ހުޅުމާލޭ ހޮސްޕިޓަލުގެ 'އައި ކޭމްޕް': ތިން ދުވަހުން 60 ސާޖަރީ

ހުޅުމާލޭ ހޮސްޕިޓަލުގައި "އައި ކޭމްޕް" ގެ ނަމުގައި ކުރިއަށްދިޔަ ޚާއްޞަ ކޭމްޕެއްގައި އެންމެ ތިން ދުވަހުގެ ތެރޭގައި 60 އަށްވުރެ ގިނަ ކެޓަރެކްޓް ސާޖަރީ ކުރެވިއްޖެއެވެ. މި ކޭމްޕަކީ ޗައިނާގެ ޑޮކްޓަރުންގެ ޓީމަކާއެކު ކުރިއަށްގެންދާ ކޭމްޕެކެވެ.

މި ކޭމްޕް ބައްލަވައިލެއްވުމަށް ހެލްތް މިނިސްޓަރު އަބްދުﷲ ނާޒިމް އިބްރާހީމާއި ޗައިނާއިން ރާއްޖެއަށް ކަނޑައަޅުއްވައިފައި ހުންނަވާ ސަފީރު ވަންގް ލިޒިން ވަނީ ޒިޔާރާތް ކުރައްވައިފައެވެ. މި ޒިޔާރަތުގައި ދެ ބޭފުޅުން ވަނީ ހުޅުމާލެ ހޮސްޕިޓަލުގެ މެނޭޖްމަންޓާވެސް ބައްދަލުކުރައްވައިފައެވެ.

ޒިޔާރަތަށްފަހު ސަފީރު ވަންގް ލިޒިން އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ތިން ދުވަހުގެ ތެރޭގައި ގާތްގަނޑަކަށް 60 ސާޖަރީ ފުރިހަމަކޮށްފައިވާ ކަމަށެވެ. އަދި މިކަމަށްޓަކައި ޕޭޝަންޓުން ޝުކުރުވެރިވާކަންވެސް ސަފީރު ވަނީ ފާހަގަކުރައްވައިފައެވެ.

ހުޅުމާލެ ހޮސްޕިޓަލުގެ މެނޭޖްމަންޓާއެކު ބޭއްވުނު ބައްދަލުވުމުގައި ލޮލުގެ ޚިދުމަތް ރަނގަޅުކުރުމަށް ގުޅިގެން ކުރެވިދާނެ ކަންތައްތަކާ ބެހޭގޮތުން މަޝްވަރާކުރެވުނެވެ. މި ބައްދަލުވުމުގައި ސަފީރު ވަންގް ލިޒިން ވަނީ މި ކޭމްޕްގެ ކާމިޔާބީ ފާހަގަކުރައްވައި، ކުރިއަށް އޮތް އަހަރުތަކުގައިވެސް މިފަދަ ކޭމްޕްތައް ކުރިއަށް ގެންދިއުމުގެ މުހިންމުކަން ފާހަގަކުރައްވައިފައެވެ.

ހުޅުމާލެ ހޮސްޕިޓަލުން މަޢުލޫމާތު ދެއްވާގޮތުގައި މި ކޭމްޕް ކުރިއަށްގެންދަން ހަމަޖެހިފައިވަނީ މާދަމާގެ ނިޔަލަށެވެ. އަދި މި ކޭމްޕްގައި ބަލާނީ ލޮލުގެ ސާޖަރީ ކުރުމަށް ކުރިން ނަން ނޯޓުކޮށްފައިވާ މީހުންނެވެ.

މި ކޭމްޕަކީ ރާއްޖޭގެ ޞިއްޙީ ދާއިރާއަށް ލިބިގެންދާ ވަރަށް މުހިންމު ކުރިއެރުމެއް ކަމަށް ބެލެވެއެވެ. ޚާއްޞަކޮށް ލޮލުގެ ބަލިތަކަށް ފަރުވާ ހޯދުމަށް ދަތިވެފައިވާ ގިނަ ބަޔަކަށް މި ކޭމްޕުން ލުޔެއް ލިބިގެންދާނެ ކަމަށް އުންމީދު ކުރެވެއެވެ.

Minister @ANazim2019 visited @HMH_mv to meet the visiting Chinese ophthalmology team conducting cataract surgeries at the eye camp. Joined by @China_Amb_Mdv, we extend our gratitude for the continuous support from the Chinese government in enhancing healthcare. pic.twitter.com/1YQ0rZH1xo

— Ministry of Health (@MoHmv) November 8, 2024