އިނގިރޭސި ލީގު: ފޮޑެން، އިތުރު ވަގުތު ސިޓީ މޮޅުކޮށްދީފި

އިނގިރޭސި ޕްރިމިއަރ ލީގުގައި އިތުރު ވަގުތު ފިލް ފޮޑެން ކާމިޔާބުކުރި ގޯލުން މެންޗެސްޓަރ ސިޓީ މޮޅުވެއްޖެއެވެ. 

ސިޓީ އޮފް މެންޗެސްޓަރ ސްޓޭޑިއަމްގައި ހޮނިހިރު ދުވަހުގެރޭ ކުޅުނު މި މެޗުގައި ލީޑްސް ޔުނައިޓެޑުގެ މައްޗަށް ސިޓީއިން ކުރި ހޯދީ 3-2އިންނެވެ. 

މި މެޗުގައި ފޮޑެން ވަނީ މެޗުގެ 1ވަނަ މިނެޓުގައި ސިޓީއަށް ލީޑު ނަގައިދީފައެވެ. އެއީ މެތިއުޒް ނުނޭޒް ކަނާތްފަރާތުން ހުރަސްކޮށްދިން ބޯޅައެއް ގޯލުގެ ތެރެއަށް ފޮނުވާލައިގެންނެވެ. ފޮޑެން މި ބޯޅަ ގޯލަށް ވަނީ ހުރަސް ދަނޑީގައި ޖެހިފައެވެ.

އޭގެ ފަހުން ވެސް ސިޓީއިން ވަނީ މޮޅަށް ކުޅެ ރަގަޅު ފުރުސަތުތައް ހޯދާފައެވެ. އެގޮތުން މެޗުގެ 25ވަނަ މިނެޓުގައި ކޯނަރަކުން ފަހިވި ފުރުސަތެއްގައި ޖޮސްކޯ ވާޑިއޯލް ވަނީ އެ ޓީމުގެ ލީޑު ފުޅާކޮށްދީފައެވެ.

ނަމަވެސް ދެވަނަ ހާފުގައި ލީޑްސްއިން ފަހަތުން އަރާ މެޗުގެ ނަތީޖާ ހަމަހަމަކޮށް، ސިޓީ ޕްރެޝަރަށް ވައްޓާލިއެވެ. އައު ފޯމޭޝަނެއްގައި، އޭޓޭކަށް ސަމާލުކަން ދީގެން ދެވަނަ ހާފަށް ނިކުތް ލީޑްސްގެ ފުރަތަމަ ގޯލު 49 ވަނަ މިނެޓުގައި ކާމިޔާބުކުރީ، ދެވަނަ ހާފުގައި ކުޅެން ނިކުތް ޑޮމިނިކް ކެލްވާރޓް ލުވިންއެވެ. 

ލީޑްސްއިން މެޗުގެ ނަތީޖާ ހަމަހަމަކުރީ އެ ޓީމަށް ލިބުނު ޕެނަލްޓީއަކުން، ފޯވާރޑް ލޫކަސް މެޗާއެވެ. އޭނާގެ ޕެނަލްޓީ ޑޮނަރުއްމާ ދިފާއު ކުރިނަމަވެސް،ދިފާއުކުރަން ޖައްސާލި ބޯޅަ ލިބުނީ އަނބުރާ މެޗާއަށެވެ. އަދި ދެވަނަ ފުރުސަތު ކާމިޔާބުކޮށް މެޗާ ވަނީ ލީޑްސްއަށް ނަތީޖާ ހަމަހަމަކޮށްދީފައެވެ.

އޭގެ ފަހުން އަނބުރާ ލީޑު ހޯދުމަށް ސިޓީއިން ކުރަމުން ދިޔަ މަސައްކަތް ކާމިޔާބުކުރީ އަނެއްކާ ވެސް ފޮޑެންގެ ގޯލަކުންނެވެ. ލީޑްސްގެ ޕެނަލްޓީ އޭރިއާ ތެރެއިން ބޯޅަ ހޯދުމަށްފަހު، ކުޅުންތެރިންތަކުގެ ތެރެއިން ފޮޑަން ގޯލަށް އަމާޒުކުރި ބޯޅަ ވަނީ ވާތްފަރާތުގެ ތިރީ ކަނަށެވެ. 

މި ނަތީޖާއާއެކު ސިޓީ ވަނީ ލީގުގެ ދެވަނައަށް ކުރިޔަށް ޖެހިލާފައެވެ. އަދި މިރޭ އާސެނަލް އާއި ޗެލްސީ ބައްދަލުކުރާ މެޗުން ޗެލްސީ މޮޅުނުވެއްޖެނަމަ، ތާވަލުގެ ދެވަނައަކަށް ބަދަލެއް ނާންނާނެއެވެ.