އެލިއޮޓްއަށް ދާއިމީ ކޮންޓްރެކްޓެއް ދޭން ބޭނުންނުވާކަމަށް އުނާއި އެމްރޭ ބުނެފި

ލޯނު އެއްބަސްވުމެއްގެ ދަށުން އެސްޓަން ވިލާއަށް ކުޅެމުންދާ ލިވަޕޫލްގެ ހާވީ އެލިއޮޓްއަށް ދާއިމީ ކޮންޓްރެކްޓެއް ދޭން ނުވިސްނާކަމަށް، އެ ޓީމުގެ ކޯޗު އުނާއި އެމްރޭ ބުނެފިއެވެ.

މިދިޔަ ސީޒަނަށްފަހު ކުޅުންތެރިން ބަދަލުވުމަށް ހުޅުވާލި މުއްދަތުގެ ތެރެއިން އެންމެ ފަހު ދުވަހު ޓީމު ބަދަލުކުރި އުމުރުން 22 އަހަރުގެ މިޑްފީލްޑަރު، ވިލާއަށް ބަދަލުފިހުން ކުޅުމުގެ ފުރުސަތު ލިބިފައި ވަނީ އެންމެ 7 މެޗުގައެވެ. 

ވިލާ އާއި ލިވަޕޫލްއާ ދެމެދު ހަދާފައިވާ އެއްބަސްވުމުގެ ދަށުން، އެލިއޮޓް ވިލާއަށް 10 މެޗު ކުޅެފިނަމަ، 35 މިލިއަން ޕައުންޑަށް ދާއިމީ އެއްބަސްވުމެއްގެ ދަށުން އޭނާ ގަތުމުގެ ފުރުސަތު ވިލާއަށް އޮންނާނެއެވެ.

_{އެލިއޮޓް ވަނީ ލިވަޕޫލްއާއެކު ގިނަ ކާމިޔާބީތަކެއް ހޯދާފައި---}

21 އަހަރުން ދަށުގެ ޔޫރޯ ކާމިޔާބުކުރި އިނގިރޭސި ޓީމުގައި ވެސް ހިމެނުނު އެލިއޮޓް، މިރޭ ޔޫރޮޕާ ލީގުގައި ބާސެލްއާ ދެކޮޅަށް ކުޅޭ މެޗުގެ ސްކޮޑުގައި ހިމަނާފައެއް ނުވެއެވެ.

އެންމެ ފަހުން އެލިއޮޓް ބޭނުންކޮށްފައި ވަނީ މިދިޔަ އޮކްޓޫބަރު މަހުގެ 2ވަނަ ދުވަހުގެރޭ ޔޫރޮޕާ ލީގުގައި ފެޔެނޫދުއާ ދެކޮޅަށް ކުޅުނު މެޗުގައި ބަދަލު ކުޅުންތެރިއެއްގެ ގޮތުގައެވެ. އެހެންކަމުން އޭނާ އެއްވެސް މެޗެއްގައި ބޭނުން ނުކުރާތާ މިހާރު ދެ މަސް ފާއިތުވެއްޖެއެވެ.

ޔޫރޮޕާ ލީގު މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން އެމްރޭ ބުނީ، އެލިއޮޓްއަށް ދާއިމީ ކޮންޓްރެކްޓެއް ދިނުމަށް އެއްވެސް ވަރަކަށް ނުވިސްނާ ކަމަށެވެ. 

އެމްރޭ އިތުރަށް ބުނީ، ކުޅުންތެރިއެއްގެ ހައިސިއްޔަތުން އޭނާއަށް ވަރަށް އިޙްތިރާމްކުރާ ކަމަށާއި، އަދި ދެ ފަރާތަށް ވެސް ގެއްލުން ނުވާނެ ޙައްލެއް ހޯދުމަށް ވިސްނަމުންދާ ކަމަށެވެ. 

ނަމަވެސް މި ސީޒަނުގައި އިތުރު ކްލަބަކަށް އޭނާއަށް ބަދަލެއް ނުވެވޭނެއެވެ. އެއީ މި ސީޒަންގައި ލިވަޕޫލް އާއި ވިލާއަށް ވެސް ކުޅެފައިވުމުންނެވެ. ފީފާގެ ޤަވާއިދު ބުނާ ގޮތުން، އެއް ސީޒަނެއްގައި ކުޅުންތެރިއަކަށް ދެ ކްލަބަށް ވުރެ ގިނަ ކްލަބަކަށް ނުކުޅެވޭނެއެވެ.