އާރބަން ސެންޓަރުތަކުގައި އާބާދީގެ މިންގަނޑަކީ މަދުވެގެން 10،000 މީހުން: ވަޒީރު ޢަލީ ޙައިދަރު

ގެދޮރުވެރިކަމާއި ބިމާއި ޢުމްރާނީ ތަރައްޤީއާބެހޭ ވަޒީރު ޑރ. ޢަލީ ޙައިދަރު އަޙްމަދު ވިދާޅުވެފައިވަނީ އާރބަން ސެންޓަރުތަކުގައި އާބާދީގެ މިންގަނޑެއްގެ ގޮތުގައި ކަނޑައަޅާފައިވަނީ މަދުވެގެން 10،000 މީހުންގެ އާބާދީއެއްކަމަށެވެ. މި ވާހަކަ ވަޒީރު ވިދާޅުވެފައިވަނީ ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި އާރބަން ސެންޓަރުތައް ތަރައްޤީ ކުރުމާ ގުޅޭގޮތުން ދެއްކެވި ވާހަކަފުޅުގައެވެ.

ވަޒީރު ވިދާޅުވިގޮތުގައި އާރބަން ސެންޓަރުގެ ގޮތުގައި ތަރައްޤީކުރާ ރަށްރަށް ކަނޑައަޅާފައިވަނީ އެރަށްރަށަށް މިހާތަނަށް ކޮށްފައިވާ އިންވެސްޓްމަންޓްތަކަށް ބެލުމަށްފަހުގައެވެ. މީގެ ތެރޭގައި ސިއްޙީ ޚިދުމަތްތަކާއި، ތަޢުލީމީ ޚިދުމަތްތަކާއި، އެހެނިހެން ޢުމްރާނީ ޚިދުމަތްތައް ދެވިފައިހުރި މިންވަރު ހިމެނެއެވެ. އަދި ރަށް ކައިރީގައި ފަޅެއް އޮތްނަމަ އެ ފަޅު ހިއްކައިގެން ރަށް ބޮޑުކުރެވޭނެ މިންވަރުވެސް ބަލާފައިވާނެކަމަށް ވަޒީރު ފާހަގަކުރެއްވިއެވެ.

މިހާރު ކުރިއަށްދަނީ އާބަން ޑިވެލޮޕްމަންޓް ޕްލޭނާއި ޕޮލިސީތައް އެކުލަވާލުމުގެ މަސައްކަތްތައްކަމަށް ވަޒީރު ވިދާޅުވިއެވެ. މި ޕޮލިސީތައް އެކުލަވާލާނީ ސަރުކާރާއި އަމިއްލަ ފަރާތްތައް ހިމެނޭހެން ހުރިހާ ސިނާއަތަކަށްވެސް ފުރުޞަތުތައް ފަހިވާނެގޮތަށްކަމަށް އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އަރބަން ސެންޓަރުގެ ގޮތުގައި ތަރައްޤީ ކުރެއްވުމަށް 7 ރަށެއް ކަނޑައަޅުއްވާފައެވެ. އެއީ ރ. އުނގޫފާރު، ބ. އޭދަފުށި، ޅ. ނައިފަރު، އދ. މަހިބަދޫ، ފ. ނިލަންދޫ، ދ. ކުޑަހުވަދޫ އަދި ލ. ފޮނަދޫއެވެ. މި މަޝްރޫޢުގެ މަޤްޞަދަކީ މާލެއަށް ބަރޯސާނުވެ އަތޮޅުތަކުންވެސް ޒަމާނީ ޚިދުމަތްތައް ލިބޭނެގޮތް ހެދުމެވެ.

ވަޒީރު އިތުރަށް ވިދާޅުވީ މޫސުމީ ބަދަލުތަކުގެ ސަބަބުން ކުދި ރަށްރަށަށް ކުރިމަތިވާ ގޮންޖެހުންތަކަށް ޙައްލެއްގެ ގޮތުން، ރައްޔިތުންނަށް ސަލާމަތުން ދިރިއުޅެވޭނީ ތިމާވެށްޓާ ރައްޓެހި ރަށްތަކެއް ތަރައްޤީކުރެވިގެންކަމަށެވެ. އާރބަން ސެންޓަރުތަކަކީ ރައްޔިތުންނަށް މަތީ ތަޢުލީމާއި ސިއްޙީ ފުރުޞަތުތަކުގެ އިތުރުން ވިޔަފާރީގެ ފުރުޞަތުތައްވެސް ފަހިވެގެންދާނެ ތަންތަންކަމަށް ވަޒީރު ވިދާޅުވިއެވެ.