ސަރުކާރުން އެކި ކުންފުނިތަކަށް ދެން ޖެހޭ ފައިސާގެ 6.6 ބިލިޔަން ރުފިޔާ ދެވިއްޖެ!

ސަރުކާރުން އެކި ކުންފުނިތަކަށް ދޭން ޖެހި ނުދެވިހުރި ފައިސާގެ ތެރެއިން 6.6 ބިލިޔަން ރުފިޔާ މިފާއިތުވި އަހަރުތެރޭގައި ދެވިއްޖެކަމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު ވިދާޅުވީ މި ފައިސާއަކީ ހަމައެކަނި އަމިއްލަ ވިޔަފާރިތަކަށް ދޫކޮށްފައިވާ ފައިސާކަމަށް އެމަނިކުފާނު ވިދާޅުވިއެވެ.

ޖުމްހޫރީ ދުވަހުގެ ޖަލްސާގައި ރައީސް ޑރ މުޢިއްޒު ވިދާޅުވީ، މިހާ ހިސާބަށް އައިރު، 2 ހަފްތާއަށް ވުރެ ގިނަ ދުވަސްވެފައިވާ، ފަސް މިލިޔަން ރުފިޔާއަށް ވުރެ ދަށް ހުރިހާ ބިލްތަކަށް ފައިސާ ދައްކާ ޚަލާސްކޮށްފައިވާ ކަމަށެވެ.ރައީސް މުޢިއްޒު ވިދާޅުވީ މިދިޔަ ހަފްތާގައި އެކަނި 501 މިލިޔަން ރުފިޔާ ޖަމާކޮށްދީފައިވާނެ ކަމަށާއި، މިދިޔަ 51 ހަފްތާ އާއި ދެދުވަސް ތެރޭ ޖުމްލަކޮށް 6.6 ބިލިޔަން ރުފިޔާ ދޫކޮށް ނިމިފައިވާ ކަމަށެވެ. 

އަދި އެއީ އެސްއޯއީތަކަށް ދޫކުރި ފައިސާ ނޫން ކަމަށާއި، އާންމު ކުދި އަދި މެދުފަންތީގެ ވިޔަފާރިތަކަށް ދިން ފައިސާ ކަމަށް ރައީސް ޑރ މުޢިއްޒު ވިދާޅުވިއެވެ. އެމަނިކުފާނު ވިދާޅުވީ ރައްޔިތުންނަށް ދޭންހުރި ފައިސާ ދެމުން، ރައްޔިތުންގެ ފައިސާ ހޯދަމުން ޢަދުލުވެރި ނިޒާމެއް ޤާއިމް ކުރަމުންދާ ކަމަށެވެ. އަދި ކުރިއަށް އޮތްތަނުގައިވެސް އެގޮތަށް ޢަމަލުކުރައްވާނެ ކަމުގެ ޔަޤީންކަން އެމަނިފާނު ދެއްވިއެވެ.

 މި ސަރުކާރުން ވެރިކަމާ ހަވާލުވިއިރު، ސަރުކާރުގެ އެކި ވުޒާރާތަކާއި މުޢައްސަސާތަކުން ހަވާލުކޮށްގެން ކޮށްފައިވާ ގިނަ މަސައްކަތްތަކަށް ގިނަ ޢަދަދެެއްގެ ފައިސާ ދައްކަންޖެހި ނުދެއްކިވެއެވެ.ސަރުކާރުން ކުންފުނިތަކަށް ދޭން ހުރި ފައިސާ ދައްކާނެ ގޮތްތައް މިސަރުކާރުން ކަނޑައަޅާފައިވާއިރު، ދައުލަތުން ނުދެއްކި ހުރި ފައިސާއަށް ބަދަލުދޭނެ ގޮތްތަކެއްވެސް ވަނީ ކަނޑައަޅާފައެވެ. 

ނުދެއްކި ހުރި ފައިސާއަށް ބަދަލުދޭނެ ގޮތްތައް:

• ވެންޑަރުންނަށް އިތުރު އާމްދަނީއެއް ލިބޭނެފަދަ ޓީ-ބޮންޑަކަށް އެފައިސާ ބަދަލުކުރުން
• ބިމެއް ކުއްޔަށް ނެގުމަށް ޝައުގުވެރިވާ ފަރާތްތަކަށް އެފުރުސަތު ދިނުން
•  ވިޔަފާރިތަކުން ދައުލަތަށް ދައްކަން ޖެހޭ ފައިސާއިން (ޚާއްސަކޮށް ޓެކްސްއިން) އެފައިސާ އުނި ކުރުން

ސަރުކާރުން ކުންފުނިތަކަށް ދޭން ޖެހޭ ފައިސާ ދިނުމުގެ މަސައްކަތް ކުރަމުންދާއިރު، އެކި ފަރާތްތަކުން ދައުލަތަށް ދައްކަންޖެހޭ ފައިސާ ހޯދުމަށް، ކަމާބެހޭ ފަރާތްތައް ހިމެނޭ ޓާސްކްފޯހެއް އެކުލަވާލައި އެމަސައްކަތްވެސް ސަރުކާރުން ގެންދަވަނީ ކުރައްވަމުންނެވެ.

 އެގޮތުން އާންމު ވިޔަފާރި ކުންފުނިތަކަށް ލިބެންޖެހޭ ފައިސާ ނުލިބުމުގެ ސަބަބުން އެ ވިޔަފާރިތައް ހިންގުމަށް ދަތިވެފައިވާކަމުގެ ކަންބޮޑުވުންތައް އޭރު ދިޔައީ ފާޅުކުރަމުންނެވެ. މިއާއެކު މާލީ ބޮޑެތި ގޮންޖެހުންތަކާއެކުވެސް ސަރުކާރުން ދިޔައީ ފައިސާ ދެއްކުމަށް މަސައްކަތް ކުރަމުންނެވެ.