ހިޔާ ފްލެޓްގައި މީހަކު ރަހީނުކުރުން: އެމީހާ ސަލާމަތް ކުރެވުނީ ކިރިޔާ: ފުލުހުން

ހުޅުމާލެ ދެވަނަ ފިޔަވަހީގައި ހުންނަ ހިޔާ ފްލެޓު ތަކުގެ 9 ވަނަ ޓަވަރުގައި ރަޙީނުކޮށްގެން ގެންގުޅުނު މީހަކު ފުލުހުން ސަލާމަތްކޮށްފިއެވެ. 

ދިވެހި ފުލުހުންގެ ޚިދުމަތުން މިކަމާ ގުޅިގެން ބުނެފައިވަނީ މި ކަން ހިނގާފައިވަނީ ރޭގެ 19:40 ހާއިރު ކަމަށެވެ. މި ހާދިސާ ހިނގީ ޓަވަރު 9 ގެ 20 ވަނަ ފަންގިފިލާގައި ހުންނަ 11 ވަނަ އެޕާޓްމަންޓްގައެވެ. މިމައްސަލައާއި ގުޅިގެން ފުލުހުން ވަނީ 12 މީހަކު ހައްޔަރުކޮށްފައެވެ. މި ހާދިސާގައި ރަޙީނުކޮށްފައިވަނީ، ފިރިހެނެކެވެ.

ރަހީނުކުރުމުގައި ބައިވެރިވި މީހުން، ރަޙީނުކުރި މީހާގެ ބޮލުގެ އިސްތަށިގަނޑު ކޮށާލައި އޭނާއަށް ޖިސްމާނީގޮތުން އަނިޔާދިނުމަށް ވަނީ މަސައްކަތްކޮށްފައެވެ. މިގޮތުން ފުލުހުން އެޕާޓްމަންޓް ދޮރު ހަލާކުކޮށްލައިގެން ވަތްއިރު، އެމީހުން ތައްޔާރުވަމުންދިޔައީ ރަޙީނުކުރި މީހާގެ އިނގިލި ބުރިކޮށްލަން ކަމަށް ފުލުހުން ބުނެފައިވެއެވެ.

މި މައްސަލާގައި ފުލުހުން ވަނީ 12 މީހެއްގެ އަތުގައި ބިޑިއަޅުގައި ފުލުހުންގެ ހައްޔަރަށް ގެންގޮސްފައެވެ. 

މި މައްސަލައާއި ގުޅޭގޮތުން އެސިސްޓަންޓް ކޮމިޝަނަރ އޮފް ޕޮލިސް މުޙައްމަދު ދާއޫދު ވިދާޅުވީ މައްސަލައިގެ ސީންއަށް ފުލުހުން ފިޔައީ އާންމު ފަރާތަކުން ގުޅާ އިންޓެލްއާ ޙިއްސާކުރި މަޢުލުމާތަކާއި ގުޅިގެންކަމަށެވެ. މަޢުލޫމާތު ލިބުނީ ހުޅުމާލެ ހިޔާގެ 9ވަނަ ފްލެޓްގެ 20 ވަނަ ފަންގިފިލާއަށް މީހަކު ރަޙީނުކޮށް ގެންގޮސްފައިވާކަމުގެ މަޢުލޫމާތުކަމަށް ދާއޫދު ވިދާޅުވިއެވެ. 

އެއާއެކު ފުލުހުންގެ އިންޓެލިޖެންސްއާއި ހުޅުމާލެ ފުލުހުން އެ އެޕަރަޓްމަންޓް ހޯދައި، އެތާނގެ ދޮރު ވައްޓާލުމަށްފަހު އެޕާޓްމަންޓަށް ވަދެ ކުރި މަސައްކަތުން، ރަޙީނުކުރި މީހާއަށް މާބޮޑު ގެއްލުމެއް ކުރިމަތިނުވެ އެމީހާ ފުލުހުންގެ ޙިމާޔަތަށް ގެނެވުނުކަމަށް ދާއޫދު ވިދާޅުވިއެވެ.

ރަޙީނުކުރި މީހާ ހުރީ ބޯބާލާފައި ކަމަށާއި، ސީންއަށް ގޮސް މަޢުލޫމާތު ނެގުމުން ރަޙީނުކޮށްފައި އިން މީހާ ބުނެފައިވަނީ ފުލުހުން އެތަނަށް ވަދެފައިވަަނީ ގޭންގުގެ މީހުންތައް އޭނާގެ އިނގިލި ބުރިކޮށްލަން ތައްޔާރަށް ތިއްބައި ކަމަށާއި އެމިހާއަށް ބޮޑު އަނިޔާއެއް ލިބިފައި ނުވާ ކަމަށް އެސިސްޓަންޓް ކޮމިޝަނަރ އޮފް ޕޮލިސް މުޙައްމަދު ދާއޫދު ވިދާޅުވިއެވެ.

މިމައްސަލައާ ގުޅިގެން ފުލުހުން ދަނީ ބޮޑު ތަޙުޤީޤެއް ހިންގަމުންނެވެ. މިހާދިސާގައި ރަހީނުކުރި މީހާ ސަލާމަތްކުރުމަށް ފުލުހުން މަސައްކަތް ކުރަމުންދިޔައިރު ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިހްސާން އެތަނަށް ވަޑައިގެން ފުލުހުންނަށްވަނީ ހިތްވަރުދެއްވާފައެވެ.