ޚަބަރު
ކަސްޓަމްސްގެ ސާރވައިލެންސް މަސައްކަތް ހަރުދަނާ ކުރުމަށް ޖަޕާން ސަރުކާރުން ޕެޓްރޯލް ވެސެލްއެއް ހަދިޔާކޮށްފި
ކަސްޓަމްސްއަށް ހަދިޔާ ކުރި ޕެޓްރޯލް ވެސެލް ބައްލަވާލެއްވުން / ފޮޓޯ: ކަސްޓަމްސް
ފަރުދުން
29 ނޮވެމްބަރު 2025، 09:58
29 ނޮވެމްބަރު 2025، 09:58
މޯލްޑިވްސް ކަސްޓަމްސް ސާރވިސްއިން ބައިނަލްއަޤުވާމީ ބަނދަރުތަކުގައި ކުރިޔަށްގެންދާ ސާރވައިލެންސް މަސައްކަތް ހަރުދަނާ ކުރުމަށް ޖަޕާން ސަރުކާރުން ޕެޓްރޯލް ވެސެލްއެއް ހަދިޔާކޮށްފިއެވެ.
މި އުޅަނދު ރަސްމީކޮށް ހަވާލުކޮށްދެއްވީ ބުރާސްފަތި ދުވަހު ކަސްޓަމްސް ބިލްޑިންގައި ބޭއްވި ރަސްމިއްޔާތެއްގައެވެ. އެ ރަސްމިއްޔާތު ޝަރަފުވެރިކޮށްދެއްވީ ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާނެވެ.
ދިގުމިނުގައި 82 ފޫޓު ހުންނަ މި އުޅަނދު ޖަޕާން ސަރުކާރުގެ ފަރާތުން ކަސްޓަމްސްއާ ހަވާލުކުރެއްވީ، ޖަޕާނުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު، އިޝިގާމީ ރުމީކޯއެވެ. އަދި ދިވެހި ސަރުކާރުގެ ފަރާތުން އެ އުޅަނދާ ހަވާލުވެވަޑައިގެންނެވީ ވަޒީރު އިޙްސާންއެވެ.
މިއީ، ރާއްޖޭގެ ބަނދަރުތައް ބެލެހެއްޓުން ހަރުދަނާ ކުރުމަށާއި ސަރވެއިލެންސްގެ މަސައްކަތަށް ޖަޕާން ސަރުކާރުގެ "އިކޮނޮމިކް ކޯޕަރޭޝަން ގްރާންޓް އެކްޓް"ގެ ދަށުން ހަދިޔާ ކުރި އުޅަނދެއްކަމަށް ކަސްޓަމްސްއިން ވަނީ ހާމަކޮށްފައެވެ. އަދި ކަސްޓަމްސްއިން މި އުޅަނދު އޮޕަރޭޓު ކުރާނީ މޯލްޑިވްސް ނޭޝަނަލް ޑިފެންސް ފޯސްގެ ކޯސްޓްގާރޑްއާ ގުޅިގެންކަމަށް ވެސް އެ އިދާރައިން ހާމަކުރެއެވެ.
މި އުޅަނދު އޮޕަރޭޓް ކުރުމަށް ބޭނުންވާ ތަމްރީންތައް ޖަޕާނާއި ދިވެހިރާއްޖޭގައި ވަނީ ހިންގާފައެވެ. މި ތަމްރީން ޕްރޮގްރާމްތަކުގައި ކަސްޓަމްސްގެ 23 އޮފިސަރުން ބައިވެރިވެފައިވެއެވެ.