އިޒްރޭލުން ޣައްޒާގައި ކައިވެނި ހަފްލާއަކަށް ބޮން އަޅައިފިީ

އިޒްރޭލުގެ އަސްކަރިއްޔާއިން ޣައްޒާ ސިޓީގައި ހިމާޔަތް ހޯދާފައިވާ ތަނަކަށް ނުރައްކާތެރި ހަމަލާއެއް ދީފިއެވެ. މިހަމަލާ ދީފައިވަނީ އެތަނުގަިއ ކައިވެނީގެ ހަފްލާއެއް ކުރިއަށް ދަނިކޮށެވެ.

މިހަމަލާ ދީފައިމިވަނީ ހަމަލާ ހުއްޓާލުމުގެ ދެވަނަ ފިޔަވައްސަށް ދިއުމާ ބެހޭ ގޮތުން ވާހަކަ ދައްކަން ޤަޠަރު، މިޞްރު އަދި ތުރުކީގެ އިސް އޮފިޝަލުން އެމެރިކާގައި ތިއްބަވަނިކޮށެވެ. މި ހަމަލާ ދީފައިވަނީ އެމެރިކާގެ ބައިވެރިވުމާއެކު އޮކްޓޯބަރު މަހު ފެށުނު ހަމަލާ ހުއްޓާލުމުގެ އެއްބަސްވުން ވަރަށް ބަލިކަށި ޙާލަތެއްގައި އޮތް ދަނޑިވަޅެއްގައި ކަން ފާހަގަކޮށްލަންޖެހެއެވެ.

ހުކުރު ދުވަހު ޣައްޒާ ސިޓީގެ ތުއްފާހު އަވަށުގައި އިޒްރޭލުން ދިން ހަމަލާގައި މަދުވެގެން ފަލަސްތީނުގެ ހަ ރައްޔިތުން ޝަހީދުވެ، އެތައް ބަޔަކު ޒަޚަމްވެފައިވެއެވެ. އަލްޖަޒީރާއަށް މަޢުލޫމާތު ދިން އެ ސަރަޙައްދުގެ މަސްދަރުތަކުން ބުނި ގޮތުގައި، ގެދޮރު ގެއްލިފައިވާ ފަލަސްތީނުގެ އާއިލާތައް ކައިވެނި ހަފްލާއަކަށް އެއްވެ ތިއްބާ، ސްކޫލެއްގެ ގޮތުގައި ބޭނުންކުރަމުންދިޔަ ހިމާޔަތުގެ މަރުކަޒެއްގެ ދެވަނަ ފަންގިފިލާއަށް އިޒްރޭލުގެ ޓޭންކު ބަޑީގެ ހަމަލާ ދިނެވެ.

ޣައްޒާ ސަރުކާރުގެ މީޑިއާ އޮފީހުން ބުނާ ގޮތުގައި، މި ހަމަލާއަކީ އޮކްޓޯބަރު މަހު އެމެރިކާގެ ބައިވެރިވުމާއެކު ހަމަލާ ހުއްޓާލުމުގެ އެއްބަސްވުން ފެށުނު ފަހުން އިޒްރޭލުން އެއްބަސްވުމާ ޚިލާފަށް ދިން ސަތޭކަޔަށް ވުރެ ގިނަ ހަމަލާތަކުގެ ތެރެއިން އެންމެ ފަހުގެ ހަމަލާއެވެ. މި ހަމަލާ ދީފައިވަނީ އެމެރިކާގެ ރައީސް ޑޮނަލްޑް ޓްރަމްޕްގެ މެދުއިރުމަތީގެ ޚާއްސަ މަންދޫބު، ސްޓީވް ވިޓްކޮފް، އަދި އެމެރިކާގެ އެހެނިހެން އިސް އޮފިޝަލުން ފްލޮރިޑާގެ މިއާމީގައި، ޣައްޒާ އެއްބަސްވުމުގެ ދެވަނަ ފިޔަވައްސަށް ދިއުމާ ބެހޭ ގޮތުން ވާހަކަތައް ފަށަން ތައްޔާރުވަމުން ދިޔަ ދަނޑިވަޅެއްގައެވެ.

