ބޮޑީބިލްޑިންގ މުބާރާތުގައި ސަރުކާރުގެ ދައުރެއް ނެތް، އެސޯސިއޭޝަނުން މަޢާފަށް އެދިއްޖެ!

އައްޑޫ ސިޓީގައި ކުރިއަށް ގެންދިޔަ ބޮޑީބިލްޑިންގ މުބާރާތުގައި ސަރުކާރުގެ ދައުރެއް ނެތް ކަމަށް ބުނެ ބޮޑީބިލްޑިންގ އެސޯސިއޭޝަނުން މަޢާފަށް އެދިއްޖެއެވެ. 

އެއެސޯސިއޭޝަނުން މަޢާފަށް އެދިފައިވަނީ އެއެސޯސިއޭޝަނުން ނެރުނު ނޫސް ބަޔާނެއްގައެވެ. 

ނޫސް ބަޔާނުގައި ބުނެފައިވަނީ އާއްމުންގެ ނުރުހުން އަމާޒުވި ބޮޑީބިލްޑިންގ މުބާރާތް ބާއްވާފައި ވަނީ އާއްމު ދިރިނޫޅޭ ސަރަހައްދެއްގައިކަމަށާއި، އަދި އެއީ ރިސޯޓެއް ހިންގުމަށް ހުއްދަ ދީފައިވާ ރަށެއްކަމަށެވެ. 

ނަމަވެސް އެ މުބާރާތާއި ގުޅިގެން އާއްމުން ރައްޔިތުންގެ ކަންބޮޑުވުން ހުރުމާއެކު، ރައީސް ޑރ. މުހައްމަދު މުއިއްޒު އާއި ދިވެހި ރައްޔިތުންގެ ފަރާތުން މަޢާފަށް އެދޭކަމަށް ބޮޑީބިލްޑިން އެސޯސިއޭޝަން އޮފް މޯލްޑިވްސްއިން ނެރުނު ނޫސް ބަޔާނުގައިވެއެވެ. އަދި މުސްތަޤްބަލްގައި މިފަދަ ކަމެއް ތަކުރާރުނުވާނެކަމުގެ ފުރިހަމަ ޔަޤީންކަން ދިވެހި ރައްޔިތުންނަށް އަރުވާކަމަށްވެސް އެ ބަޔާނުގައިވެއެވެ.

މިމުބާރާތާއި ގުޅިގެން އާންމުންގެ ގިނަ ބަޔަކު ވަނީ ވަރަށް ބޮޑަށް ނުރުހުން ފާޅުކޮށްފައެވެ. އަދި ދީނީ ޢިލްމުވެރިންގެ ތެރެއިން ގިނަ ބޭފުޅުން ވަނީ މިކަން ވަރަށްބޮޑަށް ކުށްވެރިކޮށްފައެވެ. އިސްލާމީ ކަންތައްތަކާއި ބެހޭ ވަޒީރު ޑރ މުޙައްމަދު ޝަޙީމް ޢަލީ ސަޢީދުވެސް ވަނީ މިކަން ކުށްވެރިކުރައްވައިފައެވެ.