ބީއެމްއެލްއާއި ވިސާގެ 22 އަހަރުގެ ގުޅުން ފާހަގަކުރުމަށް ރާއްޖެއަށް މުޅިން އައު ދެ ޚިދުމަތެއް ތަޢާރަފްކޮށްފި

ބޭންކް އޮފް މޯލްޑިވްސް (ބީއެމްއެލް) އާއި ދުނިޔޭގެ އެންމެ ބޮޑު ޑިޖިޓަލް ޕޭމަންޓްސް ކުންފުނި ވިސާގެ ދެމެދުގައިވާ 22 އަހަރު ދުވަހުގެ ދިގު ޕާޓްނާޝިޕް ފާހަގަކުރުމުގެ ގޮތުން، ރާއްޖެއަށް މުޅިން އައު ދެ ޚިދުމަތެއް ތަޢާރަފްކޮށްފިއެވެ. މި ޚިދުމަތްތައް ތަޢާރަފްކޮށްފައިވަނީ މިއަދު މާލޭގައި ބޭއްވުނު ޚާއްސަ ރަސްމިއްޔާތެއްގައެވެ.

ތަފްސީލަށް ބަލާއިރު، ތަޢާރަފްކޮށްފައިވާ ދެ ޚިދުމަތަކީ، މުޅި ރާއްޖޭގައި މާލީ ހޭލުންތެރިކަމުގެ ޕްރޮގްރާމެއް ހިންގުމަށް ވިސާއާއެކު ޤާއިމްކުރެވުނު ސްޓްރެޓީޖިކް ޕާޓްނާޝިޕަކާއި، ވިސާގެ އިންފިނިޓް ކްރެޑިޓް ކާޑެވެ. މިއީ ރާއްޖެއަށް ތަޢާރަފްކުރެވުނު ފުރަތަމަ މެޓަލް ކާޑުކަން ފާހަގަކޮށްލެވެއެވެ.

Introducing Visa Infinite Credit Card, a first in the Maldives! 🚀

The cardholders can enjoy VIP status at luxury hotels, seamless airport experiences—including fast-track immigration, personalized Meet and Assist, and access to over 2,000 premium lounges worldwide.

View… pic.twitter.com/AUBizsAe1L

— Bank of Maldives (@bankofmaldives) December 10, 2025

މާލީ ހޭލުންތެރިކަމުގެ ޕްރޮގްރާމް އިފްތިތާޙުކޮށް އެއްބަސްވުމުގައި ސޮއިކުރެއްވީ، ތަޢުލީމީ ވަޒީރު ޑރ. އިސްމާޢީލް ޝަފީޢު، ވިސާއިން ރާއްޖެއާއި ސްރީލަންކާއަށް ކަނޑައަޅުއްވާފައި ހުންނަވާ ކަންޓްރީ މެނޭޖަރ އަވަންތި ކޮލަމްބަގެ އަދި ބޭންކް އޮފް މޯލްޑިވްސްގެ ސީއީއޯ އެންޑް މެނޭޖިންގ ޑިރެކްޓަރ މުޙައްމަދު ޝަރީފެވެ. އަދި ވިސާގެ އިންފިނިޓް ކްރެޑިޓް ކާޑު އިފްތިތާޙުކޮށްދެއްވީ، މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރު މޫސާ ޒަމީރެވެ.

މި ރަސްމިއްޔާތުގައި ވާހަކަފުޅު ދައްކަވަމުން ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވީ، ބޭންކް އޮފް މޯލްޑިވްސްއިން އިފްތިތާޙުކުރި ފައިނޭންޝަލް ލިޓްރަސީ ޕްރޮގްރާމުގެ ސަބަބުން ރާއްޖޭގެ އިޤްތިޞާދަށް ވަރަށް ބޮޑެތި ފައިދާތަކެއް ކުރާނެ ކަމަށެވެ.

މި ޕްރޮގްރާމަކީ، އަންނަން އޮތް ޖީލުތަކަށް މާލީ ކަންކަމުގައި ހޭލުންތެރިކަމާއެކު ގޮތް ނިންމުމުގައި އެހީތެރިވާނެ ޕްރޮގްރާމެއް. ދަރިވަރުންނަށް ހަރުދަނާ މާލީ ބިންގާއެއް އެޅުމަށް އެހީތެރިވެރިވެ ދިނުމަކީ، މި ޤައުމުގެ އިގްތިސާދު ހަރުދަނާ ކުރުމަށް ދިގު މުއްދަތަށް އެޅޭ މުހިންމު ފިޔަވަޅެއް

ވަޒީރު ޑރ. އިސްމާޢީލް ޝަފީޢު 

ބީއެމްއެލްގެ މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވީ، ބީއެމްއެލުން ކަސްޓަމަރުންނަށް ޕްރިމިއަމް ބޭންކިންގ ޚިދުމަތެއް ފޯރުކޮށްދިނުމަށް މި ކާޑު ތަޢާރަފް ކުރުމަކީ ލިބޭ ފަޚުރެއް ކަމަށެވެ.

