މާލެ ސަރަޙައްދުގެ ސަރުކާރު ހޮސްޕިޓަލްތަކުގެ އޮޕަރޭޝަން ތިއޭޓަރުތައް އިތުރުކުރަނީ

މިއަހަރު ނިމުމުގެ ކުރިން މާލެ ސަރަޙައްދުގެ ސަރުކާރުގެ ހޮސްޕިޓަލްތަކުގެ އޮޕަރޭޝަން ތިއޭޓަރުތަކުގެ އަދަދު 12 އަށް އިތުރުކުރެވޭނެކަމަށް ދަރުމަވަންތަ ހޮސްޕިޓަލްގެ ސީއީއޯ އިބްރާހީމް އަބްދުއްރައްޒާގު ޙަލީމް ވިދާޅުވެއްޖެއެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އިބްރާހީމް އަބްދުއްރައްޒާގު ޙަލީމް ވިދާޅުވީ މިވަގުތު އައިޖީއެމްއެޗްއާއި ދަރުމަވަންތަ ހޮސްޕިޓަލްގައި ޚިދުމަތް ދެމުން ގެންދަނީ 4 އޮޕަރޭޝަން ތިއޭޓަރުގައި ކަމަށެވެ. ނަމަވެސް އައިޖީއެމްއެޗްގެ ބެޑް ކެޕޭސިޓީ އިތުރުވުމާއެކު އެ އަދަދު 8 އަށް އަރާނެކަމަށް އޭނާ ވިދާޅުވިއެވެ.

މީގެއިތުރުން ހުޅުމާލޭގައި ބޮޑު އާބާދީއެއް އޮތް އިރުވެސް މިހާތަނަށް ހުޅުމާލެ ހޮސްޕިޓަލްގައި އައިސީޔޫއެއް ނެތްކަން އަބްދުއްރައްޒާގު ޙަލީމް ފާހަގަކުރެއްވިއެވެ. ނަމަވެސް ހުޅުމާލެ ހޮސްޕިޓަލް ތަރައްޤީ ކުރުމުގެ މަސައްކަތުގެ ތެރެއިން 4 އޮޕަރޭޝަން ތިއޭޓަރާއި 14 އެނދުގެ އެންއައިސީޔޫއަކާއި 10 އެނދުގެ އައިސީޔޫއެއް ތަރައްޤީކުރުމުގެ މަސައްކަތް ހިނގަމުން އަންނަކަމަށް އޭނާ ވިދާޅުވިއެވެ.

"ހުޅުމާލެ ހޮސްޕިޓަލްގައިވެސް ވަރަށް ބޮޑެތި ޑިވެލޮޕްމަންޓްތަކެއް އެބަ އާދޭ. ކުރިއަށް އޮތް މަދު ދުވަސްތަކުގެ ތެރޭގައި އެ މަޝްރޫޢުތައްވެސް ނިންމާ ޚިދުމަތް ދޭނަން،" އޭނާ ވިދާޅުވިއެވެ.

އައިޖީއެމްއެޗްގެ ތަފާސް ހިސާބުތައް ދައްކާގޮތުން އިމަޖެންސީއާއި ޖެނެރަލް ޕްރެކްޓިސް ނުވަތަ އާންމު ބަލިތަކަށް ޑޮކްޓަރަށް ދެއްކުމަށް މީހުން ޒިޔާރަތްކޮށްފައިވާ އަދަދު އުޅެނީ 150،000 އަށްވުރެ މަތީގައެވެ. އަދި އޯޕީޑީ ކޮންސަލްޓޭޝަންގެ ޚިދުމަތް ހޯދުމަށް މީހުން ޒިޔާހުން ޒިޔާރަތްކޮށްފައިވާ އަދަދު އުޅެނީ 240،000 ގައެވެ. ހުޅުމާލެ ހޮސްޕިޓަލަށް ޑޮކްޓަރަށް ދެއްކުމަށް މީހުން ޒިޔާރަތްކޮށްފައިވާ އަދަދު އުޅެނީ 238،000 އަށްވުރެ މަތީގައެވެ.

މި ޚިދުމަތްތައް އިތުރަށް ފުޅާކޮށް، ލުއިފަސޭހަކުރުމުގެ ގޮތުން މާލޭގެ 4 ސަރަޙައްދެއްގައި ސަރުކާރުގެ ޖެނެރަލް ޕްރެކްޓިސް (ޖީޕީ) ނުވަތަ އާއްމު ބަލިތަކަށް ފަރުވާ ދިނުމަށް ކްލިނިކްތަކެއް ޤާއިމްކުރުމުގެ މަސައްކަތްވެސް ވަނީ ފަށާފައިކަން އިބްރާހީމް އަބްދުއްރައްޒާގު ޙަލީމް ފާހަގަކުރެއްވިއެވެ.

މި ހުރިހާ މަސައްކަތްތަކެއް ކުރަމުން މިދަނީ އައިޖީއެމްއެޗަށް ބާރުބޮޑުވާ މައްސަލައަށް ހައްލެއް ހޯދުމަށާއި، ރައްޔިތުންނަށް ފަސޭހައިން އަދި އަވަހަށް ޞިއްޙީ ޚިދުމަތް ލިބޭނެ މަގު ތަނަވަސްކޮށްދިނުމަށް

އިބްރާހީމް އަބްދުއްރައްޒާގު ޙަލީމް ވިދާޅުވިއެވެ.

މި ތަރައްޤީގެ މަސައްކަތްތަކުގެ ސަބަބުން، ކުރިއަށް އޮތް ތަނުގައި މާލެ ސަރަޙައްދުގެ ސަރުކާރު ހޮސްޕިޓަލްތަކުގެ ޚިދުމަތްތައް އިތުރަށް ފުޅާވެ، ރައްޔިތުންނަށް ލިބޭ ޞިއްޙީ ޚިދުމަތުގެ ފެންވަރު މަތިވެގެންދާނެކަމަށް އުއްމީދު ކުރެވެއެވެ. ޚާއްޞަކޮށް އޮޕަރޭޝަން ތިއޭޓަރުތަކުގެ އަދަދު އިތުރުވުމާއެކު، އޮޕަރޭޝަންތަކަށް މާގިނަ ދުވަސްތަކެއް ވަންދެން މަޑުކުރަން ޖެހޭ މައްސަލައަށް ހައްލެއް ލިބިގެންދާނެއެވެ.