2025 ވަނަ އަހަރު މަރުވި ނޫސްވެރިންގެ ތެރެއިން ދެބައިކުޅަ އެއްބަޔަކީ އިޒްރާއިލް ސިފައިން ޝަހީދުކޮށްލި ނޫސްވެރިން

2025 ވަނަ އަހަރު ދުނިޔޭގައި މަރުވި ނޫސްވެރިންގެ ތެރެއިން ދެބައިކުޅަ އެއްބައި ނޫސްވެރިން ޝަހީދުކޮށްލައިފައިވަނީ އިޒްރޭލް ސިފައިންގެ ހަމަލާތަކުގައި ކަމަށް ނޫސްވެރިންގެ މިނިވަންކަމަށް މަސައްކަތްކުރާ ބައިނަލްއަޤްވާމީ ޖަމްޢިއްޔާ، ރިޕޯޓަރސް ވިތައުޓް ބޯޑަރސް (އާރްއެސްއެފް) އިން ބުނެފިއެވެ.

އެ ޖަމްޢިއްޔާއިން ރިޕޯޓުކޮށްފައިވާ ގޮތުގައި، މި އަހަރު މަރުވި ނޫސްވެރިންގެ 43 އިންސައްތަ މީހުން ޝަހީދުވެފައިވަނީ ޣައްޒާގައި އިޒްރޭލުން ދިން ހަމަލާތަކުގައެވެ.

ޣައްޒާގެ ސަރުކާރު މީޑިއާ އޮފީހުން ވެސް ވަނީ މި ޢަދަދުތައް އަޕްޑޭޓްކޮށްފައެވެ. އެ އޮފީހުން ބުނި ގޮތުގައި، 2023 ވަނަ އަހަރުގެ އޮކްޓޯބަރު 7 ގައި ޣައްޒާގައި ނަސްލު ނައްތާލުމުގެ ޖަރީމާ ފެށުނު ފަހުން އިޒްރޭލް ސިފައިން ވަނީ 257 ފަލަސްތީނުގެ ނޫސްވެރިން ޝަހީދުކޮށްލައިފައިވެއެވެ.

އާރްއެސްއެފް އިން ބުނި ގޮތުގައި މި އަހަރު ޖުމްލަ 67 ނޫސްވެރިން ޝަހީދުވެފައިވެއެވެ. އޭގެ ތެރެއިން 53 ނޫސްވެރިން ޝަހީދުވެފައިވަނީ ހަނގުރާމަވެރި ސަރަހައްދުތަކުގައި ނުވަތަ ކުށްވެރި ޖަމާޢަތްތަކުގެ އަތްމަތީގައެވެ. އާރްއެސްއެފް އިން ވަނީ ސޫދާނަކީ ވެސް މި އަހަރު މީޑިއާގެ މަސައްކަތްތެރިންނަށް ނުރައްކާތެރި ހަނގުރާމަވެރި ސަރަހައްދެއްގެ ގޮތުގައި ސިފަކޮށްފައެވެ.

މީގެ އިތުރުން، މެކްސިކޯގައި އޮތް ކުށްކުރާ ޖަމާޢަތްތަކުގެ ސަބަބުން ނޫސްވެރިން މެރުން ވަނީ ވަރަށް ބޮޑަށް އިތުރުވެފައެވެ. އާރްއެސްއެފް އިން ބުނި ގޮތުގައި ނުވަ ނޫސްވެރިން މަރާލުމާއެކު 2025 ވަނަ އަހަރަކީ ފާއިތުވި ތިން އަހަރުގެ ތެރެއިން އެންމެ ގިނަ ނޫސްވެރިން މަރުވި އަހަރެވެ. މިހާރު މެކްސިކޯ ވަނީ ނޫސްވެރިންނަށް ދުނިޔޭގެ އެންމެ ނުރައްކާތެރި ދެވަނަ ޤައުމުގެ ގޮތުގައި ފާހަގަކުރެވިފައެވެ.

އާރްއެސްއެފް އިން ފާހަގަކުރާ ގޮތުގައި ނޫސްވެރިންނަށް އެންމެ ބޮޑު ނުރައްކަލެއް ކުރިމަތިވަނީ އެމީހުންގެ އަމިއްލަ ޤައުމުތަކުގައެވެ. ދުނިޔޭގެ 37 ޤައުމެއްގައި 135 ނޫސްވެރިން ގެއްލިފައިވެއެވެ. އާރްއެސްއެފް އިން ބުނި ގޮތުގައި އެމީހުންގެ ތެރެއިން 72 އިންސައްތަ މީހުން ގެއްލިފައިވަނީ މެދުއިރުމައްޗާއި ލެޓިން އެމެރިކާގައެވެ. އަދި ބައެއް މީހުން 30 އަހަރަށް ވުރެ ގިނަ ދުވަސް ވެފައިވާ ކަމަށް ވެސް އެ ޖަމްޢިއްޔާއިން ބުނެއެވެ.

އާރްއެސްއެފްގެ ޑިރެކްޓަރު ޖެނެރަލް ކްރިސްޓޯފް ޑެލޮއިރް ވިދާޅުވީ މި އަހަރު 67 ނޫސްވެރިން މަރުވީ އެއްވެސް އެއްޗެއް ނުވެ ހުއްޓާ ނޫން ކަމަށާއި، އެމީހުން މަރުވީ އެމީހުންގެ މަސައްކަތުގެ ސަބަބުން ކަމަށެވެ. އޭނާ ވަނީ ނޫސްވެރިކަމުގެ މިނިވަންކަން ހިމާޔަތްކޮށް، އިސްލާޙަށް މަސައްކަތްކުރާ ކަމަށް ވާނަމަ މީޑިއާގެ ފާޑުކިޔުންތައް ޤަބޫލުކުރެވޭނެ ކަމަށް ވިދާޅުވެފައެވެ.

ނަމަވެސް އޭނާ ވަނީ ނޫސްވެރިންނަށް އަމާޒުކޮށް ހިންގާ ނަފްރަތުގެ ކެމްޕޭންތަކާ މެދު އިންޒާރު ދެއްވާފައެވެ. އޭނާ ވިދާޅުވީ މިފަދަ ނަފްރަތުގެ ވެއްޓެއް އުފައްދައި، ނުވަތަ އެކަމަށް ހިތްވަރުދެނީ ހަތިޔާރުއެޅި ސިފައިންނާއި ކުށްވެރި ޖަމާޢަތްތަކުން ކަމަށެވެ.

ޑެލޮއިރް ވިދާޅުވީ މިފަދަ އަނިޔާވެރިކަމަށް ހިތްވަރު ލިބެނީ ޢަދުލުވެރިކަން ނެތުމުގެ ސަބަބުން ކަމަށެވެ. އޭނާ ވިދާޅުވީ ބައިނަލްއަޤްވާމީ މުއައްސަސާތަކަށް ހަނގުރާމަތަކާއި ކުރިމަތިލުންތަކުގައި ނޫސްވެރިން ހިމާޔަތްކުރުމަށް ނުކުޅެދިފައިވާ ކަމަށާއި، ސަބަބަކީ ސަރުކާރުތަކަށް މިފަދަ ކަންކަމުގައި ޢަމަލުކުރުމުގެ ހިތްވަރު ގެއްލިފައިވާތީ ކަމަށެވެ.