ކުށްވެރިންނަށް ރައްކާތެރިކަން ލިބޭނެ ހުރިހާ ޤާނޫނެއް ރާއްޖޭގައި ހުރީ ހެދިފައި: ވަޒީރު އިޙްސާން

ކުށްތަކަށް އަރައިގަންނަ ކުށްވެރިންނަށް ރައްކާތެރިން ލިބޭނެ ހުރިހާ ޤާނޫނެއް މިރާއްޖޭގައި ހުރީ ހެދިފައި ކަމަށް ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ. 

ވަޒީރު އިޙްސާން މިހެން ވިދާޅުވީ ހިޔާ ފްލެޓްގައި މީހަކު ރަހީނުކޮށްގެން އުޅެނިކޮށް އެމީހާ ސަލާމަތްކުރުމަށް ފުލުހުން ހިންގި އޮޕަރޭޝަންގެ ކަންކަން ކުރިއަށްދިޔަ ގޮތް ބައްލަވައިލެއްވުމަށް އެތަނަށް ވަޑައިގެން ނޫސްވެރިންނާއި ވާހަކަދައްކަވަމުންނެވެ. 

ވަޒީރު އިޙްސާން ވިދާޅުވީ ރާއްޖޭގެ ގާނޫނުތައް ހަދާފައިހުރީ ކުށްވެރިން ރައްކާތެރިކުރާ ގޮތަށް ކަމަށާއި ކުށްވެރިންނަށް އަދަބުދީ، ކުށްތައް ހުއްޓުވަން ފުލުހުންނަށް އުނދަގޫތައް އެބަހުރިކަމަށެވެ.

ކުށް ކުރާ ފަރާތްތައް ސަލާމަތް ކުރުމަށްޓަކައި ހެދެން އޮތް ހުރިހާ ޤާނޫނެއް ހަދައިގެން މި ތިބީ، އެހެން ނަމަވެސް ކުށް ހުއްޓުވަން އުޅޭ ފަރާތްތަކުން އަދި ކުށުގެ ވެށިން މީހުން ސަލާމަތް ކުރަން އުޅޭ ފަރާތްތައް ދުރުކުރުމަށްޓަކައި ކުށަށް ނުދާނެ ގޮތަށް ގާނޫނުތައް ބައްޓަން ކުރުމުގެ އެހާ ބޮޑު ވިސްނުމެއް އޮތް ކަމަކަށް ނުފެނޭ

ދާޚިލީ ވަޒީރު އިޙްސާން ވިދާޅުވިއެވެ.

ވަޒީރު ވިދާޅުވީ އެކަން ބަދަލުކުރަން މިސަރުކާރުން ޤާނޫނުތަކަށް ބަދަލު ގެންނާނެ ކަމަށެވެ. އަދި އެބަދަލު ތަކަކީ މިހާރު ރާއްޖޭގައި އޮތް ކުށުގެ ވެށި ނައްތާލުމަށް ގެނެވޭނެ ބަދަލުތަކެއް ކަމަށެވެ. މީގެއިތުރުން ކުށްވެރިންނާއު ކުރިމަތިލައި ކުށްތައް ހުއްޓުވޭނެ ވަޞީލަތްތައް މިހާރުވެސް ދިވެހި ފުލުހުންގެ އަތުގައި އެބަހުރިކަމަށާއި ނެތި ޤާނޫނީ ގޮތުން ލިބެން ޖެހޭ ބާރު ކަމަށް ވަޒީރު އިޙްސާން ވިދާޅުވިއެވެ.

ދާޚިލީ ވަޒީރު އިޙްސާން ވިދާޅުވީ މައުސޫމް މީހަކަށް ކުށެއްގެ އަދަބު ދެވިދާނެތީ، އެ އޮންނަ ރައްކާތެރިކަމާއި ހައްޤުތަކަކީ ކޮންމެވެސް އޮންނަން ޖެހޭ ކަމެއް ކަމަށާއި ނަމަވެސް، އެކަން ރާއްޖޭގައި މިހާރު އޮތީ މާބޮޑަށް ފުޅާވެފައި ކަމަށެވެ.