Ads by Stelco

ޚަބަރު

ދެކުނު އިރުމަތީ އޭޝިއާ ފެންބޮޑުވުމުގެ ކާރިސާގައި މަރުވި މީހުންގެ އަދަދު 321 އަށް އަރައިފި

ދެކުނު އިރުމަތީ އޭޝިއާ ފެންބޮޑުވުމުގެ ކާރިސާގައި މަރުވި މީހުންގެ އަދަދު 321 އަށް އަރައިފި

އިންޑޮނޭޝިއާގައި ފެންބޮޑުވެފައިވާ ސަރަޙައްދަކުން ވެހިކަލްއެއް ސަލާމަތް ކުރަނީ ފޮޓޯ: އަލްޖަޒީރާ

އާމިނަތު ޔުމްނާ

އާމިނަތު ޔުމްނާ

30 ނޮވެމްބަރު 2025، 11:18

30 ނޮވެމްބަރު 2025، 11:18

ދެކުނު އިރުމަތީ އޭޝިއާގެ ގައުމުތަކަށް ކުރަމުންދިޔަ ވިއްސާރައިގެ ސަބަބުން ބޮޑެތި ފެންބޮޑުވުންތަކުގައި މަރުވި މީހުންގެ އަދަދު ހުކުރު ދުވަހު މަދުވެގެން 321 އަށް އަރައިފިއެވެ. ގަދަވާރެއާއި ތޫފާނާ ގުޅިގެން ހިނގި މި ކާރިސާގައި ގެއްލުން ލިބުނު ސަރަހައްދުތަކުން މީހުން ސަލާމަތްކުރުމާއި، ކަރަންޓާއި މުވާސަލާތީ ހިދުމަތް އަލުން ގާއިމުކުރުމާއި، ކުނިބުންޏާއި ހަލާކުވެފައިވާ ތަކެތި ނެގުމަށް ކަމާބެހޭ ފަރާތްތަކުން ދަނީ ގިނަ މަސައްކަތްތަކެއް ކުރަމުންނެވެ.

ހަފްތާއަކަށްވުރެ ގިނަ ދުވަހު ދެމިގެންދިޔަ މި ކާރިސާގެ އަސަރު އެންމެ ބޮޑަށް ކުރި ގައުމުތަކަކީ އިންޑޮނޭޝިޔާ، ތައިލެންޑް އަދި މެލޭޝިޔާއެވެ. މީގެ އިތުރުން މަލަކާ ސްޓްރައިޓްގާ ނުފެންނަފަދަ ނުރައްކާތެރި ތޫފާނެއް އުފެދުމުގެ ސަބަބުން ވެސް ހާލަތު ވަނީ އިތުރަށް ގޯސްވެފައެވެ. ވަކި ސައިކްލޯނަކާ ގުޅިގެން ސްރީލަންކާއިން ވެސް 46 މީހުން މަރުވެފައިވާ ކަމަށް ވަނީ ރިޕޯޓްކޮށްފައެވެ.

އެންމެ ބޮޑު ގެއްލުމެއް އިންޑޮނޭޝިޔާއަށް

އިންޑޮނޭޝިޔާގެ ސުމަތުރާ ރަށަކީ މި ކާރިސާގައި އެންމެ ބޮޑު ގެއްލުމެއް ލިބުނު ސަރަހައްދެވެ. އެ ރަށުން 174 މީހުން މަރުވެ، 79 މީހުން ގެއްލިފައިވާއިރު، ހާހުން ގިނަ ބަޔަކު ވަނީ ހާލުގައި ޖެހި، ގޯތިގެދޮރު ދޫކޮށް އެހެން ތަންތަނަށް ބަދަލުވެފައެވެ. ޕަޑަންގް ޕަރިޔާމަން ސަރަހައްދުގައި އުނަގަނޑަށް  ވުރެ އުސްކޮށް ފެންބޮޑުވެ، ރައްޔިތުން ވަނީ އެހީއަށާއި ކާނާއަށް އެދި އާދޭސްކޮށްފައެވެ. އެގޮތުން، އޭނާގެ ގެއިން ދެވަނަ ބުރިއަށް އަރައިގެން އުޅޭ މުޙައްމަދު ރައީސް (40އ.) ބުނީ "އަހަރެމެންގެ ކާނާއާއި ބޭނުންވާ ތަކެތި ދަނީ ހުސްވަމުން" ކަމަށެވެ. ބަޓަންގް ތޯރޫގައި، މުވާސަލާތީ ގުޅުންތަކަށް ހުރަސްއެޅި، މަގުތައް ބަންދުވެފައިވާތީ، 7 މީހުން ވަޅުލާފައިވަނީ އެއް ވަޅުގައެވެ.

