ލަންކާގައި އެހީގެ މަސައްކަތުގައި އުޅެނިކޮށް އެއާރ ފޯސްގެ ހެލިކޮޕްޓަރެއް ވެއްޓި ޕައިލެޓު މަރުވެއްޖެ

ސްރީ ލަންކާއަށް މިހާރު ކުރިމަތިވެފައިވާ ތޫފާނާއި ގުޅިގެން، ހާލުގައި ޖެހިފައިވާ ފަރާތްތަކަށް އެހީވުމުގެ މަސައްކަތުގައި ހަރަކާތްތެރިވަމުން ދަނިކޮށް، ލަންކާ އެއާރ ފޯސްގެ ހެލިކޮޕްޓަރެއް ވެއްޓި ޕައިލެޓު މަރުވެއްޖެއެވެ.

ސްރީ ލަންކާ އެއާރ ފޯސް ބެލް 212 ހެލިކޮޕްޓަރު ވެއްޓުނީ ލުނުވިލާ އާއި ވެއްނަޕުވާ ކިޔާ ސަރަޙައްދެއްގެ ކައިރިޔަށެވެ. މި ހާދިސާގައި އެ ހެލިކޮޕްޓަރުގައި ތިބި މީހުން ފިޔަވާ، އިތުރު މީހަކަށް އަނިޔާވެފައެއް ނުވެއެވެ. 

މިއަދު ހަވީރު އެ ހެލްކޮޕްޓަރު ވެއްޓުނުއިރު އޭގައި ފަސް މީހުން ތިއްބެވެ. މި ހާދިސާގައި މަރުވެފައި ވަނީ ހެލިކޮޕްޓަރު ދުއްވަން އިން ވިންގް ކޮމާންޑާރ ސިޔަމްބަލަޕިޓިޔާއެވެ. އެ ހެލިކޮޕްޓަރުގައި ދެން ތިބި މީހުންނަށް ލިބުނު އެކިވަރުގެ އަނިޔާތަކަށް އަންނަނީ މަރަވިލާ ބޭސް ހޮސްޕިޓަލުގައި ފަރުވާ ދެމުންނެވެ.

Sri Lanka Air Force Bell 212 helicopter engaged in disaster relief operations has crash landed in an area between Lunuwila and Wennappuwa pic.twitter.com/dn2trxfoPs

— NewsWire 🇱🇰 (@NewsWireLK) November 30, 2025

މި ހާދިސާ ހިނގަން މެދުވެރިވި ސަބަބު އަދި ހޯދިފައިނުވާއިރު، ސޯޝަލް މީޑިއާގައި ދައުރުވާ ވީޑިއޯތަކުން ފެންނަ ގޮތުގައި، އެ ހެލިކޮޕްޓަރު ވެއްޓުނީ ކޮންޓްރޯލުން ނެއްޓިގެންނެވެ. 

މިދިޔަ ބުދަ ދުވަހުން ފެށިގެން ތޫފާން ދިތުވާގެ ސަބަބުން ސްރީ ލަންކާއަށް ވަނީ އާދަޔާ ޚިލާފަށް ގިނަ މިންވަރަކަށް ވާރޭ ވެހި ފެން ބޮޑުވުމާއި ބިންގަނޑު ކަނޑައިގެން ދިޔުމުގެ ހާދިސާތައް ކުރިމަތިވެފައެވެ.  އެ ޤައުމުގެ ޙާލަތު ގޯސްވެ ކުއްލި ނުރައްކަލުގެ ޙާލަތު އިޢުލާނުކޮށްފައިވާއިރު ތޫފާނުގެ ސަބަބުން އެ ޤައުމުގައި މަރުވި މީހުންގެ ޢަދަދު ވަނީ 334އަށް އަރާފައެވެ. އަދި އަދި ވީނުވީއެއް ނޭނގި 370 މީހުން ގެއްލިފައި ވެއެވެ.