ރާއްޖޭގައި ކަނޑުގޮވާންކުރުމުގެ ޝައުޤުވެރިކަން ބޭރުގެ އިންވެސްޓަރުންގެ ބޮޑު: ވަޒީރު ޝިޔާމް

ރާއްޖޭގައި ކަނޑުގޮވާން ކުރުމުގެ ޝައުޤުވެރިކަން ބޭރުގެ އިންވެސްޓަރުންގެ އެބަހުރިކަމަށް މަސްވެރިކަމާ ކަނޑުގެ ވަޞީލަތްތަކާ ބެހޭ ވަޒީރު އަހްމަދު ޝިޔާމް ވިދާޅުވެއްޖެއެވެ.

ވަޒީރު ޝިޔާމް މިހެން ވިދާޅުވީ ޤައުމީ ޓީވީގައި ވާހަކަފުޅު ދައްކަވަމުންނެވެ. 

މަސްވެރިކަމާ ބެހޭ ވަޒީރު ޝިޔާމް ވިދާޅުވީ ރާއްޖޭގައި މެރިކަލްޗަރ ނުވަތަ ކަނޑުގޮވާންކުރުމުގެ ސިނާޢަތައް އިންވެސްޓްކުރާނެ ދިވެހި އަދި ބޭރުގެ ބައެއް އިންވެސްޓަރުންވެސް މިހާރު ޝައުޤުވެރިކަން ފާޅުކޮށްފައިވާކަމަށެވެ. ވަޒީރު ވިދާޅުވީ ރާއްޖެއާއި ބޭރުގެ އިންވެސްޓަރުންގެ ޕްރޮޕޯސަލްތައް ލިބެމުންދާ ގޮތުން އެނގިގެންދަނީ މި ސިނާޢަތަކީ ކުރިމަގުއޮތް ސިނާޢަތެއް ކަމަށެވެ. އަދި މި ސިނާޢަތަކީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ރާއްޖޭގެ މަސްވެރިކަމުގެ ސިނާޢަތް ސިންދަފާތުކުރާއިރު ވަރަށް ބޮޑަށް ކުރިއަރުވަން ބޭނުންވާ ދާއިރާއެއްކަމަށް ވަޒީރު ވިދާޅުވިއެވެ.

މެރިކަލްޗަރ ދާއިރާއިން މިސަރަހައްދުގައި ބޮޑު ދައުރެއް އަދާކުރާ ތަނަކަށް ރާއްޖެ ހެދުމަކީ ސަރުކާރުގެ ޢަމާޒެކެވެ. ރާއްޖޭގައި މެރިކަލްޗަރ ސިނާޢަތް ތަރައްޤީކުރަން ސަރުކާރުން ވަނީ 4 ސަރަޙައްދެއް ކަނޑައަޅުއްވާފައެވެ. އެއީ ބޮޑު ތިލަދުންމައްޗާއި، ރ.އަތޮޅާއި މ.އަތޮޅުގެ އިތުރުން ތ. އަތޮޅެވެ. މީގެއިތުރުން މަނިޔަފުއްޓާއި ގާތްގަނޑަކަށް 2 ކިލޯމީޓަރު ދުރުގައި އޮތް ފަޅެއްވެސް މިކަމަށްވަނީ ކަނޑައަޅާފައެވެ. 

މިމަސައްކަތްކުރާ އެހެން ޤައުމުތަކާ ބަލާއިރު މިކަން ކުރުމަށް ބޮޑެތި ލުއިތަކެއް ދިނުމަށް ސަރުކާރުންވަނީ ނިންމަވާފައެވެ. އެގޮތުން މިމަސައްކަތް ކުރުމަށް ރަސްމީކޮށް ކަނޑައަޅާފައިވާ 4 ސަރަޙައްދުން ނަގާ ބިމަށް ލޭންޑް އެކުއިޒިޝަނަށް ފައިސާ ނުނަގާގޮތަށާއި، ފުރަތަމަ 3 އަހަރުގެ ބިމު ކުލި ނުނެގުމަށްވަނީ ނިންމަވާފައެވެ. ހަމައެއާއެކު މިމަސައްކަތަށް ބޭނުންވާ ވަޞީލަތް ރާއްޖެ އެތެރެކުރުމަށް ޑިއުޓީ މާފުކުރުމަށްވެސް ސަރުކާރުންވަނީ ނިންމަވާފައެވެ.