"ހިޔާވަހި ޕޯޓަލް" މެދުވެރިކޮށް މިއަދުން ފެށިގެން ހައުސިންގ ލޯނަށް ހުށައެޅޭނެ!

 ބޯހިޔާވަހިކަމަށް ގެދޮރު އިމާރާތްކުރުމަށް ފަސް ޕަސެންޓުގެ އިންޓަރެސްޓަށް ވުރެ ބޮޑު ނޫން އިންޓަރެސްޓު ރޭޓުގައި ދޭ ލޯނަށް، "ހިޔާވަހި ޕޯޓަލް" މެދުވެރިކޮށް މިއަދުން ފެށިގެން އެދެވޭނެ ކަމަށް ގެދޮރުވެރިކަމާ ބިމާއި ޢުމްރާނީ ތަރައްޤީއާ ބެހޭ ވުޒާރާއިން ބުނެފިއެވެ. 

ގެދޮރުވެރިކަމާ ބެހޭ ވުޒާރާއިން އެކްސްގައި ކުރި ޕޯސްޓެއްގައި ބުނެފައިވަނީ “ހިޔާވެހި ޕޯޓަލް” މެދުވެރިކޮށް، ހިޔާވެހި ފައިނޭންސިން ޕްރޮގްރާމްގައި މިއަދުން ފެށިގެން ބައިވެރިވެވޭނެ ކަމަށެވެ. އަދި މި ޕޯޓަލްއަށް އީފާސް މެދުވެރިކޮށް ލޮގްއިން ވެވޭނެކަމަށްވެސް ވަނީ ބުނެފައެވެ. 

ގެދޮރު އިމާރާތްކުރުމަށް 5 އިންސައްތައިގެ އިންޓަރެސްޓް ރޭޓެއްގައި ލޯނު ދޫކުރާ "ހިޔާވަހި ފައިނޭންސިން ޕްރޮގްރާމް" ރަސްމީކޮށް ފައްޓަވާފައިވަނީ މިމަހު 5 ވަނަ ދުވަހުއެވެ.

މި ޕްރޮގްރާމް ހިންގުމަށް ސަރުކާރުން ވަނީ ތިން ބޭންކަކާ ގުޅިގެން މަސައްކަތް ފަށާފައެވެ. އެއީ:-

1.  ހައުސިންގ ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ)،
2.  ބޭންކް އޮފް މޯލްޑިވްސް (ބީއެމްއެލް) އަދި
3.  މޯލްޑިވްސް އިސްލާމިކް ބޭންކް (އެމްއައިބީ) އެވެ.

މި ޕްރޮގްރާމްގެ ދަށުން ލޯނު ދޫކުރެވޭނީ ތިން ކެޓަގަރީއަކަށެވެ. 

ފުރަތަމަ ކެޓަގަރީއަކީ ހިޔާވަހި ރަށްވެހި ކެޓަގަރީއެވެ. މި ކެޓަގަރީގެ ދަށުން ރަށްރަށުގައި ގެދޮރު އިމާރާތްކުރުމަށް 1 މިލިއަން ރުފިޔާއާ ހަމައަށް އެޗްޑީއެފްސީ މެދުވެރިކޮށް ލޯނު ދޫކުރެވޭނެ މި ލޯނަށް އިކުއިޓީ ބޭނުމެއް ނުވެއެވެ. ނަމަވެސް ވުޒާރާއިން ކަނޑައަޅާ އަގެއްގައި ބަންޑާރަ ގޯތި މިލްކުކުރަން ފީއެއް ދައްކަން ޖެހޭނެއެވެ.

މި ލޯނު ދޫކުރަނީ 25 އަހަރުން އަނބުރާ ދައްކާ ގޮތަށް %5 އިންޓަރެސްޓްގައެވެ.

ދެވަނަ ކެޓަގަރީއަކީ ހިޔާވަހި ސަހަރު ކެޓަގަރީއެވެ. މި ކެޓަގަރީގެ ދަށުން އާބާދީ ބޮޑެތި އާބަން ސެންޓަރުތަކުގައި ގެދޮރު އިމާރާތްކުރުމަށް 3 މިލިއަން ރުފިޔާއާ ހަމައަށް ބީއެމްއެލް އަދި އެމްއައިބީ މެދުވެރިކޮށް ލޯނު ދޫކުރެވޭނެއެވެ.

މި ލޯނު ދޫކުރަނީ 25 އަހަރުން އަނބުރާ ދައްކާ ގޮތަށް %5 އިންޓަރެސްޓްގައެވެ.

ތިންވަނަ ކެޓަގަރީއަކީ ހިޔާވަހި ފުރަ މާލެއެވެ. މި ކެޓަގަރީގެ ދަށުން ގްރޭޓަރ މާލެ ސަރަޙައްދުގައި ގެދޮރު އިމާރާތްކުރުމަށް 6 މިލިއަން ރުފިޔާއާ ހަމައަށް ބީއެމްއެލް އަދި އެމްއައިބީ މެދުވެރިކޮށް ލޯނު ދޫކުރެވޭނެއެވެ.

މި ލޯނަށް އިކުއިޓީއަށް 10% ނަގާއިރު، މިއީވެސް %5 އިންޓަރެސްޓްގައި 25 އަހަރުން އަނބުރާ ދައްކާ ގޮތަށް ދޫކުރެވޭ ލޯނެކެވެ.

މި ސްކީމުގެ ދަށުން 600 އަކަފޫޓަށް ވުރެ ކުދި ބިންތައް އެއްކޮށްލައިގެން ގެ ހަދަން ވެސް ލޯނު ދުކުރާނެވެ. އެގޮތަށް ދޫކުރާ ލޯނުގައި 6 މިލިއަން ރުފިޔާގެ އިތުރަށް އިތުރުކުރާ ކޮންމެ ބިމަކަށް 1 މިލިއަން ރުފިޔާ ލިބޭއިރު މިގޮތުން ޖުމްލަ ދޫކުރާނީ 10 މިލިއަން ރުފިޔާ އެވެ.

ސަރުކާރުން މަޢުލޫމާތު ދެއްވާފައިވާ ގޮތުގައި މި ޕްރޮގްރާމްގެ މަޤްޞަދަކީ މާލީ ދަތިކަމުގެ ސަބަބުން ގެދޮރު އިމާރާތްކުރަން ނުފެށިފައިވާ ނުވަތަ ފަށައިގެން ނުނިމި ހުރި ފަރާތްތަކަށް އެހީތެރިވުމެވެ. އަދި މާލޭގެ ތޮއްޖެހިފައިވާ ސަރަޙައްދުތަކުގައި ކުދި ގޯތިތައް އެއްކޮށްގެން ގެދޮރު އިމާރާތްކުރުމަށްވެސް މި ޕްރޮގްރާމުން އެހީތެރިކަން ފޯރުކޮށްދޭނެއެވެ.