އިސްރާއީލުން ބައިވެރިވާތީ 4 ގައުމަކުން ޔޫރޯވިޝަން 2026 ބޮއިކޮޓް ކުރުމަށް ނިންމައިފި

ޔޫރޯޕިއަން ބްރޯޑްކާސްޓިންގ ޔޫނިއަން އީބީޔޫ އިން އިސްރާއީލަށް ޔޫރޯވިޝަން 2026 ގައި ބައިވެރިވުމުގެ ފުރުސަތު ދިނުމާއި ގުޅިގެން، އަންނަ އަހަރު ބާއްވާ މި މިއުޒިކް މުބާރާތް ބައިކޮޓް ކުރަން ޔޫރަޕްގެ ހަތަރު ގައުމަކުން ނިންމައިފިއެވެ. މި ގައުމުތަކަކީ އަޔަރލޭންޑް، ނެދަލޭންޑްސް، ސްލޮވޭނިއާ އަދި ސްޕެއިން އެވެ.

މި ނިންމުން އައީ އީބީޔޫއިން އިސްރާއީލު ބައިވެރިކުރުމަށް ރަސްމީކޮށް ހުއްދަ ދިނުމާއި އެކުއެވެ. އީބީޔޫ އިން ވަނީ އިސްރާއީލު ބައިވެރިކުރުމާއި މެދު ވޯޓެއް ނުނަގާނެ ކަމަށް ވެސް ނިންމާފައެވެ. މިކަމުގެ ސަބަބުން ގިނަ މެންބަރު ގައުމުތަކުން ވަރުގަދައަށް ވަނީ ދެކޮޅު ހަދާފައެވެ.

ބޮއިކޮޓް ކުރަން ނިންމި ގައުމުތަކުން އެކި ސަބަބުތައް ދައްކާފައިވެއެވެ. އަޔަރލޭންޑްގެ ބްރޯޑްކާސްޓަރު އާރްޓީއީ އިން ބުނެފައި ވަނީ ޣައްޒާގައި ހިނގަމުންދާ ލާއިންސާނީ ކާރިސާ އާއި ގިނަ ބަޔެއްގެ ފުރާނަ ގެއްލެމުންދާކަން އެއީ ބައިކޮޓް ކުރި މައިގަނޑު ސަބަބު ކަމުގައެވެ. ނެދަލޭންޑްސް އިން ވެސް ބުނެފައި ވަނީ މިހާރުގެ ހާލަތުގައި އިސްރާއީލުގެ ބައިވެރިވުން އެގައުމުގެ އާންމު ހަމަތަކާއި ދެކޮޅު ކަމަށެވެ. ސްލޮވޭނިއާ އިން ވަނީ މި ހަނގުރާމައިގައި މަރުވި ކުޑަކުދިންގެ ހަނދާނަށް ހިތާމަ ފާޅުކޮށް، 20،000 އަށް ވުރެ ގިނަ ކުދިން މަރުވެފައިވާ ކަމަށް ބުނެފައެވެ. ސްޕެއިންގެ ބްރޯޑްކާސްޓަރު އާރްޓީވީއީ އިން ބުނެފައި ވަނީ އިސްރާއީލުގެ ބައިވެރިވުމުގެ ސަބަބުން މުބާރާތް ސިޔާސީވެ، ޔޫރޯވިޝަންގެ "ނިއުޓްރަލް" ސިފަ ގެއްލިފައިވާ ކަމަށެވެ. އާރްޓީވީއީ އިން ނެރުނު ރަސްމީ ބަޔާނެއްގައި ބުނެފައި ވަނީ "މިހާރުގެ ހާލަތުގައި، އިސްރާއީލާއި އެކު ބައިވެރިވުމަކީ ބަލައިގަނެވޭނެ ކަމެއް ނޫން" ކަމަށެވެ.

ޖަރުމަނުން މި ބޮއިކޮޓްގައި ބައިވެރިނުވިއަސް، އިސްރާއީލު ބައިވެރިކުރުމުން ދުރަށްޖެހޭނަމަ އެ ގައުމުން ވެސް މުބާރާތުން ދުރަށްޖެހޭނެ ކަމަށް ވަނީ އިންޒާރު ދީފައެވެ. މިއީ ޔޫރޯވިޝަންގައި ބައިވެރިވާ ގައުމުތަކުގެ ތެރޭގައި ސިޔާސީ ގޮތުން ފިނިކަން އުފެދިފައިވާ މިންވަރު ދައްކުވައިދޭ ކަމެކެވެ.

މި ދެބަސްވުންތަކާއި ގުޅިގެން އިސްރާއީލުގެ ރައީސް އައިޒެކް ހެރްޒޯގް ވަނީ އީބީޔޫ ގެ ނިންމުމަށް މަރުހަބާ ވިދާޅުވެފައެވެ. އެމަނިކުފާނު ވިދާޅުވީ ކޮންމެ ގައުމަކަށް ވެސް، ސިޔާސީ ކަންކަމަށް ނުބަލާ، ކޮންމެ ބައިނަލްއަޤްވާމީ މަންސައެއްގައި ވެސް ތަމްސީލުވުމުގެ ހައްގު ލިބިގެންވާ ކަމަށެވެ.

މި ހަރަކާތުން ދައްކުވައިދެނީ ދުނިޔޭގެ އެކި ކަންކޮޅުތަކުގައި ސަގާފަތާއި ސިޔާސަތު ގުޅިފައިވާ އޮނިގަނޑެވެ. މިއުޒިކާއި އެއްބައިވަންތަކަމުގެ ދިގު ތާރީޚެއް ލިބިފައިވާ ޔޫރޯވިޝަންއަށް މިހާރު ދިމާވެފައި ވަނީ "ނިއުޓްރަލް" ކަމާއި ސިޔާސީ ކަންކަމުގެ ދައުރާއި ގުޅޭ ގިނަ ސުވާލުތަކަކާއެވެ. މި ހަތަރު ގައުމުން ބޮއިކޮޓް ކުރަން ނިންމި ނިންމުމުން ދައްކުވައިދެނީ ބައިނަލްއަޤްވާމީ ސިޔާސީ މައްސަލަތަކުގެ ސަބަބުން ސަގާފީ ހަރަކާތްތަކަށް އަސަރުކުރާނެ މިންވަރެވެ. ތަޖުރިބާކާރުން ބުނާ ގޮތުގައި މިފަދަ ނިންމުންތަކަކީ މުސްތަގުބަލުގައި ބާއްވާ މުބާރާތްތަކަށް ނުފޫޒު ފޯރުވައި، ބައިނަލްއަޤްވާމީ މުބާރާތްތަކުގައި ބައިވެރިވުމުގެ މިންގަނޑުތަކާއި އަޚްލާޤީ ޒިންމާތަކާއި މެދު ބަހުސްތަކެއް އުފެދުމުގެ ފުރުސަތު ބޮޑެވެ.