ބަދުއަޚުލާގީ ޢަމަލު ހިންގަމުން ދަނިކޮށް ތިނަދޫއިން ދެ މީހަކު ހައްޔަރުކޮށްފި

ފުލުހުންގެ އޮޕަރޭޝަނެއްގެ ތެރެއިން ބަދުއަޚުލާގީ ޢަމަލު ހިންގަމުން ދަނިކޮށް ދެ މީހަކު ގދ. ތިނަދޫއިން ހައްޔަރުކޮށްފިއެވެ.

ފުލުހުންގެ މި އޮޕަރޭޝަނަކީ ފައިސާއަށް ހަށިވިއްކަމުންދާކަމަށް ލިބުނު މަޢުލޫމާތަކާ ގުޅިގެން ކުރިޔަށްގެންދިޔަ އޮޕަރޭޝަނެކެވެ.

އެގޮތުން ހުކުރު ދުވަހުގެރޭ 11:30 ހާއިރު ހިންގި މި އޮޕަރޭޝަންގައި ފުލުހުންގެ ބެލުމުގެ ދަށަށް ގެންދިޔައީ 52 އަހަރުގެ ދިވެހި ފިރިހެނަކާއި، 39 އަހަރުގެ ތައިލެންޑު އަންހެނެކެވެ.

ފުލުހުންގެ ޚިދުމަތުން ހާމަކޮށްފައިވާ ގޮތުގައި އެ ދެ މީހުން ހައްޔަރުކުރީ، ފުލުހުންނަށް ލިބުނު ރިޕޯޓަކާ ގުޅިގެން އެ ރަށު ގެޔެއް ބަލާފާސްކުރަނިކޮށް، ބަދުއަޙުލާގީ ޢަމަލު ހިންގަމުން ދަނިކޮށް، ކުށުގެ ވެށިންނެވެ.

މި މައްސަލައިގައި މި ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން ފިރިހެން މީހާ ވަނީ ކަފާލާތުގެ ދަށުން ދޫކޮށްލާފައެވެ. އަދި އަންހެން މީހާ 4 ދުވަހުގެ މުއްދަތަށް ހައްޔަރު ކުރުމަށް ވަނީ އަމުރުކޮށްފައެވެ. 

ފުލުހުން ދަނީ މި މައްސަލަ ތަޙުޤީޤު ކުރަމުންނެވެ.