މި ކާޑުން ކަސްޓަމަރުންނަށް ޚާއްޞަ އެކްސްކްލޫސިވް ބެނެފިޓްތަކަކާއި، ކަސްޓަމަރުންގެ ލައިފް ސްޓައިލްއާ ގުޅޭ ގޮތަށް ފަރުމާކޮށްފައިވާ ލަގްޒަރީ ޚިދުމަތްތައް ލިބޭނެ. މި ކާޑު ރާއްޖެއަށް ތަޢާރަފު ކުރުމުން ދައްކުވައިދެނީ، ރާއްޖޭގެ މުޖުތަމަޢަށް ދުނިޔޭގެ ފެންވަރުގެ ޕޭމަންޓް ހައްލުތައް ތަޢާރަފް ކުރުމަށް ބޭންކުން ދޭ އަހައްމިއްޔަތުކަން.

ސީއީއޯ މުޙައްމަދު ޝަރީފު 

ބޭންކް އޮފް މޯލްޑިވްސްއިން މުޅި ރާއްޖޭގައި މާލީ ހޭލުންތެރިކަމުގެ ޕްރޮގްރާމެއް ހިންގުމަށް ވިސާއާއެކު ޤާއިމްކޮށްފައިވާ ސްޓްރެޓީޖިކް ޕާޓްނާޝިޕުގެ ދަށުން، ޒުވާނުންނާއި، ކުދި އަދި މެދުފަންތީގެ ވިޔަފާރިތަކާއި، ތަޢުލީމީ އިދާރާތަކާއި، އެކިއެކި މުޖުތަމަޢުތަކުގައި މާލީ ހޭލުންތެރިކަން އިތުރު ކުރުމަށް މުހިންމު މަސައްކަތްތަކެއް ކުރުމަށްވެސް ވަނީ ހަމަޖެހިފައެވެ.

ބީއެމްއެލުން ރާއްޖެއަށް ތަޢާރަފް ކުރި ވިސާގެ އިންފިނިޓް ކްރެޑިޓް ކާޑަކީ، ރާއްޖެއަށް ތަޢާރަފް ކުރި ފުރަތަމަ މެޓަލް ކާޑެވެ. ބީއެމްއެލުން ވިދާޅުވީ، ވިސާ އިންފިނިޓް ކާޑު ހޯލްޑަރުންނަށް ލަގްޒަރީ ހޮޓެލްތަކުގައި ވީއައިޕީ ސްޓޭޓަސްއާއި، އިންޓަރނޭޝަނަލް އެއަރޕޯޓުތަކުގައި ފަސޭހަ އަދި ފުރިހަމަ ޚިދުމަތެއް ލިބޭނެ ކަމަށެވެ. އެގޮތުން ފާސްޓް ޓްރެކް އިމިގްރޭޝަން، ޕަރސަނަލައިޒްޑް މީޓް އެންޑް އެސިސްޓް، އަދި ދުނިޔޭގެ އެކި ކަންކޮޅުތަކުގައި 2،000 އަށްވުރެ ގިނަ ޕްރިމިއަމް ލައުންޖްތަކަށް އެކްސެސް ލިބުމާއެކު، ޕްރިޔޯރިޓީ ރިސަރވޭޝަން ޚިދުމަތްތައް ލިބޭނެކަންވެސް އެ ބޭންކުން ފާހަގަކުރެއެވެ.

2002 ވަނަ އަހަރު ވިސާގެ ކާޑުތައް ރާއްޖެއަށް އެންމެ ފުރަތަމަ ތަޢާރަފްކުރީވެސް ބީއެމްއެލްއިންނެވެ. އަދި މިދިޔަ އަހަރު އެބޭންކުން ވަނީ، ރާއްޖޭގެ ފުރަތަމަ ޝަރީޢާ ކޮމްޕްލަޔަންޓް ވިސާ ކްރެޑިޓް ކާޑު ތަޢާރަފްކޮށްފައެވެ. ކްލަސިކް، ގޯލްޑް، ޕްލެޓިނަމް ވިސާ ކްރެޑިޓް ކާޑުތަކާއެކު ކްލާސިކް ޑެބިޓް އަދި ދާދިފަހުން ތަޢާރަފް ކުރި ޕްލެޓިނަމް ކާޑާއެކު ވިސާގެ ޑެބިޓް ކާޑުތައްވެސް ބޭންކުން އަންނަނީ ދޫކުރަމުންނެވެ.