ޚަބަރު
އަތްދަބަހުގައި މަސްތުވާތަކެތި ގެންގުޅު އަންހެނަކު ހައްޔަރުކޮށްފި!
ފުލުހުންގެ މައި އިދާރާ. ފޮޓޯ: ދައުރު
އަތްދަބަހުގައި މަސްތުވާތަކެތި ގެންގުޅު އަންހެނަކު ދިވެހި ފުލުހުންގެ ޚިދުމަތުން ހައްޔަރުކޮށްފިއެވެ.
މިމައްސަލާގައި ފުލުހުން ހައްޔަރުކޮށްފައިވަނީ މާލެ ސިޓީއަށް ނިސްބަތްވާ 25 އަހަރުގެ އަންހެނެކެވެ. މަސްތުވާތަކެތި ގެންގުޅެ އެ ތަކެތި ބޭނުން ކުރާ ކަމަށް ތުހުމަތު ކުރެވޭ މި އަންހެން މީހާ ހައްޔަރުކޮށް، އޭނާގެ ބަންދާއި މެދު ގޮތެއް ނިންމުމަށް މިއަދު ކްރިމިނަލް ކޯޓަަށް ހާޒިރު ކުރުމުން އޭނާގެ ބަންދަަށް އެ ކޯޓުން ވަނީ 15 ދުވަސް ޖަހައިފައެވެ.
އޭނާއާ ގުޅޭ ބަންދު އަމުރުގައި ބުނެފައި ވަނީ އޭނާގެ މައްޗަށް ތުހުމަތު ކުރެވޭ ކުށް އޭނާ ކުރި ކަމަށް ތުހުމަތު ކުރެވޭ މިންވަރަށް ހެކި ގަރީނާ ހުށަހަޅާފައިވާ ކަމަށެވެ.
ބަންދުން ދޫކޮށްލައިފިނަމަ މުޖުތަމައުއަށް ނުރައްކާވެދާނެތީ އޭނާ ބަންދު ކުރަން އަމުރުކޮށްފައި ވެއެވެ. އަދި މި މައްސަލައިގައި ފެނިފައިވާ އަތްދަބަހުން ފެނުނު ތަކެއްޗަކީ އޭނާގެ މަސްތުވާތަކެތި ކަމަށް ސީންގައި ބުނެފައިވާ ކަމަށް ތަހުޤީޤުގެ ބަޔާނުގައި ވެއެވެ.
އަދި އެ އަންހެން މީހާއަކީ ބަންދު، އަދި ހައްޔަރުގެ ރެކޯޑް އޮންނަ މީހެއް ކަމަަށްވެސް އެ އަމުރުގައި ވެއެވެ. މިމައްސަލާގައި ހިމެނޭ މީހާގެ ނަން ހާމަކޮށްފައެއް ނުވެއެވެ.