ރައްޔިތުން ކަންބޮޑުވާން ޖެހޭފަދަ ބަދަލެއް އާސަންދަ އަކަށް ނާންނާނެ: ވަޒީރު ނާޒިމް

ރައްޔިތުން ކަންބޮޑުވާން ޖެހޭފަދަ ބަދަލެއް އާސަންދަ ނިޒާމަށް ނާންނާނެ ކަމަށް ޞިއްޙީ ވަޒީރު ޢަބްދުﷲ ނާޒިމް އިބްރާހިމް ވިދާޅުވެއްޖެއެވެ. 

ޞިއްޙީ ވަޒީރު ނާޒިމް މިހެން ވިދާޅުވީ ރޭ ހުޅުވިގެން ދިޔަ “ހެލްތް އެކްސްޕޯ 2024” ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. 

ޞިއްޙީ ވަޒީރު ނާޒިމް ވިދާޅުވީ ޤައުމެއްގެ އެންމެ ބޮޑު ރައުސުލްމާލަކީ ދުޅަހެޔޮ އާބާދީއެއް އޮތުން ކަމަށާއި، އެހެންކަމުން އަބަދު ބަލިމަޑުކަމެއްގެ ފަހަތުން ދުވެވެން ނެތް ސިއްޙީ ނިޒާމެއް ޤާއިމްކުރުމަށް ސަރުކާރުން މަސައްކަތްކުރަމުންދާކަމަށެވެ. އަދި އެގޮތަށް ދުވާކަމަށްވަންޔާ ޞިއްޙީ ނިޒާމު ވާނީ ވަރުބަލި ކަމަށާއި، އޭރުންވާނީ ބަލި މަޑުކަމާއި އެއްވަރަށް ފައިހަމަ ނުކުރެވޭނެ ނިޒާމަކަށް ކަމަށްވެސް ވަޒީރު ވިދާޅުވިއެވެ. އަދުގެ ސަރުކާރުން ދަނީ ދުޅަހެޔޮ ޞިއްޙަތެއްގައި ތިބުމަށް އަޅަން ޖެހޭ އުދަނގޫ ފިޔަވަޅުތައް އަޅަމުން ކަމަށްވެސް ވަޒީރު ނާޒިމް ވިދާޅުވިއެވެ.

ނާޒިމް ވިދާޅުވީ އާސަންދަ ނިޒާމަ ހަރުދަނާ ބަދަލުތައް ގެނެސްގެން މެނުވީ ރާއްޖޭގެ ޞިއްޙީ ނިޒާމުގެ ތެރެއިން ރައްޔިތުންނަށް ފޯރުކޮށްދޭ ޚިދުމަތްތައް އެންމެ ރަނގަޅުގޮތުގައި ފޯރުކޮށް ނުދެވޭނެކަމަށެވެ.

އާސަންދަ ނިޒާމް އިޞްލާޙުކުރުމުގެ މަސައްކަތް ކުރެވެމުންދަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ބެއްލެވުމާއި އިރުޝާދުގެ ދަށުން ކަމަށާއި، މި ނިޒާމު ވެގެންދާނީ ރައްޔިތުންނަށް އުއްމީދު ގެނެސްދޭ ނިޒާމަކަށް ކަމުގެ ޔަޤީންކަން ވަޒީރު ދެއްވިއެވެ.

ރައްޔިތުންނަށް ބަރުހެލިކަމެއް ނެތި ދެމެހެއްޓެނި ގޮތެއްގައި ސިއްހީ ނިޒާމު ކުރިއަށްގެންދިޔުމަށް މަގުފަހިކޮށްދޭ ނިޒާމަކަށް، އަޅަގަނޑު މިރޭ ޔަޤީންކޮށްދޭން ބޭނުންވަނީ މި ސްކީމަށް ގެންނަ ބަދަލަކުން ރައްޔިތުން ކަންބޮޑުވާން ޖެހޭ އެއްވެސް ކަމެއް ނާންނާނެ

ވަޒީރު ނާޒިމް ވިދާޅުވިއެވެ.

ވަޒީރު ވިދާޅުވީ މި ނިޒާމުގައި ހުރި މައްސަލަތައް ހައްލުކުރަން ޖެހޭކަމަށާއި މި ނިޒާމު ހަރުދަނާ ކުރުމަށް ފަންނީ މާހިރުންގެ ލަފާވެސް ހޯދާފައިވާ ކަމަށެވެ. އަދި މިކަމަށް މިހާރު ފިޔަވަޅު ނާޅައިފި ނަމަ ފަހުން އުފުލަންޖެހޭ ބުރަ މާ ބޮޑުވާނެ ކަމަށްވެސް ޞިއްޙީ ވަޒީރު ޢަބްދުﷲ ނާޒިމް އިބްރާހީމް ވިދާޅުވިއެވެ.