ބަންގްލަދޭޝްގެ ކުރީގެ ބޮޑުވަޒީރު ޚާލިދާ ޒިއާގެ ހާލު "ވަރަށް ނާޒުކު"، ހޮސްޕިޓަލުގައި ފަރުވާދެމުންދަނީ

ބަންގްލަދޭޝްގެ ކުރީގެ ބޮޑުވަޒީރު ޚާލިދާ ޒިއާގެ ހާލު ވަރަށް ނާޒުކުވެ ހޮސްޕިޓަލުގައި އެޑްމިޓްކޮށް ފަރުވާދޭންފަށައިފިއެވެ.

 ޚާލިދާ ޒިއާއަށް މިހާރު އަންނަނީ އިންޓެންސިވް ކެއަރ (އައިސީޔޫ) ގައި ފަރުވާ ދެމުންނެވެ.

ޒިއާގެ އަމިއްލަ ޑޮކްޓަރު، ޑރ. އޭ. ޒެޑް. އެމް. ޒާހިދު ހުސައިން، ހޮނިހިރު ދުވަހުގެ ރޭ ނޫސްވެރިންނަށް ވިދާޅުވީ، ނޮވެމްބަރު 23 ގައި ޑާކާގެ އެވަރކެއަރ ހޮސްޕިޓަލަށް ގެންދެވުނު ޒިއާ އަށް ފުއްޕާމޭގެ އިންފެކްޝަންގެ އަލާމާތްތަކެއް ފެނިފައިވާ ކަމަށާއި، މިހާރު ދެމުންދާ ފަރުވާ އަށް އޭނާ އިޖާބަދެމުންދާ ކަމަށެވެ.

 ޑރ. ހުސައިން ވިދާޅުވީ، "މި ވަގުތު އަޅުގަނޑަށް ދަންނަވާލެވޭނީ މިދިޔަ ތިން ދުވަހު ވެސް އޭނާގެ ހާލު އެއް ހާލަތެއްގައި ހުރި ކަމަށް. ޑޮކްޓަރުންގެ ބަހުން ނަމަ، އަޅުގަނޑުމެން ބުނާނީ 'އޭނާ ފަރުވާ އަށް އިޖާބަދެމުންދާ' ކަމަށް،" ޑެއިލީ ސްޓާ ނޫހުގައި ރިޕޯޓުކޮށްފައިވެއެވެ.

ޑރ. ހުސައިން މިފަދައިން ވިދާޅުވެފައި ވާއިރު، ޒިއާގެ ބަންގްލަދޭޝް ނޭޝަނަލް ޕާޓީ (ބީއެންޕީ) ގެ ސެކްރެޓަރީ ޖެނެރަލް، މިރްޒާ ފަޚްރުލް އިސްލާމް އަލަމްގީރު، އޭގެ ކުރީ ދުވަހު ނޫސްވެރިންނަށް ވިދާޅުވެފައި ވަނީ އޭނާގެ "ހާލު ވަރަށް ނާޒުކު" ކަމަށެވެ. 

ޑެއިލީ ސްޓާ އިން ރިޕޯޓުކޮށްފައިވާ ގޮތުގައި، ޒިއާ އަށް ހިތުގެ ބަލިތަކާއި، ފުރަމޭ އާއި ގުރުދާގެ މައްސަލަތަކާއި، ހަކުރު ބައްޔާއި، ފުއްޕާމޭގެ މައްސަލަތަކާއި، ހުޅުހުޅު ދުޅަވުމާއި، ލޮލުގެ ބަލިތައް ވެސް ކުރިމަތިވެފައިވެއެވެ. އޭނާގެ ހިތުގައި ދާއިމީ ޕޭސްމޭކަރެއް ވެސް އަޅުވާފައިވާއިރު، މީގެ ކުރިން ހިތުގެ ސްޓެންޓިންގ ވެސް ހަދާފައިވާ ކަމަށް އެ ނޫހުން ބުނެއެވެ.

ބީއެންޕީގެ ނައިބު ޗެއަރމަން އަހުމަދު އަޒަމް ޚާން ވިދާޅުވީ، ޒިއާގެ ހާލު ރަނގަޅުވެއްޖެނަމަ، އިތުރު ފަރުވާ ދިނުމަށްޓަކައި ބޭރަށް ގެންދިއުމަށް ޚާއްސަ އެއަރ އެމްބިއުލާންސެއް ތައްޔާރަށް ހުރި ކަމަށެވެ. ޒިއާގެ ދޮށީ ދަރިކަލުން، ތާރިޤް ރަޙްމާން، ވެސް ވަނީ މަންމަގެ ހާލު ރަނގަޅުވުމަށް އެދި ދުޢާކޮށްދިނުމަށް ބަންގްލަދޭޝްގެ ރައްޔިތުންނަށް ގޮވާލައްވާފައެވެ. ބަންގްލަދޭޝްގެ ވަގުތީ ލީޑަރު، މުޙައްމަދު ޔޫނުސް، ވެސް ވަނީ ބަޔާނެއް ނެރެފައެވެ. އޭނާ ހުކުރު ދުވަހުގެ ރޭ ވިދާޅުވީ، "ޑިމޮކްރަސީ އަށް ބަދަލުވަމުންދާ މި ދަނޑިވަޅުގައި، ޚާލިދާ ޒިއާ އަކީ ޤައުމަށް ވަރަށް ބޮޑު ހިތްވަރެއް ލިބޭ މަސްދަރެއް. އޭނާ ރަނގަޅުވުމަކީ ޤައުމަށް ވަރަށް މުހިންމު ކަމެއް،" ކަމަށެވެ.