މިދިޔަމަހު އެންސްޕާއިން ބޭސްފަރުވާއަށް 35.1 މިލިޔަނަށްވުރެގިނައި ޚަރަދުކުރި

އާސަންދަ ސްކީމް ހިންގާ ސޯޝަލް ޕްރޮޓެކްޝަން އެޖެންސީ (އެންސްޕާ) އިން މިދިޔަ މަހު ބޭސްފަރުވާގެ ޚަރަދުތައް ހަމަޖެއްސުމަށް 35.1 މިލިޔަން ރުފިޔާއަށްވުރެ ގިނަ ފައިސާ ޚަރަދުކޮށްފައިވާ ކަމަށް އެ އިދާރާގެ ތަފާސްހިސާބުތަކުން ދައްކައިފިއެވެ.

މިއީ ބޭސްފަރުވާގެ ޚަރަދުތައް ހަމަޖެއްސުމަށް ދަތިވާ ފަރާތްތަކަށް އެހީތެރިކަން ފޯރުކޮށްދިނުމަށް ކުރި ޚަރަދެކެވެ. ނަމަވެސް، މި އަދަދު ވަނީ އޮކްޓޫބަރު މަހު ޚަރަދުކުރި 45.1 މިލިޔަން ރުފިޔާއާ އަޅާބަލާއިރު ދަށްވެފައެވެ.

އެންސްޕާގެ ތަފާސްހިސާބުތައް ދައްކާގޮތުގައި، މިދިޔަ މަހު ޚަރަދުކުރި 35.1 މިލިޔަން ރުފިޔާގެ ތެރެއިން ރާއްޖޭގައި ބޭސްފަރުވާކުރުމަށް 20.5 މިލިޔަން ރުފިޔާ ޚަރަދުކޮށްފައިވެއެވެ. އަދި ރާއްޖެއިން ބޭރުން ބޭސް ފަރުވާ ކުރުމަށް ޚަރަދުކޮށްފައިވަނީ 14.5 މިލިޔަން ރުފިޔާއެވެ. މި އަދަދުތަކުން ދައްކުވައިދެނީ އާސަންދަ ސްކީމްގެ ދަށުން ރާއްޖެއާއި ރާއްޖެއިން ބޭރުގައި ފަރުވާ ހޯދުމަށް ދެމުންދާ އެހީތެރިކަމުގެ ބޮޑުކަމެވެ.

އެންމެ ގިނައިން އެހީ ދީފައިވާ ބަލިތައް

ބޭސްފަރުވާގެ އެހީގެ ޕްރޮގްރާމް މެދުވެރިކޮށް މިދިޔަ މަހު އެންމެ ގިނައިން އެހީތެރިކަން ފޯރުކޮށްދީފައިވަނީ ވަކިވަކި ބަލިތަކަށެވެ. އެގޮތުން ކެންސަރު ބައްޔަށް ފަރުވާކުރުމަށް 135 ކޭސްއަކަށް އެހީތެރިކަން ފޯރުކޮށްދީފައިވާއިރު، ކަށީގެ އެކި ބަލިތަކުގެ ފަރުވާކުރުމަށް 130 ކޭސްއަކަށް މާލީ އެހީ ދީފައިވެއެވެ. މީގެ އިތުރުން ވިހެއުމާ ގުޅޭ 124 ކޭސްއަކާއި ނޭވާލާ ނިޒާމްގެ 112 ކޭސްއަކަށްވެސް އެންސްޕާއިން މިދިޔަ މަހު މާލީ އެހީ ދީފައިވެއެވެ.

އަމިއްލަ ހޮސްޕިޓަލްތަކަށް ޚަރަދުކުރި މިންވަރު

މާލެ ސަރަހައްދުގައި ހިންގާ އެންމެ ބޮޑު އަމިއްލަ ދެ ހޮސްޕިޓަލް ކަމަށްވާ އޭޑީކޭ އާއި ޓްރީޓޮޕް ހޮސްޕިޓަލުގައި އެޑްމިޓު ކޮށްގެން ބޭސްފަރުވާގެ އެހީއަށް މިދިޔަ މަހު ޖުމްލަ 7.6 މިލިޔަން ރުފިޔާ ހަމަޖައްސާފައިވެއެވެ. ޓްރީޓޮޕް ހޮސްޕިޓަލުގައި އެޑްމިޓު ކޮށްގެން އެހީއަށް އެދުނު 278 ކޭސްއަކަށް 4.5 މިލިޔަން ރުފިޔާ ހަމަޖައްސާދީފައިވާއިރު، އޭގެތެރެއިން 1.2 މިލިޔަން ރުފިޔާގެ އެހީ ފޯރުކޮށްދީފައިވަނީ ކަށީގެ ބަލިތަކުގެ 44 ކޭސްއަކަށެވެ. އަދި ކުޑަކުދިންގެ ބަލިތަކުގެ 19 ކޭސްއަކަށް 871،000 އަށް ވުރެ ގިނަ ރުފިޔާ، އަދި ވިހެއުމުގެ 60 ކޭސްއަކަށް 820،000 ރުފިޔާއަށް ވުރެ ގިނައިން ވަނީ ޚަރަދުކޮށްފައެވެ.

އޭޑީކޭ ހޮސްޕިޓަލުން މިދިޔަ މަހު އެހީއަށް އެދުނު 166 ކޭސްއަކަށް ޖުމްލަ 3.05 މިލިޔަން ރުފިޔާގެ އެހީ އެންސްޕާއިން ފޯރުކޮށްދީފައިވެއެވެ. އޭޑީކޭއިން ހޯދި ފަރުވާތަކުގެ ތެރެއިން އެންމެ ގިނައިން އެހީ ފޯރުކޮށްދީފައިވަނީ މައިބަދަ އާއި ނާރުގެ ބަލިތަކަށް ފަރުވާކުރުމަށެވެ. އެގޮތުން 17 ކޭސްއަކަށް 7 ލައްކައަށް ވުރެ ގިނަ ރުފިޔާ ޚަރަދުކޮށްފައިވާއިރު، ހިތުގެ އެކި ބަލިތަކުގެ 16 ކޭސްއަކަށް 6 ލައްކައަށް ވުރެ ގިނަ ރުފިޔާ ވަނީ ޚަރަދުކޮށްފައެވެ. މި ތަފާސްހިސާބުތަކުން ދައްކުވައިދެނީ އާސަންދަ ސްކީމްގެ ދަށުން ރާއްޖޭގެ އަމިއްލަ ހޮސްޕިޓަލްތަކުން ވެސް ގިނަ އަދަދެއްގެ ބަޔަކަށް ފަރުވާގެ އެހީތެރިކަން ލިބިގެންދާކަމެވެ.