ނާސާގެ އެސްޓްރޯނޯޓުން ހާމަނުކުރާ ސިއްރެއް

ނާސާގެ އެސްޓްރޯނޯޓުން ބައިނަލްއަޤްވާމީ ޖައްވު މަރުކަޒުގައި 8 މަސް ދުވަހު ހޭދަކުރުމަށްފަހު އެނބުރި އައުމުން އެއިން އެކަކު ބަލިވެގެން ހޮސްޕިޓަލަށް ގެންދިޔަކަމަށް ބުނެފައިވީ ނަމަވެސް، ބަލިވީ ކާކުކަން ހާމަކުރަން އިންކާރުކޮށްފިއެވެ.

މެތިއު ޑޮމިނިކް، މައިކަލް ބެރެޓް އަދި ޖެނެޓް އެޕްސް އަކީ އޮކްޓޯބަރ 25 ގައި ބައިނަލްއަޤްވާމީ ޖައްވު މަރުކަޒުން އެނބުރި އައި ތިން އެސްޓްރޯނޯޓުންނެވެ. މި ތިން އެސްޓްރޯނޯޓުންނާއެކު ރަޝިއާގެ އެލެކްސެންޑަރ ގްރެބެންކިން ވެސް ހުއްޓެވެ. މި ހަތަރު އެސްޓްރޯނޯޓުން މާރިޗު މަހު ޖައްވަށް ދަތުރުކުރިއެވެ.

ސްޕޭސްއެކްސްގެ ކެޕްސިއުލް މެކްސިކޯ ކަނޑުގައި ފްލޮރިޑާ އައްސޭރިފަށާ ކައިރިން ޖެހުމާއެކު، އެ ހަތަރު އެސްޓްރޯނޯޓުން ވެސް ޕެންސަކޯލާގެ ހޮސްޕިޓަލަކަށް ގެންދިޔައެވެ. އޭގެ ތެރެއިން އެކަކު އެ ރޭ ހޮސްޕިޓަލުގައި ހޭދަކުރި ކަމަށް ނާސާއިން ބުނެފައިވެއެވެ. ނަމަވެސް، އެއީ ކާކުކަމެއް ނުވަތަ ކޮން ބައްޔެއްކަމެއް ހާމަކޮށްފައެއް ނުވެއެވެ.

ހުކުރު ދުވަހު ބޭއްވި ނޫސްވެރިންގެ ބައްދަލުވުމުގައި، އެސްޓްރޯނޯޓުންނާ ސުވާލުކުރުމުން، އެއިން އެއްވެސް މީހަކު ބަލިވި މީހާގެ ނަން ހާމަކުރަން ބޭނުމެއް ނުވިއެވެ. ޚާއްޞަކޮށް ބޭސްވެރިކަމުގެ ރޮނގުން ތަޖުރިބާ ހުރި ބެރެޓް ވެސް އެ އެސްޓްރޯނޯޓަށް ކުރިމަތިވި އަލާމާތްތަކާ ބެހޭ އެއްވެސް މަޢުލޫމާތެއް ދޭން އިންކާރުކުރިއެވެ.

"ޖައްވަށް ދަތުރުކުރުމަކީ އަދިވެސް އަޅުގަނޑުމެންނަށް ފުރިހަމައަށް ނޭނގޭ ކަމެއް. ބައެއް ފަހަރު އަޅުގަނޑުމެން އުންމީދުނުކުރާ ކަންތައްތައް ދިމާވޭ. މިއީ އޭގެ ތެރެއިން އެއް ކަމެއް،" ބެރެޓް ބުންޏެވެ.

އެޕްސް ބުނި ގޮތުގައި ކޮންމެ މީހަކުވެސް ޖައްވަށް ދަތުރުކުރުމުން ތަފާތު ގޮތްގޮތަށް  އަސަރުކުރެއެވެ. އަދި ބިމުގެ ބާރަށް ވެސް ތަފާތު ގޮތްގޮތަށް އަސަރުކުރެއެވެ.