ކުޅިވަރު

ކުޅިވަރުގެ ދާއިރާއިން ގުޅިގެން މަސައްކަތްކުރުމަށް ދިވެހިރާއްޖެ އާއި ތައިލެންޑާ އެއްބަސްވެއްޖެ

ކުޅިވަރުގެ ދާއިރާއިން ގުޅިގެން މަސައްކަތްކުރުމަށް ދިވެހިރާއްޖެ އާއި ތައިލެންޑާ އެއްބަސްވެއްޖެ

ކުޅިވަރުގެ ދާއިރާއިން ގުޅިގެން މަސައްކަތްކުރުމަށް ދިވެހިރާއްޖެ އާއި ތައިލެންޑާ ދެމެދު އެއްބަސްވުމުގައި ސޮއިކުރުން / ފޮޓޯ: ކުޅިވަރުގެ ވުޒާރާ

farudhun logo

ފަރުދުން

30 ނޮވެމްބަރު 2025، 08:10

30 ނޮވެމްބަރު 2025، 08:10

ކުޅިވަރުގެ ދާއިރާއިން ގުޅިގެން މަސައްކަތްކުރުމަށް ދިވެހިރާއްޖެ އާއި ތައިލެންޑާ ދެމެދު އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގައި ސޮއިކޮށްފައި ވަނީ، މިކަމަށްޓަކައި މި މަހުގެ 27 ވަނަ ދުވަހު ތައިލޭންޑުގައި ބޭއްވި ޚާއްސަ ރަސްމިއްޔާތެއްގައެވެ. މި ރަސްމިއްޔާތުގައި ރާއްޖެއިން ތައިލެންޑަށް ކަނޑައަޅުއްވާފައި ހުންނަވާ ސަފީރު، ފުވާދު ތައުފީޤު ހިމެނޭހެން ރާއްޖޭގެ ވަފުދެއް ބައިވެރިވެވަޑައިގެންނެވިއެވެ.

ތައިލެންޑްގެ ކުޅިވަރު ވުޒާރާގައި ކުރިއަށްދިޔަ މި ރަސްމިއްޔާތުގައި ދިވެހި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ރާއްޖޭގެ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއެވެ. އަދި ތައިލެންޑް ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ އެ ޤައުމުގެ ފަތުރުވެރިކަމާއި ކުޅިވަރާއި ބެހޭ ވަޒީރު ޕަތުޕޮންގު ޕޮންގުސަކުލްއެވެ. 

ތައިލެންޑުގެ ފަރާތުން މި ރަސްމިއްޔާތުގައި ބައިވެރިވެވަޑައިގެންނެވި ވަފުދުގައި އެ ޤައުމުގެ ޚާރިޖީ ވުޒާރާގެ ބޭފުޅުންނާއި، ޑިޕާޓްމަންޓް އޮފް ފިޒިކަލް އެޑިއޭޝަންގެ އިސްފަރާތްތަކުގެ އިތުރުން، ނެޝަނަލް ސްޕޯޓްސް ޔުނިވަރސިޓީ އަދި ތައިލެންޑްގެ ކުޅިވަރު އޮތޯރިޓީގެ ބޭފުޅުން ހިމެނެއެވެ.

ރާއްޖެ އާއި ތައިލެންޑާއި ދެމެދު ވެވުނު މި އެއްބަސްވުމުގެ ސަބަބުން، ކުޅިވަރުގެ ދާއިރާގެ މުވައްޒަފުން ބަދަލުކުރުމާއި ތަރައްޤީކުރުމުގެ އިތުރުން، ކުޅިވަރުގެ ތަމްރީނާއި ކުޅިވަރުގެ ދާއިރާއިން ޒުވާނުން ތަރައްޤީކުރުމުގެ ޕްރޮގްރާމްތައް ހިންގުން ހިމެނެއެވެ. 

އަދި ކުޅިވަރުގެ ވަސީލަތްތަކާއި ފެސިލިޓީތައް ތަރައްޤީކުރުމާ ގުޅޭ ކަންކަން ވެސް މި އެއްބަސްވުމުގައި ހިމެނެއެވެ. 

މީގެ އިތުރުން، މި އެއްބަސްވުމުގެ ދަށުން ތައިލެންޑްގެ ޑިޕާޓްމަންޓް އޮފް ފިޒިކަލް އެޑިއުކޭޝަނާއި، ސްޕޯޓްސް އޮތޯރިޓީ އޮފް ތައިލެންޑް އަދި އެ ޤައުމުގެ ނެޝަނަލް ސްޕޯޓްސް ޔުނިވަރސިޓީގެ ފަރާތުން ރާއްޖެއަށް އެހީތެރިކަން ފޯރުކޮށްދިނުމަށްވަނީ ހަމަޖެހިފައެވެ.

Ads by MSS

މި ލިޔުން ކިޔާލުމުން