މެންދުރާ ހަމައަށް ރާއްޖޭގެ ބޮޑު ބަޔަކަށް ހުދު ސަމާލު ނެރެފި

މިއަދުގެ މެންދުރާ ހަމައަށް، އައްޑު އަތޮޅާއި ފުވައްމުލަކު ސިޓީ ފިޔަވައި އެހެން ހުރިހާ ސަރަޙައްދަކަށް މޫސުން ގޯސްވާނެކަމަށް، މޫސުމާ ބެހޭ ޤައުމީ އިދާރާއިން ލަފާކޮށްފިއެވެ.

އެ އިދާރާއިން ހާމަކޮށްފައިވާ ގޮތުގައި، މިއަދުގެ ހެނދުނު 6:30އިން ފެށިގެން މެންދުރު 12:30އާ ހަމައަށް ރާއްޖޭގެ ބޮޑު ބަޔަކަށް މޫސުން ގޯސްވާނެއެވެ. އެހެންކަމުން، ހއ. އަތޮޅުން ފެށިގެން ގދ އަތޮޅާ ހަމައަށް ވަނީ ހުދު ސަމާލު ނެރެފައެވެ.

އެ އިދާރާއިން އިތުރަށް ބުނީ، އެ ސަރަޙައްދުތަކަށް ބޯކޮށް ވާރޭވެހުމާއެކު ގުގުރުން އެކަށީގެންވާކަމަށެވެ. އަދި ވިލާގަނޑުގައި ގަޑިއަކު 40 މޭލަށް ވައި ގަދަވާނެކަމަށް ވެސް ވަނީ ލަފާކޮށްފައެވެ. 

Alert white for heavy rain and thunderstorms with gusts of 40 mph. pic.twitter.com/QRql068LB9

— Maldives Meteorology (@MetMaldives) December 9, 2025

މޫސުމާ ބެހޭ ޤައުމީ އިދާރާއިން ހޯމަ ދުވަހު ހާމަކޮށްފައިވާ ގޮތުގައި، މިއަދާ ހަމައަށް  އުތުރާއި މެދުރާއްޖެތެރޭގެ އެކި ހިސާބުތަކަށް ވިއްސާރަކުރުމާއެކު، ބައެއް ރަށްތަކަށް ގުގުރުން އެކަށީގެންވެއެވެ. ނަމަވެސް ދެކުނުގެ މޫސުން އާންމުގޮތެއްގައި ރަނގަޅުވާނެކަމަށް ވަނީ ލަފާކޮށްފައެވެ.

އަދި މެދުރާއްޖޭގެ ކަނޑުތައް ގަދަވެ، އުތުރުގެ ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެ ކަމަށް ވެސް އެ އިދާރާއިން ވަނީ ލަފާކޮށްފައެވެ. މީގެ އިތުރުން ދެކުނުގެ ކަނޑުތައް އާދައިގެ ވަރަކަށް މަޑުވާނެ ކަމަށް ވެސް ވަނީ ލަފާކޮށްފައެވެ. 

މޫސުމާ ބެހޭ ޤައުމީ އިދާރާއިން ވަނީ މިހާރު ރާއްޖެއަށް ކުރަމުންދާ ވިއްސާރައަކީ ރާއްޖެއާ ކައިރިން ސްރީލަންކާ ސަރަހައްދުގައި އުފެދިފައިވާ ތޫފާނަކާ ގުޅިގެން ކުރަމުންދާ ވިއްސާރައެއް ކަމަށް ވިދާޅުވެފައެވެ. މި ދުވަސްވަރަކީ މޫސުން ގޯސް ދުވަސްވަރެއްކަމުން، ހުރިހާ ފަރާތްތަކުން ވެސް މޫސުމަށް ސަމާލުވުމަށް މެޓުން ވަނީ އިލްތިމާސްކުރައްވާފައެވެ.