ފުލުހުންގެ ބެލުމުގެ ދަށުގައިހުރި ބައެއް ތަކެތީގެ ވެރިފަރާތް ހޯދަނީ

އެކި މައްސަލަތަކުގައި ފުލުހުންގެ ބެލުމުގެ ދަށަށް ގެނެސްފައިވާ ބައެއް ތަކެތީގެ ވެރިފަރާތް ހޯދުމުގެ މަސައްކަތް މޯލްޑިވްސް ޕޮލިސް ސަރވިސްއިން ދަނީ ކުރަމުންނެވެ.

ފުލުހުން މިއަދު ބުނެފައިވަނީ މި ތަކެއްޗަކީ ހޮވައިގެން ގެނެސްފައިވާ ތަކެއްޗާއި ތުހުމަތު ކުރެވިގެން ހުއްޓުވައި ސުވާލުކުރި ބައެއް މީހުންގެ އަތުން ފެނިފައިވާ ތަކެތި ކަމަށެވެ. އަދި އެ ތަކެތީގެ ވެރިފަރާތް އެ މީހުންނަށް ބުނެދެވިފައި ނުވާތީ އެ ތަކެތި ވަނީ ފުލުހުންގެ ބެލުމުގެ ދަށަށް ގެނެސްފައި ކަމަށް ފުލުހުން ބުނެފައިވެއެވެ.

ގަލޮޅު ޕޮލިސް ސްޓޭޝަނުގެ ބެލުމުގެ ދަށުގައި ހުރި ތަކެތީގެ ތެރޭގައި އޮކްޓޯބަރު 28 ވަނަ ދުވަހު ރަށްދެބައި މަގުން ވައްކަމުގެ ތުހުމަތުގައި ހުއްޓުވައި ސުވާލުކުރި މީހެއްގެ އަތުން ފެނުނު ޕަވަރބޭންކެއް، ހެލްމެޓެއް އަދި އެހެނިހެން ތަކެތި ހިމެނެއެވެ. މީގެ އިތުރުން އޮކްޓޯބަރު 29 ވަނަ ދުވަހު ބޮޑުތަކުރުފާނު މަގުން ހޮވައިގެން ގެނެސްފައިވާ ސިޓްރޮކަލް ފޮށިގަނޑެއްވެސް ހިމެނެއެވެ.

ހެންވޭރު ޕޮލިސް ސްޓޭޝަނުގެ ބެލުމުގެ ދަށުގައި ހުރި ތަކެތީގެ ތެރޭގައި އޮކްޓޯބަރު 27 ވަނަ ދުވަހު ކަސްތޫރި މަގުން ހޮވައިގެން ގެނެސްފައިވާ މަކިޓާ ބްރޭންޑުގެ ބުރުމާއަކާއި ހަތަރު ބެޓެރި އަދި ޗާޖަރެއް ހިމެނެއެވެ. އަދި ނޮވެމްބަރު 3 ވަނަ ދުވަހު މަޖީދީ މަގުން ވައްކަމުގެ ތުހުމަތުގައި ހުއްޓުވައި ސުވާލުކުރި މީހެއްގެ އަތުން ފެނުނު ނެޓްވޯކް ކޭބަލެއްވެސް ހިމެނެއެވެ.

މި ތަކެތީގެ ވެރިފަރާތްތަކުން ގަލޮޅު ޕޮލިސް ސްޓޭޝަނުގެ ނަންބަރު 9631696 އަށް ނުވަތަ ހެންވޭރު ޕޮލިސް ސްޓޭޝަނުގެ ނަންބަރު 9400053 އަށް ގުޅައި އިންސިޑެންޓް ނަންބަރާއެކު މަޢުލޫމާތު ހިއްސާކުރުމަށް ފުލުހުން އެދިފައިވެއެވެ. އަދި ކާކުކަން އެނގޭނެ ލިޔުމަކާއެކު ކަމާގުޅޭ ޕޮލިސް ސްޓޭޝަނަށް ހާޒިރުވެ ތަކެއްޗާ ހަވާލުވުމަށްވެސް ފުލުހުން އަންގާފައިވެއެވެ.