ތޫފާނުގައި ގެއްލުންވި ސްރީލަންކާއަށް އެހީވުމަށް ބާއްވާ “ސިލޯނާއެކު ދިވެހިން” ޓެލެތޯން ފަށައިފި

ބާރުގަދަ ތޫފާނެއް ކަމުގައިވާ ދިތުވާއާ ގުޅިގެން އަވަށްޓެރި ސްރީލަންކާއަށް ކުރަމުންދާ ވިއްސާރައިގައި އެޤައުމަށް ބޮޑެތި ގެއްލުންތަކެއްވެ، އެތައް ބަޔަކު މަރުވެ އަދި އެތައް ބަޔަކު ހާލުގައި ޖެހިފައިވާތީ، އެޤައުމަށް އެހީތެރިވުމުގެ ގޮތުން ދައުލަތުގެ މީޑިއާ ޕަބްލިކް ސަރވިސް މީޑިއާ (ޕީއެސްއެމް)އިން އިސްނަގައިގެން ބާއްވާ "ސިލޯނާއެކު ދިވެހީން" ޓެލެތޯން މިހާރު ފަށައިފިއެވެ.

މި ޓެލެތޯނަކީ ސްރީލަންކާއަށް ދިމާވެފައިވާ މި ހިތާމަވެރި ހާލަތުގައި ދިވެހި ރައްޔިތުންގެ އެހީތެރިކަން ފޯރުކޮށްދިނުމަށް ހިންގާ ހަރަކާތެކެވެ. 37 މީޑިއާއެއްގެ ބައިވެރިވުމާއެކު ކުރިއަށް ގެންދާ މި ޓެލެތޯން މިރޭ މެންދަމު 1:00 ޖެހުމާ ހަމައަށް ކުރިއަށް ދާނެއެވެ. މި ޓެލެތޯނުގައި ބައިވެރިވުމުގެ ފުރުސަތު ހުރިހާ ދިވެހި ރައްޔިތުންނަށާއި ޖަމްޢިއްޔާ، ޖަމާޢަތް، ކްލަބްތަކާއި އޮފީސްތައް ފަދަ ހުރިހާ ފަރާތްތަކަށް ވަނީ ހުޅުވާލާފައެވެ.

ސްރީލަންކާއަކީ ޒަމާނުއްސުރެ ދިވެހިރާއްޖެއާ ނުހަނު ގާތް ރަޙުމަތްތެރި ޤައުމެކެވެ. އަދި އެޤައުމުގެ ރައްޔިތުންނަކީ ދިވެހިންނާ ވަރަށް ގާތް ގުޅުންތަކެއް ބާއްވާ އެކުވެރި ބައެކެވެ. ރާއްޖޭން ބޭރުގައި އެންމެ ގިނަ ދިވެހިން ދިރިއުޅެމުން އަންނަ އެއް ޤައުމަކީވެސް އަވަށްޓެރި އެކުވެރި ސްރީލަންކާއެވެ. އެހެންކަމުން މި ދަނޑިވަޅުގައި ލަންކާއަށް ދިވެހިންގެ އެހީތެރިކަން ފޯރުކޮށްދިނުމަކީ ވަރަށް މުހިންމު ކަމެކެވެ.

މި ޓެލެތޯނަށް ފަންޑު އެއްކުރުމަށް މާލެއާއި ހުޅުމާލެ އަދި ވިލިމާލޭގެ އެކި ސަރަޙައްދުތަކުގައި ފަންޑު ފޮށިތައް ބެހެއްޓުމުގެ އިތުރުން، އެހީވުމަށް ފަސޭހަ ގިނަ އިންތިޒާމްތަކެއް ވަނީ ހަމަޖައްސާފައެވެ. އެގޮތުން ކިއުއާރު ކޯޑް ސްކޭންކޮށްގެން ފަސޭހައިން ފައިސާ ޖަމާ ކުރެވޭނެ އިންތިޒާމް ވަނީ ހަމަޖައްސާފައެވެ. 

އަދި ނަގުދު ފައިސާ، ޓްރާންސްފަރ އަދި ބޭންކް ޗެކް މެދުވެރިކޮށްވެސް މި ޓެލެތޯނަށް ފައިސާ ޖަމާކުރެވޭނެއެވެ. މި ޓެލެތޯނަށް ލިބޭ ފައިސާ ޖަމާކުރުމަށް ޚާއްސަ އެކައުންޓެއްވެސް ވަނީ ހަދާފައެވެ.

ފައިސާ ޓްރާންސްފަރ ކުރުމަށް ބޭނުންކުރާނެ އެކައުންޓްތަކަކީ: 

ދިވެހި ފައިސާއިންނަމަ

އެކައުންޓް ނަންބަރު: 7730000796107

އެކައުންޓް ނަން: Ceylon Aaeku Dhiveheen

ޑޮލަރުންނަމަ

އެކައުންޓް ނަންބަރު: 7730000796106

އެކައުންޓް ނަން: Ceylon Aaeku Dhiveheen

މި މަސައްކަތް ކުރިއަށް ގެންދިއުމުގައި ދެފުށް ފެންނަ، ރައްޔިތުންގެ އިތުބާރު ދެމެހެއްޓޭނެ ގޮތަކަށް ކަންކަން ކުރުމަށްޓަކައި، މިނިވަން އޮޑިޓް ފަރމެއްގެ ބެލުމުގެ ދަށުން މަސައްކަތް ކުރިއަށް ގެންދިއުމަށް ވަނީ ހަމަޖައްސާފައެވެ. މިނިވަން އޮޑިޓް ފަރމެއް ހަމަޖައްސައި އެކަމުގެ އެއްބަސްވުމުގައި ސޮއިކޮށްފައިވާއިރު، މި ޓެލެތޯންގެ އޮޑިޓް ފަރމެއްގެ ގޮތުގައި މަސައްކަތް ކުރާނީ ކްރޯ މޯލްޑިވްސް އެވެ.