ކުޅިވަރު
ހޮކޭއަށް ދަނޑުމަތީގައި ފިޓް ޖެހުމުން އެހީތެރިވި ފަރާތްތަކަށް އޮޑި ސްޕޯޓްސްއިން ޝުކުރު އަދާކޮށްފި
އެޮޑި ސްޕޯޓްސް ކްލަބްގެ ކެޕްޓަން މުޙައްމަދު ރަޝީދު / ފޮޓޯ: އޮޑި ސްޕޯޓްސް
އޮޑި ސްޕޯޓްސް ކްލަބްގެ ކެޕްޓަން މުޙައްމަދު ރަޝީދު (ހޮކޭ)އަށް ދަނޑުމަތީގައި ފިޓް ޖެހުމުން އެހީތެރިވި ފަރާތްތަކަށް އޮޑި ސްޕޯޓްސް ކްލަބުން ޝުކުރު އަދާކޮށްފިއެވެ.
ހޮކޭއަށް ފިޓުޖެހިފައި ވަނީ މިއަދު ހަވީރު ދިވެހި ޕްރިމިއަރ ލީގުގައި ޓީސީ ސްޕޯޓްސް ކްލަބާ ދެކޮޅަށް ކުޅުނު މެޗުގެ 66ވަނަ މިނެޓުގައެވެ. ފިޓު ޖެހިގެން އޭނާ ދަނޑު މައްޗަށް ވެއްޓުނީ، ސެންޓަރ ސާރކަލް ތެރެއިން ބޮލުން ޖަހަން ފުންމާލި ވަގުތުއެވެ.
އޮޑި ސްޕޯޓްސްއިން ނެރުނު ބަޔާނުގައި ބުނީ، އެ ދަނޑިވަޅުގައި ޓީސީގެ މެޑިކަލް އޮފިސަރު ޝަރަފުއްދީން އާއި އޮޑި ސްޕޯޓްސްގެ ފިޓްނަސް ކޯޗު މަޙްފޫޒު ކުރެއްވި ބުރަ މަސައްކަތަށް ޝުކުރު އަދާކުރާ ކަމަށެވެ.
އަދި ހޮކޭގެ ޙާލަތު އިތުރަށް ގޯސްވެގެން ނުދިޔައީ ދަނޑުމަތީގައި ދެވުނު ފަރުވާ ރަނގަޅުވުމުންކަމަށް ވެސް އެ ކްލަބުން ހާމަކުރެއެވެ.
އޮޑި ސްޕޯޓްސްގެ ޝުކުރު ލިސްޓުގައި މާޒިޔާގެ ޑރ. ޙިޝާމް ވެސް ހިމަނާފައި ވެއެވެ.
އެ ޓީމުން ބުނީ އެ ހާދިސާއާ ގުޅިގެން އެ ތަނަށް ދިޔަ ޞިއްޙީ އެހީތެރިންގެ ފަރާތުން ފެނިގެން ދިޔައީ ކުޅިވަރުގެ ރީތި އަޚުލާޤާއި މެޑިކަލް ޕްރޮފެޝަނަލިޒަމް ކަމަށެވެ.
މި ހާދިސާ ހިނގި ގޮތާ ގުޅިގެން އެ ކްލަބްގެ އޮފިޝަލް އަލީ ޝިފާޒު ބުނީ، ހޮކޭއަށް ތިން ފަހަރެއްގެ މަތިން ފިޓު ޖެހުނު ކަމަށެވެ. އެއީ ދަނޑުމަތީގެ އިތުރުން، ހޮސްޕިޓަލަށް ގެންދިޔަ މަގުމަތީގަ އާއި ހޮސްޕިޓަލަށް ގެންދިޔަ ފަހުން ކަމަށެވެ.
އޭނާއަށް މިހާރު ފަރުވާ ދެމުން ދަނީ އޭޑީކޭގެ އީއާރުގައެވެ.