ހުޅުމާލެއިން ގެއްލިގެން ހޯދަމުން ދިޔަ ކުޑަ އަންހެން ކުއްޖާ ފެނިއްޖެ

ހުޅުމާލޭ ފޭސް-2އިން ގެއްލިގެން ހޯދަމުން ދިޔަ ކުޑަ އަންހެން ކުއްޖާ ފެނިފައިވާކަމަށް ދިވެހި ފުލުހުންގެ ޚިދުމަތުން ހާމަކޮށްފިއެވެ.

ރ. ދުވާފަރަށް ނިސްބަތްވާ އުމުރުން 14 އަހަރުގެ ޝިބާ ރަޝީދު ވީނުވީއެއް ނޭންގި ގެއްލިފައިވާކަމަށް އާއިލާގެ ފަރާތުން ފުލުހުންނަށް ރިޕޯޓްކޮށްފައިވަނީ ނޮވެމްބަރު 28 ވަނަ ދުވަހުއެވެ. އެ ރިޕޯޓުގައި ބުނެފައިވާ ގޮތުގައި، އެ ދުވަހުގެ 05:55 ހާއިރު ގެއިން ނިކުމެގެން ދިޔަ ގޮތަށް އޭނާ ގެޔަށް އައިސްފައެއް ނުވެއެވެ. 

އަދި އެ ރިޕޯޓު ލިބުމާ ގުޅިގެން ފުލުހުންގެ އެކި ބަހާތައް ގުޅިގެން ކުއްޖާ ހޯދުމުގެ މަސައްކަތް ފެށައިގެން ކުރިޔަށް ގެންދިޔަކަމަށް ފުލުހުން ހާމަކޮށްފައިވެއެވެ.

އަދި މީސްމީޑިއާގައި އެ ކުއްޖާގެ ވަނަވަރު ހާމަކުރިފަހުން، އާދީއްތަ ދުވަހުގެ ވަގުތެއްގައި އެ ކުއްޖާ އަމިއްލައަށް ގެޔަށް ގޮސްފައިވާކަމުގެ މަޢުލޫމާތު ފުލުހުންނަށް ލިބިފައިވާކަމަށް ފުލުހުން ވަނީ ހާމަކޮށްފައެވެ. 

އެ ކުއްޖާ ގެޔަށް ދިޔައިރު ހާލު ރަނގަޅުކަމަށް ވެސް ފުލުހުން ހާމަކުރިއެވެ.