Ads by Stelco

ޚަބަރު

ފުވައްމުލަކުގައި ޤަވާއިދާ ޚިލާފަށް އުޅޭ ބިދޭސީން ހޯދުމަށް އޮޕަރޭޝަނެއް ކުރިއަށްގެންދަނީ

ފުވައްމުލަކުގައި ޤަވާއިދާ ޚިލާފަށް އުޅޭ ބިދޭސީން ހޯދުމަށް އޮޕަރޭޝަނެއް ކުރިއަށްގެންދަނީ

ޤަވާއިދާ ޚިލާފަށް އުޅޭ ބިދޭސީން ހޯދުމުގެ އޮޕަރޭޝަނެއް

ޙަސްނާ އަޙްމަދް

ޙަސްނާ އަޙްމަދް

30 ނޮވެމްބަރު 2025، 01:13

30 ނޮވެމްބަރު 2025، 01:13

ފުވައްމުލަކު ސިޓީގައި ޤަވާއިދާ ޚިލާފަށް ދިރިއުޅޭ ބިދޭސީންގެ މައްސަލަ ހައްލުކޮށް، ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމުގެ މަގުސަދުގައި، އެ ސިޓީގައި ބިދޭސީން ދިރިއުޅޭ ތަންތަން ބަލައިފާސްކުރުމުގެ ޚާއްސަ ހަރަކާތެއް ފަށައިފިއެވެ. 

މި ހަރަކާތަކީ ފުވައްމުލައް ސިޓީ ކައުންސިލާއި، މޯލްޑިވްސް ޕޮލިސް ސާވިސް އަދި މޯލްޑިވްސް އިމިގްރޭޝަން ގުޅިގެން ކުރިއަށް ގެންދާ އޮޕަރޭޝަނެކެވެ.

މި އޮޕަރޭޝަންގެ ދަށުން ބިދޭސީން ދިރިއުޅެމުން އަންނަ ތަންތަނުގެ ރައްކާތެރިކަން ކަށަވަރުކުރުމުގެ ގޮތުން އިއްޔެ ވަނީ 13 ގެއެއް ބަލައިފާސްކޮށްފައެވެ. މިގޮތުން، އެ ތަންތަނުގައި ދިރިއުޅޭ ބިދޭސީންނަކީ ސައްޚަ ވިސާއެއްގެ ދަށުން ޤަވާއިދާ އެއްގޮތަށް ދިރިއުޅޭ ފަރާތްތަކެއްތޯ ވެސް ވަނީ ބަލާފައެވެ.

 މި ހަރަކާތުގެ މައިގަނޑު މަޤްސަދަކީ ފުވައްމުލަކުގައި ޤަވާއިދާ ޚިލާފަށް އުޅޭ ބިދޭސީންގެ މައްސަލައަށް އަވަސް ހައްލެއް ހޯދުމެވެ.

އޮޕަރޭޝަންގެ އަސާސީ ބޭނުންތަކުގެ ތެރޭގައި، ޤަވާއިދާ ޚިލާފަށް ބިދޭސީން ދިރިއުޅޭ ތަންތަނުން އާންމު ޞިއްޙަތަށް ނުރައްކާ ވާފަދަ ކަންކަން މަދުކުރުން ހިމެނެއެވެ. އަދި ރައްޔިތުންނަށް ދިރިއުޅުމަށް ރައްކާތެރި މާހައުލެއް ކަށަވަރުކޮށްދިނުމަކީ ވެސް މި ހަރަކާތުގެ މުހިންމު އެއް މަޤްސަދެވެ.

ފުވައްމުލަކުގައި ފެށި މި ހަރަކާތަކީ މޯލްޑިވްސް އިމިގްރޭޝަނުން މާލެ ސަރަހައްދުގެ އިތުރުން ރާއްޖޭގެ އެކި ހިސާބުތަކުގައި ޤަވާއިދާ ޚިލާފަށް އުޅޭ ބިދޭސީން ހޯދައި، ގާނޫނީ ފިޔަވަޅު އެޅުމަށް ހިންގަމުންދާ ޤައުމީ މަސައްކަތް ކަމަށްވާ "އޮޕަރޭޝަން ކުރަނގި" ގެ ބައެކެވެ. އިމިގްރޭޝަނުން މިހާރު ވެސް އަންނަނީ ޤަވާއިދާ ޚިލާފަށް ރާއްޖޭގައި އުޅޭ ބިދޭސީން މޮނިޓަރުކުރުމަށް މާލޭގެ އާންމު ތަންތަނުގައި އޮފިސަރުން ލައްވާ އޮބްޒާވޭޝަން މަސައްކަތްތައް ކުރިއަށް ގެންދަމުންނެވެ.

މި އަހަރުގެ ތެރޭގައި ހިންގި ރެއިޑް އޮޕަރޭޝަންތަކުގައި މިހާތަނަށް ގިނަ އަދަދެއްގެ ބިދޭސީން ވަނީ ހައްޔަރުކޮށްފައެވެ. އަދި މި މައްސަލަތަކާ ގުޅިގެން ޑިޕޯޓޭޝަން ސެންޓަރުގައި ބަންދުކުރެވޭ ފަރާތްތައް އެ މީހުންގެ ޤައުމުތަކަށް ފޮނުވުމުގެ މަސައްކަތް ވެސް ދަނީ ބާރަށް ކުރިއަށެވެ. ފުވައްމުލަކުގެ މި އޮޕަރޭޝަނަކީ ވެސް ޤަވާއިދާ ޚިލާފު ބިދޭސީންގެ މައްސަލަ ހައްލުކުރުމަށް ކުރެވޭ އެދެވޭ މަސައްކަތެކެވެ.

 

 

Ads by MSS

މި ލިޔުން ކިޔާލުމުން