މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާގެ ޚާއްޞަ އިނާމު ދެއްވައިފި

މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމު  ދެއްވައިފިއެވެ. މި އިނާމުތައް ދެއްވީ، ޖުމްހޫރީ ދުވަހުގެ މުނާސަބަތުގައި  ދަރުބާރުގޭގައި ބޭއްވެވި ރަސްމީ ޖަލްސާގައި، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއެވެ.

ޚާއްޞަ އިނާމު ލިބިވަޑައިގެންނެވި ބޭފުޅުންނަށް ރައީސުލްޖުމްހޫރިއްޔާ ދެއްވީ މެޑެއްޔަކާއި، ހަނދާނީ ލިޔުމެކެވެ.

މި އަހަރުގެ ޚާއްޞަ އިނާމު 40 ބޭފުޅަކަށް ލިބިވަޑައިގެންނެވިއެވެ. އެބޭފުޅުންގެ ތެރޭގައި ހިމެނެނީ، މަތީ ތަޢުލީމާއި ތަމްރީނުގެ ކޯހަކުން ފާހަގަކޮށްލެވޭ ކާމިޔާބީއެއް ހޯދައިފައިވާ ފަރާތްތަކެވެ. އެގޮތުން ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑުގެ ލެވެލް 10 ގެ ސަނަދެއް ހާސިލުކުރުމުގައި ފާހަގަކޮށްލެވޭ ކާމިޔާބެއް ހޯދައިފައިވާ 2 ބޭފުޅަކާއި، ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑުގެ ލެވެލް 7 ނުވަތަ ލެވެލް 8 ނުވަތަ ލެވެލް 9 ގެ ސަނަދެއް ހާސިލުކުރުމުގައި އެންމެ މަތީ ވަނަ ހޯދައިފައިވާ 38 ބޭފުޅަކު ހިމެނެއެވެ.

ލެވެލް 10 ގެ ސަނަދު ހާސިލުކުރުމުގައި ފާހަގަކޮށްލެވޭ ކާމިޔާބީއެއް ހޯދި ދެ ބޭފުޅުންނަކީ ޑޮކްޓަރ ޢާއިޝަތު ޝިނާ އާއި ޑޮކްޓަރ ޚަދީޖާ ރަޝީދެވެ. އަދި ލެވެލް 7، 8 އަދި 9 ގެ ސަނަދު ހާސިލުކުރުމުގައި އެންމެ މަތީ ވަނަ ހޯދި 38 ބޭފުޅުންގެ ތެރޭގައި އަލްއުސްތާޛާ ޢާއިޝަތު އިބްރާހީމް، އަލްފާޟިލާ ފާޠިމަތު ސަނާ އަދި އަލްފާޟިލާ ފާޠިމަތު ޣާޒިޔާ ފަތުޙީ ފަދަ ބޭފުޅުން ހިމެނެއެވެ.

މި އިނާމު ދިނުމުގެ މަޤްޞަދަކީ މަތީ ތަޢުލީމާއި ތަމްރީނުގެ ދާއިރާއިން ފާހަގަކޮށްލެވޭ ކާމިޔާބީތައް ހޯދާ ފަރާތްތަކުގެ އަގު ވަޒަންކޮށް، އެފަރާތްތަކަށް ހިތްވަރު ދިނުމެވެ. މި އިނާމު ދިނުމަކީ ކޮންމެ އަހަރަކުވެސް ޖުމްހޫރީ ދުވަހާ ގުޅުވައިގެން ކުރިއަށްގެންދާ ޚާއްޞަ ރަސްމިއްޔާތެކެވެ.