އެމެރިކާގެ ޚާރިޖީ ވަޒީރު މާކޯ ރޫބިއޯ ވަނީ މި ވާހަކަތައް ޤަޠަރު، ތުރުކީ، މިޞްރު އަދި ޔުނައިޓެޑް ޢަރަބް އެމިރޭޓްސްގެ މަންދޫބުންނާ އެކު ކުރިއަށްދާކަން ކަށަވަރުކޮށްދެއްވާފައެވެ. އަދި އޭނާވެސް ފަހުން މި މަޝްވަރާތަކުގައި ބައިވެރިވެދާނެ ކަމަށް ވިދާޅުވިއެވެ. އޭނާ ހާމަކުރެއްވި ގޮތުގައި އެމެރިކާގެ އެންމެ އިސްކަމަކީ ހަމަލާ ހުއްޓާލުމުގެ އެއްބަސްވުމުގެ ފުރަތަމަ ފިޔަވަހި ފުރިހަމަ ކުރުމެވެ. އެގޮތުން ޣައްޒާގެ ކަންކަން ހިންގުމަށް ފަލަސްތީނުގެ ޓެކްނޮކްރެޓިކް ކޮމިޓީއެއް އުފެއްދުމާއި، ބޭރުގެ ބައިވެރިވުމާއެކު "ބޯޑް އޮފް ޕީސް" އެއް ޤާއިމުކުރުމާއި، އަދި ބައިނަލްއަޤްވާމީ ފުލުހުންގެ ބާރެއް އެ ސަރަޙައްދަށް ފޮނުވުމެވެ.

އެމެރިކާގެ އެންމެ އިސް ޚާރިޖީ ޑިޕްލޮމެޓް ވިދާޅުވީ، "ދިގު މުއްދަތުގައި މިހާރު އޮތް ޙާލަތު ދެމެހެއްޓެނިވި ކަމަށް އެއްވެސް މީހަކު ބުނެފައެއް ނުވެއެވެ. އަދި އެއީ ބޭނުންވާ ކަމެއްވެސް ނޫނެވެ. އެހެންކަމުން ފުރަތަމަ ފިޔަވަހި ފުރިހަމައަށް ނިންމާލުމަށް އަޅުގަނޑުމެން އަވަސްވެގަންނަނީ." އޭނާ އިތުރަށް ވިދާޅުވީ، "އެކަން ޤާއިމުކުރެވިއްޖެނަމަ، ދެވަނަ އަދި ތިންވަނަ ފިޔަވަހި ބިނާކުރުމަށް، އަލުން ބިނާކުރުމުގެ މަސައްކަތަށް އަދި ދިގު މުއްދަތުގެ އެހީ ހިޔުމެނިޓޭރިއަން އެހީތެރިކަމަށް ބޭނުންވާ ފަރާތްތައް ލިބޭނެ ކަމުގެ ފުރިހަމަ ޔަޤީންކަން އެބައޮތެވެ."

މީގެ ކުރިން އެމެރިކާގެ ނިއުސް އައުޓްލެޓް އެކްސިއޯސް އިން ރިޕޯޓްކޮށްފައިވާ ގޮތުގައި މިއާމީ ބައްދަލުވުމުގައި ޤަތަރުގެ ބޮޑުވަޒީރު އަދި ޚާރިޖީ ވަޒީރު ޝައިޚް މުޙައްމަދު ބިން ޢަބްދުއްރަޙްމާން ބިން ޖާސިމް އާލް ޘާނީ، ތުރުކީގެ ޚާރިޖީ ވަޒީރު ހަކާން ފިދާން އަދި މިޞްރުގެ ޚާރިޖީ ވަޒީރު ބަދްރު ޢަބްދުލްޢައްތީ ބައިވެރިވެވަޑައިގަންނަވާނެއެވެ. އެހެންކަމުން އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވެސް ހަމަލާ ހުއްޓާލުމުގެ ދެވަނަ ފިޔަވަހި އަދި ކުރިމަތިވެދާނެ ހާލަތްތައް ދިރާސާކުރުމަށް ސެކިއުރިޓީ މަޝްވަރާއެއް ބާއްވަމުންދާ ކަމަށް އިޒްރޭލުގެ އޮފިޝަލަކު ބުނެފައިވެއެވެ.