީ މަސައްކަތް ވެސް ފެއްޓެވިއެވެ.