ހުޅުމާލެއިން ކުޑަ އަންހެން ކުއްޖަކު ގެއްލިގެން ހޯދަނީ

ހުޅުމާލެ ފޭސް 2 އިން 14 އަހަރުގެ އަންހެން ކުއްޖަކު ގެއްލިގެން ރިޕޯޓްކުރުމާ ގުޅިގެން، އެ ކުއްޖާ ހޯދުމުގެ މަސައްކަތް ފުލުހުން ކުރަންފަށައިފިއެވެ.

ގެއްލިގެން ހޯދަމުންދާ ކުއްޖަކީ ރ. ދުވާފަރު / ސިކްސް ސެންސް، ޝިބާ ރަޝީދު (14އ) އެވެ. ފުލުހުން ބުނެފައިވަނީ މިކަމުގެ މައުލޫމާތު ލިބުމާއެކު ކަމާގުޅުންހުރި ހުރިހާ ބަހާތަކާ ގުޅިގެން ހަރަކާތްތެރިވާން ފަށާފައިވާ ކަމަށެވެ.

ފުލުހުން ހާމަކުރެއްވި ގޮތުގައި، ޝިބާ ގެއްލިފައިވާކަމަށް އާއިލާގެ ފަރާތުން ރިޕޯޓްކޮށްފައިވަނީ ނޮވެމްބަރު 28 ވަނަ ދުވަހުއެވެ. އެ ކުއްޖާ ގެއިން ނުކުމެގެން ދިޔަގޮތަށް ވީނުވީއެއް ނޭނގި ގެއްލިފައިވަނީ 2025 ނޮވެމްބަރު 28 ވަނަ ދުވަހުގެ 05:55 އެހާކަންހާއިރުއެވެ. މައުލޫމާތު ލިބުމާއެކު ކުއްޖާ ހޯދުމަށް ކުރަންޖެހޭ ހުރިހާ މަސައްކަތެއް ވަގުތުން ފަށާފައިވީ ނަމަވެސް، މިހާތަނަށް ކުރެވުނު މަސައްކަތުން ޝިބާ ރަޝީދު ފެނިފައިނުވާކަމަށް ފުލުހުން ހާމަކުރެއެވެ.

އެހެންކަމުން، ޝިބާ ރަޝީދުއާ ބެހޭ އެއްވެސް މައުލޫމާތެއް ލިބިފައިވާ ފަރާތެއްވާނަމަ، އެ މައުލޫމާތު ހުޅުމާލެ ސީރިއަސް ކްރައިމް އިންވެސްޓިގޭޝަންގެ ނަންބަރު 9113900 އަށް ގުޅުއްވައި ހިއްސާކުރެއްވުމަށް ފުލުހުން ވަނީ އިލްތިމާސްކޮށްފައެވެ. މިފަދަ ކަންކަމުގައި އާންމު ރައްޔިތުންގެ އެއްބާރުލުން ވަރަށް މުހިންމު ކަމަށް ފުލުހުން ފާހަގަކުރައްވައެވެ.

ފުލުހުން ވަނީ ގެއްލިފައިވާ ކުއްޖާ ހޯދުމުގެ މަސައްކަތް އިތުރަށް ކުރިއަށް ގެންދާނެ ކަމުގެ ޔަޤީންކަން ދީ، މިފަދަ ކަންކަމުގައި އާންމު ރައްޔިތުންގެ ފަރާތުން ލިބެމުންދާ އެއްބާރުލުން ފާހަގަކޮށް ޝުކުރު ދަންނަވާފައެވެ.