ކުޅިވަރު /
ޚަބަރު
ރައީސުލްޖުމްހޫރިއްޔާގެ ނައިބު އެމް.އެން.ޔޫ ފުޓްސަލް ފިއެސްޓާ 2024ގެ ފައިނަލް ޝަރަފުވެރިކޮށްދެއްވައިފި
އެމް.އެން.ޔޫ ފުޓްސަލް ފިއެސްޓާ 2024ގެ ފައިނަލް ފޮޓޯ:ރައީސް އޮފީސް
ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް، ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ފުޓްސަލް ފިއެސްޓާ 2024ގެ ފައިނަލް މެޗާއި މުބާރާތް ނިންމުމުގެ ރަސްމިއްޔާތު ޝަރަފުވެރިކޮށްދެއްވައިފިއެވެ.
މި މުބާރާތުގެ އަންހެން ޑިވިޜަންގެ ފައިނަލް މެޗުގައި، މޯލްޑިވްސް ބިޒްނަސް ސްކޫލާއި އެމް.އެން.ޔޫ.ގެ ސެންޓަރ ފޮރ ފައުންޑޭޝަން ސްޓަޑީޒް ބައްދަލުކުރި މެޗު ކާމިޔާބު ކުރީ މޯލްޑިވްސް ބިޒްނަސް ސްކޫލެވެ. އަދި ފިރިހެން ޑިވިޜަންގެ ފައިނަލްގައި އެމް.އައި. ކޮލެޖާއި ފެކަލްޓީ އޮފް އެޑިއުކޭޝަން ބައްދަލުކުރި މެޗު ކާމިޔާބުކުރީ އެމް.އައި. ކޮލެޖުންނެވެ.
އަންހެން ޑިވިޜަންގެ ޗެމްޕިއަން މޯލްޑިވްސް ބިޒްނަސް ސްކޫލުގެ ޓީމަށް ޓްރޮފީއާއި މެޑަލް ދެއްވީ މިނިސްޓަރ އޮފް ސްޕޯޓްސް، ފިޓްނަސް އެންޑް ރެކްރިއޭޝަން، ޢަބްދުﷲ ރާފިޢުއެވެ. ރައީސުލްޖުމްހޫރިއްޔާގެ ނައިބު ވަނީ ފައިނަލް މެޗުގައި ބޭނުންކުރި ބޯޅައިގައި ސޮއިކުރައްވައި، ފިރިހެން ޑިވިޜަންގެ ޗެމްޕިއަން އެމް.އައި. ކޮލެޖުގެ ޓީމަށް ޓްރޮފީއާއި މެޑަލް ދެއްވާފައެވެ.
މި މުބާރާތް ނިންމުމުގެ ރަސްމިއްޔާތު ޝަރަފުވެރިކޮށްދެއްވުމަށް ވަޑައިގެންނެވިކަމަށްޓަކައި އެމް.އެން.ޔޫ.ގެ ދަރިވަރުންގެ ޔޫނިއަންގެ ފަރާތުން ރައީސުލްޖުމްހޫރިއްޔާގެ ނައިބަށް ވަނީ ޝުކުރުގެ ޚާއްސަ ފިލައެއް އަރުވާފައެވެ.