ފަލަސްޠީނުގެ މައްސަލަ ޙައްލުކުރުމަށް މިނިސްޓަރ އޮފް ފޮރިން އެފެއާޒް ރިޔާދަށް

މިނިސްޓަރ އޮފް ފޮރިން އެފެއާޒް އަބްދުއްﷲ ޙަލީލް މިއަދު ވަނީ ސަޢޫދީ ޢަރަބިއްޔާގެ ވެރިރަށް ރިޔާދަށް ވަޑައިގެންފައެވެ. މިނިސްޓަރ ވަޑައިގަތީ ސަޢޫދީ ޢަރަބިއްޔާގެ ޤިޔާދަތުގެ ދަށުން ބޭއްވޭ އިސްތިސްނާއީ އަރަބި-އިސްލާމީ ސަމިޓާއި އޭގެ ތައްޔާރީ ބައްދަލުވުންތަކުގައި ބައިވެރިވެ ވަޑައިގަތުމަށެވެ.

މި ދަތުރުފުޅުގައި މިނިސްޓަރ ވަނީ އަރަބި-އިސްލާމީ ޤައުމުތަކާއެކު އިސްލާމީ އުއްމަތުގައި މިހާރު ދިމާވެފައިވާ ގޮންޖެހުންތަކާ ބެހޭގޮތުން މަޝްވަރާކުރައްވާނެ ކަމަށް ވިދާޅުވެފައެވެ. ޚާއްޞަކޮށް ފަލަސްޠީނުގެ ރައްޔިތުން ތަޙައްމަލުކުރަމުންދާ ވޭނާ ބެހޭގޮތުން މަޝްވަރާކުރެއްވުމަށް ވަނީ ރޭވިފައެވެ.

މިނިސްޓަރ ވިދާޅުވީ ފަލަސްޠީނުގެ ރައްޔިތުންގެ ވޭން ލުއިކޮށްދިނުމަށާއި އިސްރާއީލު ޖަވާބުދާރީ ކުރުވުމަށް އެންމެން އެއްބައިވާން ޖެހޭ ކަމަށެވެ. އަދި އިސްރާއީލުން ހިންގަމުންދާ އަނިޔާވެރި ހަނގުރާމައާއި ނަސްލު ފޫއަޅުވާލުމުގެ ޢަމަލުތައް ވަގުތުން ހުއްޓާލަން ޖެހޭ ކަމަށްވެސް މިނިސްޓަރ ވަނީ ވިދާޅުވެފައެވެ.