ތައިލެންޑްގައި 3.5 މިލިއަން މީހުންނަށް އަސަރުކުރި

ތައިލެންޑްގެ ދެކުނުގެ 8 ޕްރޮވިންސުން 145 މީހުން މަރުވެފައިވާއިރު، 3.5 މިލިއަނަށް ވުރެ ގިނަ މީހުންނަށް މި ކާރިސާގެ އަސަރު ވަނީ ކޮށްފައެވެ. އެންމެ ބޮޑު ގެއްލުމެއް ލިބުނު ހެޓް ޔާއީ ސިޓީގައި ހުކުރު ދުވަހު ވެސް  ފެންބޮޑުވެ، ގިނަ ރައްޔިތުންނަށް ކަރަންޓް ނުލިބޭ ކަމަށް ވަނީ ރިޕޯޓްކޮށްފައެވެ. އެއަވަށުގެ ރައްޔިތަކު ބުނީ "އަހަރެންނަށް ހުރިހާ އެއްޗެއް ގެއްލިއްޖެ" ކަމަށެވެ. އަނެއް ބަޔަކު ބުނީ، އެމީހުންގެ ގެތަކަށް ފެންނުވަދެ ހުރި ނަމަވެސް، ވަށައިގެންވާ ސަރަހައްދުތަކުން އެކަހެރިވެފައިވާ ކަމަށެވެ.

މެލޭޝިޔާއިން ރައްޔިތުން ހާލުގައި
މެލޭޝިޔާއަށް ތޫފާނު ސެންޔާ އެރި ނަމަވެސް، އެ ތޫފާނުގެ ސަބަބުން ދެ މީހުން މަރުވެފައިވެއެވެ. ކަމާބެހޭ ފަރާތްތަކުން ވަނީ ކުރިއަށް އޮތް ތަނުގައި ވެސް ގަދަވާރެއާއި ކަނޑު ގަދަވެދާނެ ކަމުގެ އިންޒާރު ދީފައެވެ. މިހާރު ވެސް 30،000 އެއްހާ މީހުން ދަނީ ހާލުގައި ޖެހި އެހީދޭ މަރުކަޒުތަކުގައި ދިރިއުޅެމުންނެވެ. މެލޭޝިޔާގެ ފޮރިން މިނިސްޓްރީން ވަނީ ތައިލެންޑްގެ ފެންބޮޑުވެފައިވާ ހޮޓެލްތަކުގައި ތިބި 1,459 ރައްޔިތުން ސަލާމަތްކޮށްފައިވާ ކަމަށާއި، އިތުރު 300 ރައްޔިތުން ސަލާމަތްކުރުމުގެ މަސައްކަތް ކުރަމުންދާ ކަމަށް ވެސް ހާމަކޮށްފައެވެ.

މި ބޮޑު ކާރިސާއާ ގުޅިގެން ސަރަހައްދީ ގުޅުން ބަދަހިކޮށް، އެހީތެރިކަމަށް އެދުމުގެ ގޮވާލުންތައް ވަނީ އިތުރުވެފައެވެ. ސަރުކާރުތަކުން ދަނީ ކާރިސާއިން ގެއްލުން ލިބުނު މީހުންނަށް އެހީތެރިކަން ފޯރުކޮށްދީ، އިތުރު ފުރާނައެއް ނުގެއްލޭނެ ގޮތެއް ހެދުމަށް އަވަހަށް މަސައްކަތްތައް ކުރަމުންނެވެ.
 

Ads by MSS

މި ލިޔުން ކިޔާލުމުން