ޓްރަމްޕް އަނބުރާ ވެރިކަމަށް އައުމުން ފަލަސްޠީނާއި ލުބުނާނުގެ ހާލު އިތުރަށް ގޯސްވާނެކަމުގެ ބިރު

އެމެރިކާގެ ކުރީގެ ރައީސް ޑޮނަލްޑް ޓްރަމްޕް އަލުން ރައީސްކަމަށް އައުމުން ފަލަސްޠީނާއި ލުބުނާނުގެ ރައްޔިތުންގެ ހާލު އިތުރަށް ގޯސްވެގެންދާނެކަމުގެ ބިރު އޮތްކަމަށް ގާޒާގެ ބައެއް ރައްޔިތުން ބުނެފިއެވެ. ޓްރަމްޕްގެ ވެރިކަން އަންނަ އަހަރުގެ ޖެނުއަރީ މަހު ފެށުމާއެކު، މެދުއިރުމަތީގެ ގައުމުތަކުގައި އިތުރު ހަލާކާއި ވޭނާ ކުރިމަތިވާނެކަމަށް ގިނަ ބަޔަކު ބިރުގަނެއެވެ.

ޣައްޒާއާއި، އޮކިއުޕައިޑް ވެސްޓް ބޭންކް އަދި ލުބުނާނުގައި، އިސްރާއީލުގެ ވަފާތެރި އެކުވެރިއެއްކަމަށްވާ ޓްރަމްޕް ވެރިކަމަށް އައުމުން، އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ އާއި އޭނާގެ އިންތިހާ ކަނާތްފަރާތުގެ ސަރުކާރު ހިތްވަރުގަދަވެ، ސަރަހައްދީ ހަނގުރާމަތައް އިތުރުކޮށް، ފަލަސްޠީނުގެ މިނިވަންކަމަށް އޮތް ކޮންމެ ފުރުސަތެއްވެސް ނައްތާލާނެކަމުގެ ބިރު އެބައޮތެވެ.

"އަހަރެންނަކަށް އެމެރިކާއަކަށް އިތުބާރެއް ނުކުރެވޭ،" މިހެން ބުނީ ޣައްޒާގެ 87 އަހަރުގެ އަބޫ އަލީއެވެ. އޭނާއަކީ ޣައްޒާގެ ގިނަ މީހުންނެކޭ އެއްފަދައިން ގެދޮރު ދޫކޮށް ނުކުންނަން މަޖުބޫރުވެފައިވާ މީހެކެވެ. "ޓްރަމްޕްގެ ވެރިކަމުގައި ޣައްޒާގެ ހަނގުރާމަ އިތުރަށް ގޯސްވާނެކަމަށް އަހަރެން ލަފާކުރަން."

އެމެރިކާގެ މިހާރުގެ ރައީސް ޖޯ ބައިޑެންގެ އިދާރާއިން ޣައްޒާގައި އިސްރާއީލުން ހިންގާ ހަނގުރާމައަށް ތާއީދުކޮށްފައިވެއެވެ. 2023 ވަނަ އަހަރުގެ އޮކްޓޯބަރ 7 ގައި ހަމާސްއިން އިސްރާއީލުގެ ދެކުނަށް ދިން ހަމަލާގައި 1,139 މީހުން މަރުވެ، 250 މީހުން ރަހީނުކުރެވުނެވެ. އޭގެ ފަހުން އިސްރާއީލުން ޣައްޒާގައި ހިންގާ ޖެނޮސައިޑްގައި 43,000 އަށްވުރެ ގިނަ ފަލަސްޠީނުން ވަނީ މަރާލާފައެވެ. އަދި 2.3 މިލިއަން މީހުންގެ އާބާދީ ހުސްކޮށްލާފައެވެ.

ޣައްޒާގެ ރައްޔިތުން ބިރުގަންނަނީ ޓްރަމްޕް ވެރިކަމަށް އައުމުން އެމީހުން އެތަނުން ނެރެލުމަށް އިސްރާއީލަށް ހުއްދަ ދޭނެކަމަށެވެ. ރިޕަބްލިކަން ޕާޓީގެ ރިޔާސީ ކެންޑިޑޭޓް ޓްރަމްޕް ވަނީ ޑިމޮކްރެޓިކް ޕާޓީގެ ބައިޑެން، ޣައްޒާގައި އިސްރާއީލު ހިފަހައްޓާފައިވާކަމަށް ތުހުމަތުކޮށް، އަލުން ރައީސްކަމަށް އަތުވެއްޖެނަމަ އިސްރާއީލަށް "މަސައްކަތް ނިންމުމަށް" އެހީތެރިވެދޭނެކަމަށް ބުނެފައެވެ.

"ޓްރަމްޕްގެ ވެރިކަމުގައި ކަންތައްތައް ރަނގަޅުވާނެކަމެއް އަހަރެންނަކަށް ނޭނގެ. އޭނާ [އިސްރާއީލަށް] އަހަރެމެން މަރާލުމުގެ ބަދަލުގައި އަހަރެމެން އެންމެން [ޣައްޒާއިން] ނެރެލުމުގެ ހުއްދަ ދީފާނެ،" މިހެން ބުނީ ޣައްޒާގެ ހިޖުރަވެރިންގެ ކޭމްޕެއްގައި ހުރި އަބޫ މުޙައްމަދެވެ. އޭނާގެ ވާހަކައިގައި ފުރައްސާރައިގެ ކުލަވަރެއް ވެސް ވެއެވެ.

އަބޫ އަލީ ދެކޭގޮތުގައި ފަލަސްޠީނުގެ ރައްޔިތުންގެ ކަންތައްތައް ބިނާވެފައިވަނީ އެމެރިކާގެ ވެރިކަމުގައި ތިބޭ މީހުންގެ މައްޗަށެވެ. 1948 ވަނަ އަހަރު އިސްރާއީލުިސްރާއީލު އުފެދުނުއިރު، ޒައިއޮނިސްޓް ހަނގުރާމަވެރިންގެ އަތުން 750,000 ފަލަސްޠީނުން ފަލަސްޠީނުން ބޭރުކުރެވުނު "ނަކްބާ" (ކާރިސާ) ގެ ސަލާމަތްތެރިއެއްގެ ހައިސިއްޔަތުން، އޭނާ ވަނީ ގިނަ އެމެރިކާ ރައީސުން އިސްރާއީލުން ފަލަސްޠީނުގެ ރައްޔިތުންނާ ދެކޮޅަށް ހިންގާ އަނިޔާވެރި ޢަމަލުތަކަށް ތާއީދުކުރާތަން ފެނިފައެވެ.

އަބޫ އަލީ ދެކޭގޮތުގައި ޓްރަމްޕްގެ ވެރިކަމުގައި ވެސް މިކަން ހަމަ މިގޮތަށް ކުރިއަށްދާނެއެވެ. އަދި އޭނާ ބާރުއަޅައި ބުނި ގޮތުގައި ނަކްބާ އާއި އިސްރާއީލުން މިހާރު ޣައްޒާގައި ހިންގަމުންދާ ޖެނޮސައިޑަކީ "ހަނގުރާމަ" އެއްގެ ގޮތުގައި ބުނެގެން ނުވާނެއެވެ.