ގުޅީފަޅުގައި ނުހިއްކައި އޮތް ބައި ވަރަށް އަވަހަށް ހިއްކައި ނިންމާނެ: ވަޒީރު ހައިދަރު

ގުޅީފަޅުގައި ނުހިއްކައި އޮތް ބައި ވަރަށް އަވަހަށް ހިއްކައި ނިންމާނެ ކަމަށް ގެދޮރުވެރިކަމާ ބިމާއި ޢުމްރާނީ ތަރައްޤީއާ ބެހޭ ވަޒީރު ޑރ ޢަލީ ހައިދަރު ވިދާޅުވެއްޖެއެވެ. 

ދައުލަތުގެ މީޑިއާ ގައި ވާހަކަފުޅު ދައްކަވަމުން ވަޒީރު ހައިދަރު ވިދާޅުވީ ގުޅީފަޅުން ވަރަށް އަވަހަށް ބިން ހިއްކަން ފަށާނެ ކަމަށެވެ. އަދި ބިން ހިއްކުނުހާ އަވަހަަށް މީހުންނަށް އެމީހުންގެ ގޯތިތައް ހަވާލު ކުރެވޭނެ ކަމަށެވެ.

ވަޒީރު ވިދާޅުވީ ގުޅިފަޅުން އަދި  ގޯތި ހަވާލު ކުރެވެން ނެތް ކަމަށާއި، އެކަމަކު މިހާރު އެ ހުރި ގޯތި ލިބޭނެ ތަން ކަނޑައަޅައި ގުރުއަތުލާން ނިންމާފައި ވާކަމަށެވެ. ގުޅިފަޅުގައި ހިއްކަން ޖެހޭ ބޮޑު ސަރަހައްދެއް އެބައޮތްކަމަށާއި، އެއީ އެންމެ ފުން ސަރަހައްދު ކަމަށް އެމަނިކުފާނު ވިދާޅުވިއެވެ. އަދި އެ މަސައްކަތް ވަރަށް އަވަހަށް ފެށިގެންދާނެ ކަމަށްވެސް ޑރ ހައިދަރު ވިދާޅުވިއެވެ. 

މިދިޔަ ސަރުކާރުން ނެދަލެންޑުގެ ބޮސްކާލިސް ކުންފުންޏާއި ހަވާލުކޮށްގެން ގުޅީފަޅުން ވަނީ 150 ހެކްޓަރުގެ ބިން މިދިޔަ އަހަރު ހިއްކާ ނިންމާފައެވެ. ނަމަވެސް މިދިޔަ ސަރުކާރުން ގުޅީފަޅުން މާލޭ މީހުންނަށް ގޯތި ދީ ރަޖިސްޓްރީ ވެސް ހަވާލުކޮށްފައި ވަނިކޮށް މި ސަރުކާރުން އެތަނުގެ ލޭންޑް ޔޫސް ޕްލޭން ބަދަލުކޮށް ގޯތި ލިބޭ ތަންތަން ވަނީ އަލުން ކަނޑައަޅައިފައެވެ. މިސަރުކާރުން ވަނީ ގުޅީފަޅުން އަދި އިތުރު 85 ހެކްޓަރުގެ ބިން ހިއްކަން ނިންމަވާފައެވެ.

އެމްޓީސީސީއާ ހަވާލުކޮށްގެން ގުޅިފަޅުން އިތުރަށް ހިއްކަން ނިންމާފައިވާ 85 ހެކްޓަރުގެ ބިން ހިއްކުން ލަސްވަނީ އެކަމަށް ބޭނުންވާ ފައިސާ ހަމަނުޖެހޭތީ ކަމަށް އިމާރާތްކުރުމާ ބިނާރާ ބެހޭ ވަޒީރު ޑރ ޢަބްދުﷲ މުއްޠަލިބް ވަނީ މިދިޔަ މަހު ވިދާޅުވެފައިއެވެ.

ލޭންޑް ޔޫސް ޕްލޭނަށް ގެނައި ބަދަލާ އެކު، ގުޅިފަޅުން އިތުރު 3،520 ގޯތި ދޫކުރަން ވަނީ ނިންމައިފައެވެ.