ބަންގްލަދޭޝްގެ ކުރީގެ ބޮޑުވަޒީރު ޙަސީނާއާއަށް ބޮޑުދައިތަ ވިދާޅުވާ ޓިޔުލިޕް ސިއްދީޤްއަށް ދެއަހަރުދުވަހުގެ ޖަލު ޙުކުމެއް އިއްވައިިފި

ބަންގްލަދޭޝްގެ ކުރީގެ ބޮޑުވަޒީރު ޝެއިޚް ޙަސީނާ އަށް ބޮޑުދައިތަ ވިދާޅުވާ ޓިޔުލިޕް ސިއްދީޤްއަށް ދެއަހަރު ދުވަހުގެ ޖަލު ޙުކުމެއް އިއްވައިފިއެވެ. 

ޓިޔުލިޕް ސިއްދީޤަކީ އިނގިރޭސިވިލާތުގެ މަޖިލީހުގެ މެމްބަރެކެވެ. އޭނާއަށް ދެއަހަރު ދުވަހުގެ ޖަލު ޙުކުމް އިއްވައިފައިވަނީ ކޮރަޕްޝަނާއު ޚިޔާނާތުގެ މައްސަލައިގައެވެ. މި މައްސަލައަކީ ބިމުގެ ބައެއް ޕްލޮޓްތައް ހޯދުމުގައި ހިންގާފައިވާ ކޮރަޕްޝަންގެ މައްސަލައެކެވެ.

ޑާކާގެ ޚާއްސަ ފަނޑިޔާރުންގެ ކޯޓުގެ ފަނޑިޔާރު ރަބީޢުލް އަލަމް، ހޯމަ ދުވަހު ނިންމެވި ގޮތުގައި، ޙަސީނާ ވަނީ ބޮޑުވަޒީރުގެ ބާރު ނާޖާއިޒު ގޮތުގައި ބޭނުންކުރައްވާފައެވެ. އިނގިރޭސިވިލާތުގެ ވެރިކަންކުރާ ލޭބަރ ޕާޓީގެ މެމްބަރު ޓިޔުލިޕް ސިއްދީޤް، ކުށްވެރިކުރެވުނީ ޙަސީނާގެ ބާރު ބޭނުންކޮށްގެން، އޭނާގެ މަންމަ ޝެއިޚް ރިޙާނާ އާއި، އެއްބަނޑު އެއްވަފާ ދެމީހުންނަށް ޑާކާގައި ހިންގި ސަރުކާރުގެ މަޝްރޫޢަކުން ޕްލޮޓް ހޯދުމުގައި ނުފޫޒު ފޯރުވުމުގެ ކުށުގައެވެ.

ޙަސީނާ އަށް ފަސް އަހަރުގެ ޖަލުޙުކުމެއް އިއްވި އިރު، ޓިޔުލިޕް އަށް ދެ އަހަރުގެ ޖަލު ޙުކުމެއް އިއްވިއެވެ. ރިޙާނާ، ބަންގްލަދޭޝްގައި މިހާރު ނޫޅޭ ކަމަށް ރިޕޯޓްކުރެވިފައިވާއިރު، އޭނާ އަށް ވަނީ ހަތް އަހަރުގެ ޖަލު ޙުކުމެއް އިއްވާފައެވެ. މި ތިން މީހުން ވެސް 100,000 ޓަކާ (820 ޑޮލަރު) އިން ޖޫރިމަނާކޮށްފައިވާއިރު، އެ ފައިސާ ނުދައްކައިފިނަމަ އިތުރު ހަ މަސް ދުވަހުގެ ޖަލު ޙުކުމެއް ތަންފީޒުކުރަން ޖެހޭނެ ކަމަށް ކޯޓުން ބުންޏެވެ.

މި މައްސަލައިގައި ދަޢުވާ އުފުލި އިތުރު 14 މީހުންނަށް ވެސް ވަނީ ފަސް އަހަރުގެ ޖަލު ޙުކުމެއް އިއްވާފައެވެ. އެންޓި-ކޮރަޕްޝަން ކޮމިޝަންގެ ޕްރޮސިކިއުޓަރ ޚާން މައިނުލް ޙަސަން ވިދާޅުވީ، "ޓިޔުލިޕް އާއި ޙަސީނާގެ ޕްރިންސިޕަލް ސެކްރެޓަރީ ސަލާޙުއްދީން އަޙްމަދު އާ ދެމެދު ހިނގާފައިވާ މުޢާމަލާތްތަކުގެ ތަފްސީލްތައް އެ ޓީމަށް ލިބިފައިވާ ކަމަށާއި، އެއިން މި މައްސަލައިގައި އޭނާގެ ދައުރު ހާމަވާ ކަމަށެވެ. ޓިޔުލިޕް ވަނީ އޭނާގެ ބޮޑުދައިތަ ޝެއިޚް ޙަސީނާ އަށް ބާރު އަޅާފައި، އޭނާގެ މަންމަ އާއި އެއްބަނޑުއެއްބަފާ އެހެން މީހުންނަށް ޕްލޮޓްތައް ދިނުމަށް. އޭނާ އަމިއްލަ އަށް ވެސް ތިން ޕްލޮޓް ނަގާފައިވޭ އޭނާ އަށް އެއް ޕްލޮޓް، އަދި އޭނާގެ ދެ ދަރިންނަށް ދެ ޕްލޮޓް، ޙަސަން ވިދާޅުވިއެވެ. އޭނާ ވަނީ [އަޙްމަދު] އަށް ގުޅާފައި، އެންކްރިޕްޓްކޮށްފައިވާ ބައެއް އެޕްތައް މެދުވެރިކޮށް މުޢާމަލާތްކޮށްފައި، އަދި އޭނާ ޑާކާގައި ހުރި އިރު ބައްދަލުކޮށްފައި ވެސް ވެއެވެ."

ޙަސީނާ އާއި ޓިޔުލިޕް ދަޢުވާތަކުން ދިފާޢުވުމަށް ވަކީލުން ހަމަނުޖައްސަވާ ވަނީ މި ދަޢުވާތައް ސިޔާސީ ގޮތުން ބާރު އަޅާފައިވާ ކަމަށް ދެކޭ ކަމަށް ވިދާޅުވެފައެވެ. މިދިޔަ މަހު މުޒާހަރާގެ ބައިވެރިންނާ ދެކޮޅަށް ހިންގި ޖަރީމާތަކާ ގުޅިގެން މަރުގެ ޙުކުމެއް ވެސް އިއްވާފައިވާ ޙަސީނާ، މި ޙުކުމް ބަލައިނުގަންނަ ކަމަށް އޭއެފްޕީ އަށް ފޮނުއްވި ބަޔާނެއްގައި ވިދާޅުވިއެވެ.